ಡೆಕ್ಕನ್ ಚಾರ್ಜರ್ಸ್‌ಗೆ 4,800 ಕೋ.ರೂ. ನೀಡಬೇಕಾದ ಸಂಕಟದಲ್ಲಿ ಬಿಸಿಸಿಐ

ನವದೆಹಲಿ, ಜುಲೈ 18: ಇಂಡಿಯನ್ ಪ್ರೀಮಿಯರ್ ಲೀಗ್ ಫ್ರಾಂಚೈಸಿಗಳಲ್ಲಿ ಒಂದಾಗಿದ್ದ ಡೆಕ್ಕನ್ ಚಾರ್ಜರ್ಸ್‌ಗೆ ಬೋರ್ಡ್ ಆಫ್‌ ಕಂಟ್ರೋಲ್ ಫಾರ್ ಕ್ರಿಕೆಟ್ ಇನ್ ಇಂಡಿಯಾವು ಬರೋಬ್ಬರಿ 4,800 ಕೋ.ರೂ. ನೀಡಬೇಕಾದ ಸಂಕಟದಲ್ಲಿದೆ. ಡೆಕ್ಕನ್ ಚಾರ್ಜರ್ಸ್‌ ಅನ್ನು ಐಪಿಎಲ್‌ನಿಂದ ಕೊನೆಗೊಳಿಸಿದ ವಿವಾದಕ್ಕೆ ಸುಮಾರು 8 ವರ್ಷಗಳ ಬಳಿಕ ಜೀವ ಬಂದಿದೆ.

ಬಾಂಬೆ ಹೈಕೋರ್ಟ್‌ನಿಂದ ನೇಮಿತ ಏಕೈಕ ಮಧ್ಯಸ್ಥಗಾರ ಸಿಕೆ ಠಾಕೂರ್ ಅವರು ಡೆಕ್ಕನ್ ಚಾರ್ಜರ್ಸ್ ಅನ್ನು ಐಪಿಎಲ್‌ನಿಂದ ಕೊನೆಗಾಣಿಸಿದ್ದು ಅಕ್ರಮವೆಂದು ಪರಿಗಣಿಸಿದ್ದಾರೆ. ಹೀಗಾಗಿ ಬಿಸಿಸಿಐಯು ಡೆಕ್ಕನ್ ಕ್ರಾನಿಕಲ್ ಹೋಲ್ಡಿಂಗ್ಸ್ ಲಿಮಿಟೆಡ್‌ (ಡಿಸಿಎಚ್‌ಎಲ್)ಗೆ ಸೆಪ್ಟೆಂಬರ್ ಮುಕ್ತಾಯದ ಒಳಗೆ 4,800 ಕೋ.ರೂ. ನೀಡಬೇಕೆಂದು ಹೇಳಿದ್ದಾರೆ.

ಡೆಕ್ಕನ್ ಚಾರ್ಜರ್ ಜೊತೆಗಿನ ಒಪ್ಪಂದವನ್ನು ಬಿಸಿಸಿಐ 2012ರ ಸೆಪ್ಟೆಂಬರ್ 15ರಂದು ಕೊನೆಗೊಳಿಸಿತ್ತು. ಅದಾಗಿ ಒಂದು ವಾರದ ಬಳಿಕ ಎರಡೂ ಪಾರ್ಟಿಗಳು ಮಧ್ಯಸ್ಥಿಕೆಗೆ ಹೋಗಲು ಒಪ್ಪಿದ್ದವು. ಬಲ್ಲ ಮೂಲಗಳ ಪ್ರಕಾರ, ಬಿಸಿಸಿಐಗೆ ಇನ್ನೂ ಆದೇಶ ಪ್ರತಿ ಸಿಕ್ಕಿಲ್ಲ ಎನ್ನಲಾಗುತ್ತಿದೆ. ಈ ಆದೇಶದ ವಿರುದ್ಧ ಬಿಸಿಸಿಐ ಮತ್ತೆ ಕೋರ್ಟ್‌ಗೆ ಹೋಗುವ ಸಾಧ್ಯತೆಗಳಿವೆ.

2008ರಲ್ಲಿ ಐಪಿಎಲ್ ಉದ್ಘಾಟನಾ ಸೀಸನ್‌ನಲ್ಲಿ ಡೆಕ್ಕನ್ ಚಾರ್ಜರ್ಸ್ ಕೂಡ ಐಪಿಎಲ್‌ನ ಸಾಂಪ್ರದಾಯಿಕ 8 ತಂಡಗಳಲ್ಲಿ ಒಂದಾಗಿತ್ತು. ಮುಂದೆ ಕೂಡ ಚೆನ್ನೈ ಸೂಪರ್ ಕಿಂಗ್ಸ್ ಮತ್ತು ಡೆಕ್ಕನ್ ಚಾರ್ಜರ್ಸ್ ಬಲಿಷ್ಠ ತಂಡಗಳಲ್ಲಿ ಗುರುತಿಸಿಕೊಂಡಿದ್ದವು. 2009ರಲ್ಲಿ ಡೆಕ್ಕನ್ ಚಾರ್ಜರ್ಸ್ ಚಾಂಪಿಯನ್ಸ್ ಆಗಿತ್ತು ಕೂಡ. ಆ ಬಳಿಕ ಡೆಕ್ಕನ್ ಅನ್ನು ಐಪಿಎಲ್‌ನಿಂದ ತೆಗೆಯಲಾಯ್ತು.