180 ದೊಡ್ಡ ಮೊತ್ತ ಎಂದು ಪರಿಗಣಿಸಿದ್ದೆವು, ನಾವೀಗ ಕಲಿತಿದ್ದೇವೆ
ಪಾಕ್ ವಿರುದ್ಧದ ಈ ಪಂದ್ಯದಲ್ಲಿ ಸವಾಲಿನ ಮೊತ್ತವನ್ನು ದಾಖಲಿಸಿದ ಕುರಿತು ಮಾತನಾಡಿದ ರೋಹಿತ್ ಶರ್ಮಾ 180ಕ್ಕೂ ಹೆಚ್ಚು ರನ್ ಕಲೆ ಹಾಕಿದ್ದರಿಂದ ಅದನ್ನು ನಾವು ದೊಡ್ಡ ಮೊತ್ತ ಎಂದು ಪರಿಗಣಿಸಿದ್ದೆವು, ಯಾವುದೇ ಕ್ರೀಡಾಂಗಣದಲ್ಲಿ ಈ ಮೊತ್ತವನ್ನು ದಾಖಲಿಸಿದರೆ ಅದನ್ನು ಉತ್ತಮ ಸ್ಕೋರ್ ಎಂದು ಪರಿಗಣಿಸಲಾಗುತ್ತದೆ, ಆದರೆ ಇಂದು ಇದರಿಂದ ನಾವು ಪಾಠ ಕಲಿತಿದ್ದೇವೆ, ಇಂಥ ಸವಾಲಿನ ಮೊತ್ತವನ್ನು ಕಲೆ ಹಾಕಿದಾಗ ಯಾವ ರೀತಿ ಬೌಲಿಂಗ್ ದಾಳಿ ನಡೆಸಿ ಮೊತ್ತವನ್ನು ರಕ್ಷಿಸಬೇಕು ಎಂಬುದನ್ನು ಕಲಿತುಕೊಂಡಿದ್ದೇವೆ ಎಂದು ರೋಹಿತ್ ಶರ್ಮಾ ತಿಳಿಸಿದ್ದಾರೆ. ಈ ಮೂಲಕ 180+ ದೊಡ್ಡ ಮೊತ್ತ ಎಂದು ಪರಿಗಣಿಸಿ ಕಣಕ್ಕಿಳಿದದ್ದೇ ತಪ್ಪಾಯ್ತು ಮತ್ತು ಸೋಲಿಗೆ ಕಾರಣವಾಯ್ತು ಎಂಬರ್ಥದಲ್ಲಿ ರೋಹಿತ್ ಶರ್ಮಾ ಮಾತನಾಡಿದ್ದಾರೆ.
ಅವರಿಬ್ಬರ ಜೊತೆಯಾಟ ಅತ್ಯುತ್ತಮವಾಗಿತ್ತು
ಇನ್ನೂ ಮುಂದುವರಿದು ಮಾತನಾಡಿದ ರೋಹಿತ್ ಶರ್ಮಾ ಮಹಮ್ಮದ್ ರಿಜ್ವಾನ್ ಹಾಗೂ ಮೊಹಮ್ಮದ್ ನವಾಜ್ ಜತೆಯಾಟವನ್ನು ಹೊಗಳಿದರು. ಆ ಇಬ್ಬರು ಕಣದಲ್ಲಿ ಉತ್ತಮ ಜತೆಯಾಟವನ್ನಾಡಿ ಒಳ್ಳೆಯ ಇನಿಂಗ್ಸ್ ಕಟ್ಟುತ್ತಿದ್ದಾಗಲೂ ಸಹ ನಾವು ತಾಳ್ಮೆಯಿಂದಲೇ ಇದ್ದೆವು, ಆದರೆ ಅವರ ಆಟ ಹೆಚ್ಚು ಕಾಲ ನಡೆದದ್ದು ತಮಗೆ ಹಿನ್ನಡೆಯಾಯಿತು ಎಂದು ರೋಹಿತ್ ಶರ್ಮಾ ತಿಳಿಸಿದ್ದಾರೆ. ಹಾಗೂ ತಮಗಿಂತ ಪಾಕಿಸ್ತಾನ ಉತ್ತಮ ಕ್ರಿಕೆಟ್ ಆಡಿತು ಎಂಬುದನ್ನು ಸಹ ರೋಹಿತ್ ಶರ್ಮಾ ತಿಳಿಸಿದ್ದಾರೆ. ಈ ಮೂಲಕ ಪಾಕಿಸ್ತಾನದ ಬ್ಯಾಟಿಂಗ್ ಮುಂದೆ ತಮ್ಮ ತಂಡದ ಬೌಲಿಂಗ್ ವಿಫಲವಾಯಿತು ಎಂಬುದನ್ನು ರೋಹಿತ್ ಶರ್ಮಾ ಒಪ್ಪಿಕೊಂಡಿದ್ದಾರೆ.
ಕೊಹ್ಲಿಯನ್ನು ವಿಶೇಷವಾಗಿ ಹೊಗಳಿದ ರೋಹಿತ್
ಇನ್ನು ಟೀಮ್ ಇಂಡಿಯಾ ಪ್ರದರ್ಶನದ ಬಗ್ಗೆ ನೇರವಾಗಿ ಹೆಚ್ಚು ಮಾತನಾಡದ ರೋಹಿತ್ ಶರ್ಮಾ ವಿರಾಟ್ ಕೊಹ್ಲಿ ಬ್ಯಾಟಿಂಗ್ ಬಗ್ಗೆ ಮಾತ್ರ ಪ್ರತ್ಯೇಕವಾಗಿ ಮಾತನಾಡಿದರು. ತಂಡದ ಎಲ್ಲಾ ಆಟಗಾರರೂ ವಿಕೆಟ್ ಒಪ್ಪಿಸುತ್ತಿದ್ದರೆ, ಮತ್ತೊಂದೆಡೆ ಏಕಾಂಗಿ ಹೋರಾಟ ನಡೆಸಿದ ವಿರಾಟ್ ಕೊಹ್ಲಿ ತಂಡಕ್ಕೆ ಆಸರೆಯಾದರು ಹಾಗೂ ಆ ಸಮಯದಲ್ಲಿ ಅದು ಭಾರತಕ್ಕೆ ಬೇಕಾಗಿದ್ದ ಅಮೂಲ್ಯ ಇನಿಂಗ್ಸ್ ಆಗಿತ್ತು ಎಂದು ರೋಹಿತ್ ಶರ್ಮಾ ಕೊಹ್ಲಿ ಪ್ರದರ್ಶನವನ್ನು ಹಾಡಿ ಹೊಗಳಿದ್ದಾರೆ.