ಐಪಿಎಲ್: ಈ ತಂಡದ ಪರ ಶಾಶ್ವತವಾಗಿ ಆಡಬೇಕೆಂಬ ಆಸೆ ನನಗಿದೆ ಎಂದ ಶುಬ್ಮನ್ ಗಿಲ್

ಈ ತಂಡದ ಪರ ಶಾಶ್ವತವಾಗಿ ಐಪಿಎಲ್ ಆಡುವ ಆಸೆ ಎಂದ ಶುಬ್ಮನ್ ಗಿಲ್

ಮುಂಬರಲಿರುವ ಇಂಡಿಯನ್ ಪ್ರೀಮಿಯರ್ ಲೀಗ್ ಟೂರ್ನಿಯಲ್ಲಿಯೂ ಕೋಲ್ಕತಾ ನೈಟ್ ರೈಡರ್ಸ್ ತಂಡದ ಪರವೇ ಕಣಕ್ಕಿಳಿಯಲು ಶುಬ್ ಮನ್ ಗಿಲ್ ಅಸೆ ವ್ಯಕ್ತಪಡಿಸಿದ್ದಾರೆ. "ಕೋಲ್ಕತಾ ನೈಟ್ ರೈಡರ್ಸ್ ತಂಡದ ಜೊತೆ ನಾನು ಉತ್ತಮ ಬಾಂಧವ್ಯವನ್ನು ಹೊಂದಿದ್ದೇನೆ. ಇಂತಹ ಫ್ರಾಂಚೈಸಿ ಜೊತೆ ಒಮ್ಮೆ ಕೆಲಸ ನಿರ್ವಹಿಸಿದರೆ ಶಾಶ್ವತವಾಗಿ ಅದೇ ತಂಡದ ಪರ ಕಣಕ್ಕಿಳಿಯಲು ಯಾರಾದರೂ ಇಚ್ಛೆ ಪಡುವುದು ಸಹಜ. ಹಾಗೂ ಕೋಲ್ಕತಾ ನೈಟ್ ರೈಡರ್ಸ್ ತಂಡದ ಪರ ನನಗೆ ಮತ್ತೆ ಆಡಲು ಅವಕಾಶ ಸಿಕ್ಕರೆ ನನ್ನ ಕ್ರಿಕೆಟ್ ಜೀವನದ ಪೂರ್ತಿ ಅದೇ ತಂಡದ ಪರ ಐಪಿಎಲ್ ಆಡುತ್ತೇನೆ" ಎಂದು ಶುಬ್ ಮನ್ ಗಿಲ್ ಹೇಳಿದ್ದಾರೆ.

ಐಪಿಎಲ್ ಮೆಗಾ ಹರಾಜು ಯಾವಾಗ?

ಬಿಸಿಸಿಐ ಕಳೆದ ಗುರುವಾರ ಎಲ್ಲಾ ಫ್ರಾಂಚೈಸಿಗಳ ಜೊತೆ ವಿಡಿಯೋ ಕಾನ್ಫರೆನ್ಸ್ ಮೂಲಕ ಸಭೆಯನ್ನು ನಡೆಸಿದ್ದು ಮೆಗಾ ಹರಾಜಿಗೆ ಸ್ಥಳ ಹಾಗೂ ದಿನಾಂಕವನ್ನು ನಿಗದಿಪಡಿಸಿದೆ ಎಂಬ ಮಾಹಿತಿ ಲಭ್ಯವಾಗಿದ್ದು, ಮುಂದಿನ ವರ್ಷದ ಫೆಬ್ರವರಿ 12 ಮತ್ತು 13ರಂದು ಬೆಂಗಳೂರು ನಗರದಲ್ಲಿ ಹರಾಜು ಪ್ರಕ್ರಿಯೆ ನಡೆಯಲಿದೆ ಎನ್ನಲಾಗುತ್ತಿದೆ. ಹೀಗಾಗಿ ಬಿಸಿಸಿಐ ಎಲ್ಲಾ ಫ್ರಾಂಚೈಸಿಗಳ ಮಾಲೀಕರಿಗೂ ಫೆಬ್ರವರಿ 11ರಂದೇ ಬೆಂಗಳೂರಿಗೆ ಬರಬೇಕೆಂದು ಸೂಚನೆ ನೀಡಿದೆ.

ಮೆಗಾ ಹರಾಜಿನಲ್ಲಿ ಪಾಲ್ಗೊಳ್ಳಲಿದ್ದಾರೆ 1000 ಆಟಗಾರರು

ಇನ್ನು ಮೆಗಾ ಹರಾಜು ಪ್ರಕ್ರಿಯೆ ದಿನಾಂಕ ಮತ್ತು ಸ್ಥಳವನ್ನು ನಿಗದಿ ಪಡಿಸಿರುವ ಬಿಸಿಸಿಐ ಇತರೆ ಕ್ರಿಕೆಟ್ ಮಂಡಳಿಗಳ ಜೊತೆ ಸಂಪರ್ಕವನ್ನು ಮಾಡಿದ್ದು ಇಂಡಿಯನ್ ಪ್ರಿಮಿಯರ್ ಲೀಗ್ ಟೂರ್ನಿಯಲ್ಲಿ ಆಡಲು ಇಚ್ಛಿಸುವ ಆಟಗಾರರ ಹೆಸರನ್ನು ನೋಂದಾಯಿಸಿಕೊಳ್ಳುವಂತೆ ಸೂಚನೆ ನೀಡಿದೆ. ಹೀಗಾಗಿ ಬಿಸಿಸಿಐ ಪ್ರಕಾರ ಸುಮಾರು 1000ಕ್ಕೂ ಹೆಚ್ಚು ಆಟಗಾರರು ಮೆಗಾ ಹರಾಜಿಗೆ ತಮ್ಮ ಹೆಸರನ್ನು ನೋಂದಾಯಿಸುವ ನಿರೀಕ್ಷೆಯಿದ್ದು, ಇದರಲ್ಲಿ ಕೇವಲ 250 ಆಟಗಾರರು ಮಾತ್ರ ಹರಾಜಾಗಲಿದ್ದಾರೆ.