ಭಾರತದ ಕ್ರಿಕೆಟ್ ಅಭಿಮಾನಿಗಳ ಹೃದಯ ಗೆ(ಕ)ದ್ದ ಪಾಕ್ ಪೋರಿ

ದುಬೈ, ಸೆಪ್ಟೆಂಬರ್ 24: ಭಾರತ-ಪಾಕಿಸ್ತಾನ ಕ್ರಿಕೆಟ್ ಪಂದ್ಯಗಳೆಂದರೆ ಎರಡೂ ದೇಶಗಳ ಅಭಿಮಾನಿಗಳಲ್ಲಿ ಕಿಚ್ಚು ಹೊತ್ತುತ್ತದೆ.

ಈ ಬಾರಿ ಎರಡೂ ಪಂದ್ಯಗಳಲ್ಲಿ ಭಾರತ, ಪಾಕಿಸ್ತಾನವನ್ನು ನಿರಾಯಾಸವಾಗಿ ಮಣಿಸಿದೆ. ಸಾಮಾನ್ಯವಾಗಿ ಈ ಪಂದ್ಯಗಳಲ್ಲಿ ವೈರತ್ವದ ಹೊಗೆಯೂ ಇರುತ್ತದೆ. ಆದರೆ, ಗೆಲುವಿನ ಸಿಂಚನ ಭಾರತೀಯರ ಈ ಕಿಚ್ಚನ್ನು ತುಸು ತಣ್ಣಗಾಗಿಸಿದೆ. ಅದರ ಜತೆಗೆ ಭಾರತೀಯರ ಹೃದಯವೂ ಪಾಕಿಸ್ತಾನದೆಡೆಗೆ ಮಿಡಿಯುತ್ತಿದೆ!

ಭಾರತೀಯ ಕ್ರಿಕೆಟ್ ಅಭಿಮಾನಿಗಳು ಕ್ರಿಕೆಟ್ ಪಂದ್ಯದಷ್ಟೇ ಅಲ್ಲಿನ ಅಭಿಮಾನಿಯೊಬ್ಬಳ ಬಗ್ಗೆಯೂ ಮಾತನಾಡುತ್ತಿದ್ದಾರೆ. ಪಾಕಿಸ್ತಾನ ಸೋತರೂ ಆ ಅಭಿಮಾನಿ ಮಾತ್ರ ಗೆದ್ದಿದ್ದಾಳೆ.

ಟ್ವಿಟ್ಟರ್, ಫೇಸ್‌ಬುಕ್, ಇನ್‌ಸ್ಟಾಗ್ರಾಂ ಹೀಗೆ ಎಲ್ಲಿಯೇ ನೋಡಿದರೂ ಆಕೆಯದೇ ಫೋಟೋ. ಗಂಭೀರ ಮುಖದಲ್ಲಿ ಸಣ್ಣನೆ ನಗುಸೂಸುವ ಆಕೆಯ ಚಿತ್ರಗಳಿಗೆ ಕ್ರಿಕೆಟ್ ಪ್ರಿಯರು ಫಿದಾ ಆಗಿದ್ದಾರೆ. ಆಕೆಯ ಫೋಟೊಗಳಿಗೆ ತಮಾಷೆಯ ಪೋಸ್ಟ್‌ಗಳನ್ನೂ ಹಾಕಲಾಗುತ್ತಿದೆ.

ಭಾರತ ಮತ್ತು ಪಾಕಿಸ್ತಾನ ನಡುವಿನ ಮೊದಲ ಪಂದ್ಯದ ವೇಳೆ ಕಾಣಿಸಿಕೊಂಡಾಗಲೇ ಪಾಕಿಸ್ತಾನದ ಜೆರ್ಸಿ ತೊಟ್ಟ ಈ ಸುಂದರಿಯ ಚಿತ್ರ ವೈರಲ್ ಆಗಿತ್ತು.

ಭಾರತ ಮತ್ತು ಬಾಂಗ್ಲಾದೇಶದ ಪಂದ್ಯದಲ್ಲಿಯೂ ಈಕೆ ಹಾಜರ್ ಹಾಕಿದ್ದಳು. ಆಗ ಜೆರ್ಸಿ ತೊಡದೆ ಕಪ್ಪು ಮೇಲುಡುಗೆ ಧರಿಸಿ ಬಂದಿದ್ದರಿಂದ ಯಾವ ತಂಡವನ್ನು ಬೆಂಬಲಿಸುತ್ತಿದ್ದಾಳೆ ಎಂಬುದು ಗೊತ್ತಾಗಿರಲಿಲ್ಲ.

ಭಾನುವಾರ ನಡೆದ ಪಾಕಿಸ್ತಾನ ಎದುರಿನ ಪಂದ್ಯದಲ್ಲಿ ಆಕೆ ಮತ್ತೆ ಪಾಕ್ ಜೆರ್ಸಿ ತೊಟ್ಟು ಅಭಿಮಾನಿಗಳ ಕಣ್ಣಿಗೆ ಮುದ ನೀಡಿದ್ದಾಳೆ. ಅತ್ತ ಕ್ರಿಕೆಟ್ ಅಭಿಮಾನಿಗಳು ಪ್ರತಿ ಪಂದ್ಯದಲ್ಲಿಯೂ ಸಾವಿರಾರು ಜನರ ಮಧ್ಯೆ ಆಕೆಯನ್ನು ಹುಡುಕಿ 'ಫೋಕಸ್' ಮಾಡುವ ಕ್ಯಾಮೆರಾಮ್ಯಾನ್‌ನನ್ನು ಶ್ಲಾಘಿಸುತ್ತಿದ್ದಾರೆ.

ಇಂಡಿಯಾ ಡಾಟ್ ಕಾಮ್ ವೆಬ್‌ಸೈಟ್ ವರದಿ ಮಾಡಿರುವ ಪ್ರಕಾರ ಆಕೆಯ ಹೆಸರು ನಿವ್ಯಾ ನವೋರಾ. ಪಾಕಿಸ್ತಾನದ ಸಾಮಾನ್ಯ ಕ್ರಿಕೆಟ್ ಅಭಿಮಾನಿಯಾಗಿರುವ ಆಕೆ ಈಗ ಸೆಲೆಬ್ರಿಟಿ. ಅದರಲ್ಲಿಯೂ ಭಾರತದ ಯುವ ಮನಸ್ಸುಗಳನ್ನು ಆಕೆ ಕದ್ದಿದ್ದಾಳೆ.