ದುಬೈ, ಆಗಸ್ಟ್ 15: ಭಾರತೀಯ ಕ್ರಿಕೆಟ್ ತಂಡದ ಆರಂಭಿಕ ಆಟಗಾರ, ಕರ್ನಾಟಕದ ಕೆ.ಎಲ್. ರಾಹುಲ್ ಹಾಗೂ ಶಿಖರ್ ಧವನ್, ಅಂತಾರಾಷ್ಟ್ರೀಯ ಕ್ರಿಕೆಟ್ ಸಂಸ್ಥೆ (ಐಸಿಸಿ) ಬಿಡುಗಡೆ ಮಾಡಿರುವ ಟೆಸ್ಟ್ ಬ್ಯಾಟ್ಸ್ ಮನ್ ಗಳ ನೂತನ ಶ್ರೇಯಾಂಕ ಪಟ್ಟಿಯಲ್ಲಿ ತಮ್ಮ ವೃತ್ತಿಜೀವನದ ಶ್ರೇಷ್ಠ ಮಟ್ಟದ ಶ್ರೇಯಾಂಕ ಗಳಿಸಿದ್ದಾರೆ.
ಸೋಮವಾರ ಅಂತ್ಯಗೊಂಡಿದ್ದ ಮೂರನೇ ಟೆಸ್ಟ್ ಪಂದ್ಯದಲ್ಲಿ ಶತಕ ಗಳಿಸಿದ್ದ ಶಿಖರ್ ಧವನ್ ಅವರು ಈ ಸಾಧನೆಯಿಂದಾಗಿ, ಹೊಸ ಶ್ರೇಯಾಂಕ ಪಟ್ಟಿಯ 10 ಸ್ಥಾನಗಳ ಏರಿಕೆ ಕಂಡಿದ್ದು, ಇದೀಗ 28ನೇ ಸ್ಥಾನಕ್ಕೇರಿದ್ದಾರೆ. ಇದು, ಧವನ್ ಅವರು ಈವರೆಗಿನ ವೃತ್ತಿಜೀವನದಲ್ಲಿ ಕಂಡ ಉತ್ತಮ ಸಾಧನೆಯಾಗಿದೆ.
ಶ್ರೀಲಂಕಾದಲ್ಲಿ ಸ್ವಾತಂತ್ರ್ಯೋತ್ಸವದ ಧ್ವಜ ಹಾರಿಸಿದ ಟೀಂ ಇಂಡಿಯಾ
ಲಂಕಾ ವಿರುದ್ಧದ ಟೆಸ್ಟ್ ಸರಣಿಯಲ್ಲಿ ಧವನ್ ಉತ್ತಮ ಪ್ರದರ್ಶನ ತೋರಿ, ಸರಣಿಯಲ್ಲಿ ಒಟ್ಟಾರೆ 358 ರನ್ ಪೇರಿಸಿದ್ದರಲ್ಲದೆ, ಸರಣಿ ಶ್ರೇಷ್ಠ ಗೌರವವನ್ನೂ ಪಡೆದಿದ್ದರು.
ಇನ್ನು, ಮೂರನೇ ಟೆಸ್ಟ್ ಪಂದ್ಯದ ಮೊದಲ ಇನಿಂಗ್ಸ್ ನಲ್ಲಿ 85 ರನ್ ಹಾಗೂ ಶಿಖರ್ ಧವನ್ ಜತೆಗೂಡಿ ಮೊದಲ ವಿಕೆಟ್ ಗೆ 188 ರನ್ ಕಲೆ ಹಾಕಿದ್ದ ರಾಹುಲ್, ಹೊಸ ಪಟ್ಟಿಯಲ್ಲಿ ಎರಡು ಸ್ಥಾನಗಳ ಏರಿಕೆ ಕಂಡು, 9ನೇ ಸ್ಥಾನ ಗಳಿಸಿದ್ದಾರೆ.
85 ವರ್ಷಗಳ ನಂತರ ವಿದೇಶದಲ್ಲಿ ಭಾರತಕ್ಕೆ ಸಂಪೂರ್ಣ ಸರಣಿ ಜಯ
ಇದು ಅವರ ವೃತ್ತಿಜೀವನದ ಅತಿ ಉನ್ನತ ಶ್ರೇಯಾಂಕ. ಆದರೆ, ಕಳೆದ ತಿಂಗಳೂ ಅವರು ಒಮ್ಮೆ 9ನೇ ಸ್ಥಾನಕ್ಕೆ ಏರಿದ್ದರು. ಈಗ 2ನೇ ಬಾರಿಗೆ ಆ ಸ್ಥಾನ ತಲುಪಿದ್ದಾರೆ. ಆದರೆ, ಅವರು ಗಳಿಸಿರುವ 761 ರೇಟಿಂಗ್ ಅಂಕಗಳು ಅವರು ಈವರೆಗಿನ ಶ್ರೇಷ್ಠ ಸಾಧನೆಯಾಗಿದೆ.