ಅನ್‌ಸೋಲ್ಡ್ ಆದ ಸುರೇಶ್ ರೈನಾ: ಥ್ಯಾಂಕ್ಸ್ ಎಂದು ಕೈ ತೊಳೆದುಕೊಂಡ ಸಿಎಸ್‌ಕೆ

ಕಳೆದ ಐಪಿಎಲ್ ಸೀಸನ್‌ವರೆಗೂ ಚೆನ್ನೈ ಪರ ಆಡಿದ ರೈನಾ

ಸುರೇಶ್ ರೈನಾ ಕಳೆದ ವರ್ಷ ಐಪಿಎಲ್‌ನಲ್ಲಿ ಚೆನ್ನೈ ಸೂಪರ್ ಕಿಂಗ್ಸ್ ತಂಡವನ್ನು ಪ್ರತಿನಿಧಿಸಿದ್ದರು. ರೈನಾ ಐಪಿಎಲ್‌ನಲ್ಲಿ ಇದುವರೆಗೆ ಒಂದೇ ಒಂದು ಸಿಎಸ್‌ಕೆ ಪಂದ್ಯವನ್ನು ಮಿಸ್ ಮಾಡಿಕೊಂಡಿದ್ದಾರೆ. ಅವರು ಸಿಎಸ್‌ಕೆ ತಂಡ ಬ್ಯಾನ್ ಆಗಿದ್ದ ಸಂದರ್ಭದಲ್ಲಿ ಗುಜರಾತ್ ಲಯನ್ಸ್‌ಗಾಗಿ ಕೇವಲ ಎರಡು ಋತುಗಳಲ್ಲಿ ಆಡಿದ್ದರು. ಸಿಎಸ್‌ಕೆ ಯಶಸ್ಸಿನಲ್ಲಿ ರೈನಾ ಪ್ರಮುಖ ಪಾತ್ರ ವಹಿಸಿದ್ದರು. ಆದಾಗ್ಯೂ, ಈ ಬಾರಿ ರೈನಾ ಅವರನ್ನು ಉಳಿಸಿಕೊಳ್ಳಲು ತಂಡವು ವಿಫಲವಾದ ಕಾರಣ ಮೆಗಾ ಹರಾಜಿಗೆ ಹೋದರು.

ಹರಾಜಿನಲ್ಲಿ ಯಾವುದೇ ತಂಡವು ರೈನಾಗೆ 2 ಕೋಟಿ ರೂ. ನೀಡಲು ತಲೆಕೆಡಿಸಿಕೊಂಡಿಲ್ಲ. ಹರಾಜಿನ ಹೊರತಾಗಿಯೂ, CSK ಮತ್ತೆ ಖರೀದಿಸುತ್ತದೆ ಎಂದು ವ್ಯಾಪಕವಾಗಿ ನಂಬಲಾಗಿತ್ತು. ಆದರೆ ಅದು ಆಗದೇ ಇದ್ದಾಗ ರೈನಾ ಅಭಿಮಾನಿಗಳು ಕಂಗಾಲಾಗಿದ್ದಾರೆ.

ಸದ್ಯ ಫಾರ್ಮ್‌ನಲ್ಲಿಲ್ಲ ಸುರೇಶ್ ರೈನಾ

ಐಪಿಎಲ್ ಮೆಗಾ ಹರಾಜಿನಲ್ಲಿ ಯಾವುದೇ ತಂಡವು ಸುರೇಶ್ ರೈನಾ ಅವರನ್ನು ಖರೀದಿಸಲು ಹಲವು ಕಾರಣಗಳಿವೆ. ಸುರೇಶ್ ರೈನಾ ಸದ್ಯ ಫಾರ್ಮ್‌ನಲ್ಲಿಲ್ಲ. ಜೊತೆಗೆ ಇತ್ತೀಚೆಗೆ ಯಾವುದೇ ಕ್ರಿಕೆಟ್ ಆಡಿಲ್ಲ. ಕಳೆದ ಋತುವಿನಲ್ಲಿ ರೈನಾ ಕೂಡ ಸಂಪೂರ್ಣ ವಿಫಲರಾಗಿದ್ದರು. ಈ ಋತುವಿನಲ್ಲಿ ಮಿಂಚುವ ವಿಶ್ವಾಸವನ್ನು ಫ್ರಾಂಚೈಸಿಗೆ ನೀಡುವಲ್ಲಿಯೂ ವಿಫಲರಾದರು. ಇದರ ಜೊತೆಗೆ, ಭಾರತದಲ್ಲಿ ಕೊರೊನಾ ಕಾರಣ 2020 ರಲ್ಲಿ ಯುಎಇಯಲ್ಲಿ ಲೀಗ್ ನಡೆದಾಗ, ಪಂದ್ಯಗಳು ಪ್ರಾರಂಭವಾಗುವ ಮೊದಲೇ ರೈನಾ ಖಾಸಗಿ ಕಾರಣದಿಂದ ಮನೆಗೆ ಮರಳಿದರು.

ಇದರೊಂದಿಗೆ ಈ ಬಾರಿಯೂ ಅಂತಹ ಸನ್ನಿವೇಶಗಳು ಎದುರಾದರೆ ರೈನಾ ತಂಡಕ್ಕೆ ಲಭ್ಯವಾಗುವುದಿಲ್ಲ ಎಂದು ಫ್ರಾಂಚೈಸಿಗಳೂ ಭಾವಿಸಿದಂತಿದೆ. ಅವರು ಈಗಾಗಲೇ ಅಂತಾರಾಷ್ಟ್ರೀಯ ಕ್ರಿಕೆಟ್‌ನಿಂದ ನಿವೃತ್ತಿಯಾಗಿದ್ದಾರೆ. ಈ ಎಲ್ಲ ಅಂಶಗಳನ್ನು ಪರಿಗಣಿಸಿ ರೈನಾಗೆ ಯಾವುದೇ ಫ್ರಾಂಚೈಸಿ ಗಮನ ನೀಡಿಲ್ಲ ಎನ್ನುತ್ತಾರೆ ಕ್ರಿಕೆಟ್ ವಿಶ್ಲೇಷಕರು.

IPL 2022: ಹರಾಜಿನ ಬಳಿಕ, ಚೆನ್ನೈ ಸೂಪರ್ ಕಿಂಗ್ಸ್‌ ಫುಲ್ ಸ್ಕ್ವಾಡ್‌ ಇಲ್ಲಿದೆ

ಥ್ಯಾಂಕ್ಸ್ ಹೇಳಿ ಕೈ ತೊಳೆದುಕೊಂಡ ಚೆನ್ನೈ ಸೂಪರ್ ಕಿಂಗ್ಸ್‌

ಸುರೇಶ್ ರೈನಾರ 2 ಕೋಟಿ ರೂಪಾಯಿ ಮೂಲ ಬೆಲೆಗೂ ಬಿಡ್‌ ಮಾಡದ ಚೆನ್ನೈ ಸೂಪರ್ ಕಿಂಗ್ಸ್‌ ಹರಾಜಿನಲ್ಲಿ ರೈನಾ ಖರೀದಿಗೆ ಒಂದು ಸಾರಿಯಾದ್ರೂ ಬಿಡ್‌ ಮಾಡಲು ಮುಂದಾಗಲಿಲ್ಲ. ಆದ್ರೆ ಹರಾಜು ಮುಗಿದ ಬಳಿಕ ಚೆನ್ನೈ ಸೂಪರ್ ಕಿಂಗ್ಸ್‌ನ ಅಧಿಕೃತ ಟ್ವಿಟ್ಟರ್ ಅಕೌಟ್‌ನಿಂದ ''ಎಲ್ಲಾ ಹಳದಿ ನೆನಪುಗಳಿಗೆ ತುಂಬಾ ಧನ್ಯವಾದಗಳು ಚಿನ್ನ ತಾಲ'' ಎಂದು ಸಿಎಸ್‌ಕೆ ಫ್ರಾಂಚೈಸಿ ಟ್ವೀಟ್ ಮಾಡಿದೆ. ಇದನ್ನು ಕೆಲವರು ಮೆಚ್ಚಿದ್ರೆ, ಮತ್ತೆ ಕೆಲವರು ಇಷ್ಟು ವರ್ಷ ಆಡಿದ ಆಟಗಾರನಾಗಿ ಸರಿಯಾದ ಮರ್ಯಾದೆ ಕೊಟ್ರಿ ಬಿಡಿ ಎಂದು ಟೀಕಿಸಿದ್ದಾರೆ.

ಇನ್ನು ಕೆಲವರು ಬೇರೆ ಫ್ರಾಂಚೈಸಿಗಳಿಗೆ ಆತ ಬೇಡದೆ ಇರುವುದು, ಆದ್ರೆ ರೈನಾ ಇಷ್ಟು ವರ್ಷ ನಿಮ್ಮ ತಂಡಕ್ಕೆ ನೀಡಿದ ಕೊಡುಗೆಗಾದ್ರೂ, ಮೂಲ ಬೆಲೆಗಾದ್ರೂ ಬಿಡ್ ಮಾಡಬೇಕಿತ್ತು. ನಿಜಕ್ಕೂ ಬೇಸರದ ಸಂಗತಿ ಎಂದು ಟ್ವೀಟ್ ಮಾಡಿದ್ದಾರೆ.

ಬಲಿಷ್ಠ ತಂಡವನ್ನ ಕಟ್ಟಿದ ಲಕ್ನೋ ಸೂಪರ್‌ ಜಾಯಿಂಟ್ಸ್‌: ಮಾಸ್ಟರ್ ಮೈಂಡ್ ಗೌತವ್ ಗಂಭೀರ್ ಪ್ಲ್ಯಾನ್ ಸಕ್ಸಸ್

ಐಪಿಎಲ್ ಯಶಸ್ವಿ ಆಟಗಾರರಲ್ಲಿ ಒಬ್ಬಾತ ರೈನಾ

ಸುರೇಶ್ ರೈನಾ ಐಪಿಎಲ್‌ನ ಅತ್ಯಂತ ಯಶಸ್ವಿ ಆಟಗಾರರಲ್ಲಿ ಒಬ್ಬರು. ಲೀಗ್‌ನಲ್ಲಿ ಇದುವರೆಗೆ 205 ಪಂದ್ಯಗಳನ್ನು ಆಡಿರುವ ರೈನಾ 32.5ರ ಸರಾಸರಿಯಲ್ಲಿ 5,528 ರನ್ ಗಳಿಸಿದ್ದಾರೆ. ಇದರಲ್ಲಿ 39 ಅರ್ಧ ಶತಕ ಹಾಗೂ ಒಂದು ಶತಕ ಸೇರಿದೆ. ಈ ಜರ್ನಿಯಲ್ಲಿ ರೈನಾ 506 ಬೌಂಡರಿ ಹಾಗೂ 203 ಸಿಕ್ಸರ್‌ಗಳನ್ನು ಸಿಡಿಸಿದ್ದರು. ಅಲ್ಲದೆ ಬೌಲರ್ ಆಗಿ 13 ವಿಕೆಟ್ ಕಬಳಿಸಿದ್ದಾರೆ. ಸಿಎಸ್‌ಕೆ ನಾಲ್ಕು ಬಾರಿ ಐಪಿಎಲ್ ಚಾಂಪಿಯನ್ ಆದ ಸಂದರ್ಭದಲ್ಲಿ ಸುರೇಶ್ ರೈನಾ ತಂಡದ ಸದಸ್ಯರಾಗಿದ್ದಾರೆ.