ಐಎಸ್‌ಎಲ್‌: ಕೊರೊ ಇಲ್ಲದೆ ಗೋವಾಕ್ಕೆ ಕಠಿಣ ಸವಾಲಾಗಲಿದೆ ಜೆಮ್ಷೆಡ್ಪುರ್

ತಂಡದ ಶ್ರಮ ಮುಖ್ಯ

'ವೈಯಕ್ತಿಕ ಆಟಗಾರರಿಗಿಂತ ತಂಡದ ಶ್ರಮ ಪ್ರಮುಖ ಎಂಬುದನ್ನು ನಾನು ಕಾಯ್ದುಕೊಂಡು ಬಂದವ. ನಮ್ಮ ತಂಡ ಉತ್ತಮ ಅವಕಾಶಗಳನ್ನು ನಿರ್ಮಿಸುವ ತಂಡ. ಅದಕ್ಕೆ ನಾನು ಚಿರಋಣಿಯಾಗಿದ್ದೇನೆ. ಕೊರೊ ಅವರಂಥ ಸ್ಟ್ರೈಕರ್ ಇರುವುದು ನಮ್ಮ ಅದೃಷ್ಟ. ಆದರೆ ನಮ್ಮಲ್ಲಿ ಬೆಂಚ್‌ನಲ್ಲಿರುವ ಆಟಗಾರರೂ ಗೋಲು ಗಳಿಸುವ ಸಾಮರ್ಥ್ಯ ಹೊಂದಿರುವುದು ಖುಷಿಯ ವಿಚಾರ' ಎಂದು ಲಾಸ್ ಪಾಮ್ಸ್‌ನ ಮಾಜಿ ಕೋಚ್ ಹೇಳಿದ್ದಾರೆ. ಸಾಕಷ್ಟು ದಾಳಿಯನ್ನು ಮಾಡುವ ಆಟಗಾರರನ್ನು ಹೊಂದಿರುವ ಕಾರಣ ಅತಿ ಹೆಚ್ಚು ಗೋಲು ಗಳಿಸಿದ ತಂಡವಾಗಿ ಗೋವಾ ಅಗ್ರ ಸ್ಥಾನದಲ್ಲಿದೆ. ಕಳೆದ ಬಾರಿ ಚಾಂಪಿಯನ್ ತಂಡ ಚೆನ್ನೈಯಿನ್ ವಿರುದ್ಧ ಪ್ಲೇ ಆ್‌ನಲ್ಲಿ ಗೋವಾ ಸೋತಿತ್ತು. ಈ ಬಾರಿ ಮೊದಲ ಪಂದ್ಯದಲ್ಲಿ ಡ್ರಾ ಸಾಧಿಸಿದ ನಂತರ ಸತತ ಮೂರು ಪಂದ್ಯಗಳಲ್ಲಿ ಜಯ ಗಳಿಸಿ ಪ್ರಭುತ್ವ ಹೊಂದಿದೆ.

31 ಗೋಲುಗಳು

ಕಳೆದ ಬಾರಿ ಆಡಿರುವ 18 ಲೀಗ್ ಪಂದ್ಯಗಳಲ್ಲಿ ತಂಡ 42 ಗೋಲು ಗಳಿಸಿ ಪ್ರೇಕ್ಷಕರಿಗೆ ಫುಟ್ಬಾಲ್‌ನ ಸವಿ ನೀಡಿತ್ತು. ಕೊರೊಮಿನಾಸ್ ಹಾಗೂ ಮ್ಯಾನ್ವೆಲ್ ಲಾನ್ಜರೋಟ್ ಅವರು ಒಟ್ಟಾಗಿ 31 ಗೋಲುಗಳನ್ನು ಗಳಿಸಿರುವುದು ವಿಶೇಷ. ಲಾನ್ಜರೋಟ್ ಈಗ ಎಟಿಕೆ ಪರ ಆಡುತ್ತಿರುವುದು ಗೋವಾಕ್ಕೆ ತುಂಬಲಾರದ ನಷ್ಟ. ಅವರ ಅನುಪಸ್ಥಿತಿ ತಂಡದ ಮೇಲೆ ಪರಿಣಾಮ ಬೀರಿರುವುದು ಸ್ಪಷ್ಟ.

ಆಡಿದ್ದು ಕೇವಲ 44 ನಿಮಿಷ

ಲಾನ್ಜರೋಟ್ ಅವರ ಅನುಪಸ್ಥಿತಿಯಲ್ಲೂ ಲೊಬೆರಾ ತಂಡದ ಅಟ್ಯಾಕ್ ವಿಭಾಗದಲ್ಲಿ ಸಮತೋಲವನ್ನು ಕಾಯ್ದುಕೊಂಡಿದ್ದಾರೆ. ವಿಂಗರ್ ವಿಭಾಗದಲ್ಲಿ ಮಂದಾರ ರಾವ್ ದೇಸಾಯಿ ಈ ಬಾರಿ ಫುಲ್ ಬ್ಯಾಕ್ ನಲ್ಲಿದ್ದಾರೆ. ಎಡು ಬೇಡಿಯಾ ಈಗ ವಿಂಗರ್ ವಿಭಾಗದಲ್ಲಿದ್ದಾರೆ. ಸ್ಪೇನ್‌ಮೂಲದ ಆಟಗಾರ ಮಿಗ್ವೆಲ್ ಪಲಾಂಕಾ ಅವರು ಲಾನ್ಜರೋಟ್ ಅವರ ಸ್ಥಾನವನ್ನು ತುಂಬುತ್ತಿದ್ದಾರೆ. ಆದರೆ ಅವರು ಇದುವರೆಗೂ ಆಡಿದ್ದು ಕೇವಲ 44 ನಿಮಿಷ.

ಸಾಮರ್ಥ್ಯ ತೋರುವ ಅವಕಾಶ

ಈಗ ಪಲಾಂಕಾ ಅವರಿಗೆ ತಮ್ಮ ನೈಜ ಸಾಮರ್ಥ್ಯವನ್ನು ತೋರುವ ಅವಕಾಶ. ಮುಂಬೈ ಸಿಟಿ ವಿರುದ್ಧದ ಪಂದ್ಯದಲ್ಲಿ ಪಲಾಂಕಾ ಎರಡು ಗೋಲು ಗಳಿಸಿದ್ದರು. ಆ ಪಂದ್ಯದಲ್ಲಿ ಗೋವಾ 5-0 ಅಂತರದಲ್ಲಿ ಗೆದ್ದಿತ್ತು. ಮುಂದಿನ ಪಂದ್ಯದಲ್ಲೂ ಪಲಾಂಕಾ ಅದೇ ರೀತಿಯಲ್ಲಿ ಗೋಲು ಗಳಿಸಿದರೆ ಗೋವಾ ತಂಡ ಕೊರೊ ಅವರನ್ನು ಯಾವಾಗಲೂ ನಂಬಿಕೊಂಡಿರುವುದರಿಂದ ಹೊರ ಬರಲಿದೆ. ಆದರೂ ಗೋವಾ ತಂಡಕ್ಕೆ ಜೆಮ್ಷೆಡ್ಪುರ ನಿಜವಾದ ಅಗ್ನಿಪರೀಕ್ಷೆ.