ದ್ವಿತೀಯ ಏಕದಿನ: ಆಂಗ್ಲರ ಎದುರು ಭಾರತಕ್ಕೆ 86 ರನ್ ಹೀನಾಯ ಸೋಲು

ಲಂಡನ್, ಜುಲೈ 14: ಇಂಗ್ಲೆಂಡ್ ಪ್ರವಾಸದಲ್ಲಿರುವ ಭಾರತ ಎರಡನೇ ಏಕದಿನ ಪಂದ್ಯದಲ್ಲಿ ಆಂಗ್ಲರ ವಿರುದ್ಧ 86 ರನ್ ಸೋಲು ಕಂಡಿದೆ. ಇಂಗ್ಲೆಂಡ್ ಆಟಗಾರರ ಎಚ್ಚರಿಕೆಯ ಆಟ ಮತ್ತು ಭಾರತೀಯ ಬ್ಯಾಟ್ಸ್ಮನ್ ಗಳ ಬೇಜಾವಾಬ್ದಾರಿಯ ಆಟ ಟೀಮ್ ಇಂಡಿಯಾಕ್ಕೆ ಸೋಲಿನ ಬೆಲೆ ಕೇಳಿತು.

ಸ್ಕೋರ್ ಕಾರ್ಡ್

ಟಾಸ್ ಗೆದ್ದು ಬ್ಯಾಟಿಂಗ್ ಆಯ್ದುಕೊಂಡಿದ್ದ ಇಂಗ್ಲೆಂಡ್ ಕರಾರುವಕ್ಕಾದ ಆಟವಾಡಿತ್ತು. ಜೋ ರೂಟ್ (ಅಜೇಯ 113/116) ಮತ್ತು ನಾಯಕ ಇಯಾನ್ ಮಾರ್ಗನ್ (53/51) ಭರ್ಜರಿ ಬ್ಯಾಟಿಂಗ್ ನೆರವಿನಿಂದ ಇಂಗ್ಲೆಂಡ್ 50 ಓವರ್ ಮುಕ್ತಾಯಕ್ಕೆ 7 ವಿಕೆಟ್ ಕಳೆದು 322 ರನ್ ಪೇರಿಸಿ ಭಾರತಕ್ಕೆ ಗರಿಷ್ಠ 323 ರನ್ ಗುರಿ ನೀಡಿತ್ತು.

ಚೇಸಿಂಗ್ ಇಳಿದ ಭಾರತದಿಂದ ಯಾರೂ ಬ್ಯಾಟಿಂಗ್ ಕಾವಲು ನಿಲ್ಲಲಿಲ್ಲ. ಎಲ್ಲಾ ಬ್ಯಾಟ್ಸ್ಮನ್ ಗಳು ಬೇಗನೆ ವಿಕೆಟ್ ಒಪ್ಪಿಸಿ ತೆರಳಿದರು. ಹೀಗಾಗಿ ಭಾರತ 50 ಓವರ್ ಗೆ ಎಲ್ಲಾ ವಿಕೆಟ್ ಕಳೆದು 236 ರನ್ ಪೇರಿಸಿ ಆಂಗ್ಲರೆದುರು ತಲೆ ಬಾಗಿತು. ಮೊದಲ ಪಂದ್ಯದಲ್ಲಿ ಭರ್ಜರಿ ಬ್ಯಾಟಿಂಗ್ ಪ್ರದರ್ಶಿಸಿದ್ದ ಭಾರತ ಎರಡನೇ ಪಂದ್ಯದಲ್ಲಿ ಕಳಪೆ ಬ್ಯಾಟಿಂಗ್ ತೋರಿಸಿತು.

ರೋಹಿತ್ ಶರ್ಮಾ 15, ಶಿಖರ್ ಧವನ್ 36, ಕೆಎಲ್ ರಾಹುಲ್ 0 ರನ್ ಬಾರಿಸಿ ಔಟಾದರು. ತಂಡಕ್ಕಾಗಿ ಕೊಂಚ ರನ್ ಕೊಡುಗೆ ನೀಡಿದವರೆಂದರೆ ಧವನ್ ಸೇರಿಸಿ ಕೊಹ್ಲಿ (45/56), ಸುರೇಶ್ ರೈನಾ (46/63), ಧೋನಿ (37/59) ಮಾತ್ರ.

ಭಾರತ ಇನ್ನಿಂಗ್ಸ್ ವೇಳೆ ಪ್ಲಂಕೆಟ್ ಬೌಲಿಂಗ್ ಪಾರಮ್ಯ ಮೆರೆದರು. 10 ಓವರ್ ಎಸೆದ ಪ್ಲಂಕೆಟ್, 46 ರನ್ ನೀಡಿ 4 ವಿಕೆಟ್ ಕಬಳಿಸಿದರು.