ಯುವರಾಜ್ ಸಿಂಗ್ ದಾಖಲೆ ಸರಿಗಟ್ಟಲಿದ್ದಾರೆ 'ಹಿಟ್‌ಮ್ಯಾನ್' ರೋಹಿತ್

ಆಟ ನಿಲ್ಲಿಸಿದ ಯುವಿ

ಬಹುಶಃ ಯುವರಾಜ್ ಈಚಿನ ದಿನಗಳಲ್ಲಿ ಏಕದಿನ ತಂಡದಲ್ಲಿ ಇರುತ್ತಿದ್ದರೆ, ರೋಹಿತ್‌ಗೆ ಯುವಿ ದಾಖಲೆ ಸರಿಗಟ್ಟೋದು ಸುಲಭವಿರಲಿಲ್ಲ. ಕ್ಯಾನ್ಸರ್ ಖಾಯಿಲೆಯ ಬಳಿಕ ಭಾರತದ ಆಯ್ಕೆ ಸಮಿತಿಯಿಂದ ಕಡೆಗಣಿಸಲ್ಪಟ್ಟ ಯುವಿ ಅನಂತರ ಭಾರತದ ತಂಡದಲ್ಲಿ ಕಾಣಿಸಿಕೊಳ್ಳಲಿಲ್ಲ. ಹೀಗಾಗಿ ಸಿಕ್ಸರ್ ಕಿಂಗ್‌ನ ಏಕದಿನ ಒಟ್ಟು ರನ್ ಏರಿಕೆ ಕಾಣದೆ ನಿಂತಿಲ್ಲೇಯಿದೆ.

26 ರನ್ ಬೇಕು

ಇತ್ತೀಚೆಗೆ ಅಂತಾರಾಷ್ಟ್ರೀಯ ಕ್ರಿಕೆಟ್‌ಗೆ ನಿವೃತ್ತಿ ಘೋಷಿಸಿದ 'ಕೆಚ್ಚೆದೆಯ ಮಹಾರಾಜ' ಯುವಿ ಒಟ್ಟು 304 ಏಕದಿನ ಪಂದ್ಯಗಳಲ್ಲಿ 8701 ರನ್ ಬಾರಿಸಿದ್ದರು. ರೋಹಿತ್ ಶರ್ಮಾ ಒಟ್ಟು 217 ಏಕದಿನ ಪಂದ್ಯಗಳಲ್ಲಿ 8676 ರನ್ ಗಳಿಸಿದ್ದಾರೆ. ಇನ್ನು ರೋಹಿತ್ 26 ರನ್ ಗಳಿಸಿದರೆ ಯುವರಾಜ್ ಏಕದಿನ ಒಟ್ಟು ರನ್ ದಾಖಲೆ ಬದಿಗೆ ಸರಿಯಲಿದೆ.

ಸಚಿನ್‌ಗೆ ಅಗ್ರ ಸ್ಥಾನ

ಏಕದಿನ ಕ್ರಿಕೆಟ್‌ನಲ್ಲಿ ಭಾರತ ಪರ ಅತ್ಯಧಿಕ ರನ್ ದಾಖಲೆ ಮಾಸ್ಟರ್ ಬ್ಲಾಸ್ಟರ್ ಸಚಿನ್ ತೆಂಡೂಲ್ಕರ್ ಹೆಸರಿನಲ್ಲಿದೆ. ತೆಂಡೂಲ್ಕರ್ ಒಟ್ಟು 18426 ರನ್ ಗಳಿಸಿದ್ದಾರೆ. ಅನಂತರದ ಸ್ಥಾನಗಳಲ್ಲಿ ವಿರಾಟ್ ಕೊಹ್ಲಿ (11406 ರನ್), ಸೌರವ್ ಗಂಗೂಲಿ (11363 ರನ್), ರಾಹುಲ್ ದ್ರಾವಿಡ್ (10889 ರನ್), ಎಂ.ಎಸ್. ಧೋನಿ (10773 ರನ್ ), ಮೊಹಮ್ಮದ್ ಅಝರುದ್ದೀನ್ (9378 ರನ್), ಯುವರಾಜ್ ಸಿಂಗ್ (8701 ರನ್) ಇದ್ದಾರೆ.

ಸರಣಿಯಲ್ಲಿ ಭಾರತ ಮುನ್ನಡೆ

ಮೂರು ಪಂದ್ಯಗಳ ಏಕದಿನ ಸರಣಿಯಲ್ಲಿ ಭಾರತ ಈಗಾಗಲೇ 1-0 ಮುನ್ನಡೆ ಸಾಧಿಸಿದೆ. ಆರಂಭಿಕ ಪಂದ್ಯ ಮಳೆಯ ಕಾರಣ ರದ್ದಾಯಿತಾದರೂ ದ್ವಿತೀಯ ಪಂದ್ಯದಲ್ಲಿ ಭಾರತ ಡಕ್ವರ್ಥ್ ಲೂಯೀಸ್ ನಿಯಮದ ಆಧಾರದಲ್ಲಿ 59 ರನ್ ಜಯ ಗಳಿಸಿತ್ತು. ಈ ಪಂದ್ಯದಲ್ಲಿ ನಾಯಕ ಕೊಹ್ಲಿ 120 ರನ್ (125 ಎಸೆತ) ಸೇರಿಸಿದ್ದರು.