ಸ್ಪಿನ್ ಮೋಡಿಗೆ ತತ್ತರಿಸಿದ ಲಂಕಾ; ಟೀಂ ಇಂಡಿಯಾಕ್ಕೆ ದಾಖಲೆ ಜಯ

ಉಮೇಶ್ ಯಾದವ್ ಸಾಥ್

ಶನಿವಾರದ ದಿನದಾಟ ಆರಂಭವಾದ ಕೆಲವೇ ನಿಮಿಷಗಳಲ್ಲಿ ವೇಗಿ ಮೊಹಮ್ಮದ್ ಶಮಿ ಅವರು, ಅಪಾಯಕಾರಿ ಬ್ಯಾಟ್ಸ್ ಮನ್ ಉಪುಲ್ ತರಂಗಾ (10) ಅವರನ್ನು ಬೇಗನೇ ಪೆವಿಲಿಯನ್ ಗೆ ಅಟ್ಟಿ ವಿಕೆಟ್ ಪತನಕ್ಕೆ ಶ್ರೀಕಾರ ಹಾಕಿದರು. ಆನಂತರ, ಮತ್ತೊಬ್ಬ ವೇಗಿ ಉಮೇಶ್ ಯಾದವ್, ಮೂರನೇ ಕ್ರಮಾಂಕದ ಗುಣ ತಿಲಕ (2) ಅವರನ್ನು ಕ್ರೀಸ್ ನಿಂದ ಆಚೆ ದೂಡಿದರು.

ಲಂಕನ್ನರಿಗೆ ಸ್ಪಿನ್ ತೊಂದರೆ

ರವೀಂದ್ರ ಜಡೇಜಾ ಅವರು, ಮಧ್ಯಮ ಕ್ರಮಾಂಕದ ಕುಸಲ್ ಮೆಂಡಿಸ್ ಹಾಗೂ ಏಂಜೆಲೋ ಮ್ಯಾಥ್ಯೂಸ್ (2) ಅವರನ್ನು ಪೆವಿಲಿಯನ್ ಗೆ ಕಳುಹಿಸಿದರು. ಆನಂತರ, ದಿನಾಂತ್ಯದ ಹೊತ್ತಿಗೆ ಮತ್ತೊಂದು ದಾಳಿ ನಡೆಸಿ, ಲಾಹಿರು ತಿರುಮಾನ್ನೆ (0) ವಿಕೆಟ್ ಪತನಗೊಳಿಸಿದರು.

ದಿಮುತ್ ಗೆ ನಿರಾಸೆ

ಈ ಹೊತ್ತಿನಲ್ಲಿ ತಮ್ಮ ಕೈಚಳಕ ತೋರಿದ ರವಿಚಂದ್ರನ್ ಅಶ್ವಿನ್, ಆರಂಭಿಕರಾಗಿ ಕಣಕ್ಕಿಳಿದು ಅರ್ಧಶತಕ ಸಿಡಿಸಿ ಶತಕದಂಚಿಗೆ ಬಂದಿದ್ದ ದಿಮುತ್ ಕರುಣಾರತ್ನೆ (97) ಅವರನ್ನು ಪೆವಿಲಿಯನ್ ಗೆ ಅಟ್ಟುವಲ್ಲಿ ಯಶಸ್ವಿಯಾದರು. ಆನಂತರ, ವಿಕೆಟ್ ಕೀಪರ್ ನಿರೋಷನ್ ಡಿಕ್ಲೆಲ್ಲಾ (67), ಕೆಳ ಕ್ರಮಾಂಕದ ಬ್ಯಾಟ್ಸ್ ಮನ್ ನುವಾನ್ ಪ್ರದೀಪ್ ಅವರನ್ನು ಕ್ರೀಸ್ ನಿಂದ ಆಚೆ ಕಳುಹಿಸಿದರು.

245ಕ್ಕೆ ಲಂಕಾ ಆಲೌಟ್

ಶ್ರೀಲಂಕಾ ಪರ, ದಿಲ್ರುವಾನ್ ಪೆರೇರಾ ಮಾತ್ರ ಅಜೇಯರಾಗಿ (21) ಉಳಿದರು. ಅಂತಿಮ ಕ್ರಮಾಂಕದ ಇಬ್ಬರು ಬ್ಯಾಟ್ಸ್ ಮನ್ ಗಳಾದ ಅಸೇಲಾ ಗುಣರತ್ನೆ, ನಾಯಕ ರಂಗನಾ ಹೆರಾತ್ ಅವರು ಗಾಯದ ಸಮಸ್ಯೆಯಿಂದಾಗಿ ಆಡಲು ಸಾಧ್ಯವಾಗಿಲ್ಲ. ಒಟ್ಟಾರೆಯಾಗಿ, ಲಂಕಾ ತಂಡ, 245 ರನ್ ಗಳಿಗೆ ತನ್ನ ಇನಿಂಗ್ಸ್ ಮುಕ್ತಾಯಗೊಳಿಸಬೇಕಾಯಿತು.

ಸ್ಕೋರ್ ನ ಚುಟುಕು ಮಾಹಿತಿ

ಭಾರತ ಮೊದಲ ಇನಿಂಗ್ಸ್ 600
ಶ್ರೀಲಂಕಾ ಮೊದಲ ಇನಿಂಗ್ಸ್ 291
ಭಾರತ ದ್ವಿತೀಯ ಇನಿಂಗ್ಸ್ 240ಕ್ಕೆ 3 (ಡಿ)
ಶ್ರೀಲಂಕಾ ದ್ವಿತೀಯ ಇನಿಂಗ್ಸ್ 245
(ದಿಮುತ್ ಕರುಣಾರತ್ನೆ 97, ನಿರೋಶನ್ ಡಿಕ್ಲೆಲ್ಲಾ 67; ಅಶ್ವಿನ್ 65ಕ್ಕೆ 3, ಜಡೇಜಾ 71ಕ್ಕೆ 3).
ಪಂದ್ಯಶ್ರೇಷ್ಠ: ಶಿಖರ್ ಧವನ್ (ಭಾರತ)

ಕೊಹ್ಲಿ, ಹೆರಾತ್ ಹೇಳಿದ್ದೇನು?

ಪಂದ್ಯದ ನಂತರ ತಮ್ಮ ಪ್ರತಿಕ್ರಿಯೆ ನೀಡಿದ ಕೊಹ್ಲಿ, ತಂಡದ ಎಲ್ಲಾ ಹುಡುಗರೂ ಉತ್ತಮವಾಗಿ ಆಡಿದರು. ಈ ಗೆಲುವು ಖುಷಿಕೊಟ್ಟಿದೆ. ನಿಜ ಹೇಳಬೇಕೆಂದರೆ, ಲಂಕಾ ನೆಲಕ್ಕೆ ನಾವಿನ್ನೂ ಹೊಂದಿಕೊಂಡಿಲ್ಲ. ಎರಡನೇ ಪಂದ್ಯದಲ್ಲಿ ವೇಗಿಗಳನ್ನು ಹೇಗೆ ಉಪಯೋಗಿಸಬೇಕೆಂಬುದರ ಬಗ್ಗೆ ನಾವು ಹೆಚ್ಚು ಗಮನ ಹರಿಸಿದ್ದೇವೆ ಎಂದಿದ್ದಾರೆ.
ಇನ್ನು, ಎದುರಾಳಿ ತಂಡದ ನಾಯಕ ರಂಗಾನಾ ಹೆರಾತ್ ಮಾತನಾಡಿ, ''ಇತ್ತೀಚೆಗೆ ಕೈಬೆರಳು ಮುರಿದು ಗಾಯಗೊಂಡಿದ್ದೆ. ಇಂದು ಆಡುವಾಗ ಅದೇ ಬೆರಳಿಗೆ ಮತ್ತೆ ಹೊಡೆತ ಬಿದ್ದಿದ್ದರಿಂದ ನಾನು ದ್ವಿತೀಯ ಇನಿಂಗ್ಸ್ ನಲ್ಲಿ ಆಡಲಾಗಲಿಲ್ಲ. ಭಾರತ ತಂಡದ ಆಟ ಉತ್ತಮವಾಗಿತ್ತು. ಅರ್ಹ ಗೆಲುವು ಅವರದ್ದು'' ಎಂದರು.

ಅಂಕಿ-ಅಂಶಗಳಲ್ಲಿ ಸಾಧನೆ

ಮೊದಲೇ ತಿಳಿಸಿದಂತೆ, ಇದು ವಿದೇಶದಲ್ಲಿ ನಡೆದ ಟೆಸ್ಟ್ ಪಂದ್ಯವೊಂದರಲ್ಲಿ ಭಾರತ ಸಾಧಿಸಿದ ಅತಿ ದೊಡ್ಡ ಜಯ. ಈ ಹಿಂದೆ, ಇಂಗ್ಲೆಂಡ್ ವಿರುದ್ಧ 1986ರಲ್ಲಿ ಗಳಿಸಿದ್ದ 279 ರನ್ ಜಯವೇ ಈವರೆಗಿನ ದಾಖಲೆಯಾಗಿತ್ತು. ಹೀಗೆ, ವಿದೇಶಿ ನೆಲದಲ್ಲಿ ದೊಡ್ಡ ಜಯ ಸಾಧಿಸಿದ ಇತರ ಪಂದ್ಯಗಳೆಂದರೆ, 2015ರಲ್ಲಿ ಶ್ರೀಲಂಕಾ ವಿರುದ್ಧ 278 ರನ್ ಗಳ ಜಯ, ನ್ಯೂಜಿಲೆಂಡ್ ವಿರುದ್ಧ 1968ರಲ್ಲಿ 272 ರನ್ ಗಳ ಜಯ.

ಪಾಕ್ ವಿರುದ್ಧ ನಂತರ ಇದೇ ದೊಡ್ಡ ಪರಾಭವ

ಅತ್ತ ಶ್ರೀಲಂಕಾ ತಂಡಕ್ಕೂ ತನ್ನ ಟೆಸ್ಟ್ ಇತಿಹಾಸದಲ್ಲಿ ಭಾರೀ ದೊಡ್ಡ ಸೋಲು. ಈ ಹಿಂದೆ, 1994ರಲ್ಲಿ ಪಾಕಿಸ್ತಾನದ ವಿರುದ್ಧ 301 ರನ್ ಗಳ ಸೋಲು ಗಳಿಸಿದ್ದು ಬಿಟ್ಟರೆ, ಆಗಿನಿಂದ ಈವರೆಗೆ ಅದು ಇಷ್ಟು ದೊಡ್ಡ ಸೋಲು ಕಂಡಿರಲಿಲ್ಲ.

ನಾಲ್ಕು ವಿಕೆಟ್ ಗಳಿಸಿದ ಅಶ್ವಿನ್

ಅಂದಹಾಗೆ, ತಮ್ಮ ವೃತ್ತಿಜೀವನದಲ್ಲಿ 50ನೇ ಟೆಸ್ಟ್ ಪಂದ್ಯವನ್ನಾಡಿದ ಅಶ್ವಿನ್, ಈ ಪಂದ್ಯದಲ್ಲಿ ಎರಡೂ ಇನಿಂಗ್ಸ್ ಗಳಿಂದ 4 ವಿಕೆಟ್ ಗಳಿಸಿದ್ದಾರೆ. ಅವರ ಈ ಸ್ಮರಣೀಯ ಪಂದ್ಯದ ಹಿನ್ನೆಲೆಯಲ್ಲಿ ಪಂದ್ಯದ ನಂತರ ನಡೆದ ಪ್ರಶಸ್ತಿ ಪ್ರದಾನ ಸಮಾರಂಭದಲ್ಲಿ ಅವರಿಗೆ ವಿಶೇಷ ಉಡುಗೊರೆ ನೀಡಿ ಗೌರವಿಸಲಾಯಿತು.

ಸೆಹ್ವಾಗ್ ನಂತರದ ಎರಡನೇ ಸ್ಥಾನ

ಇನ್ನು, ಶಿಖರ್ ಧವನ್ ಅವರ ಸಾಧನೆಯನ್ನು ಮರೆಯುವ ಹಾಗಿಲ್ಲ. ಭಾರತದ ಮೊದಲ ಇನಿಂಗ್ಸ್ ನಲ್ಲಿ ಶಿಖರ್ ಧವನ್ ಅವರು ಮಧ್ಯಾಹ್ನ ಭೋಜನ ಹಾಗೂ ಸಂಜೆ ಚಹಾ ವಿರಾಮದ ನಡುವಿನ ಅಂತರದಲ್ಲಿ (ಲಂಚ್-ಟೀ ಸೆಷನ್) 126 ರನ್ ದಾಖಲಿಸಿದ್ದು, ಯಾವುದೇ ಸೆಷನ್ ನಲ್ಲಿ ಭಾರತೀಯ ಬ್ಯಾಟ್ಸ್ ಮನ್ ದಾಖಲಿಸಿದ 2ನೇ ಗರಿಷ್ಠ ಮೊತ್ತವಾಗಿದೆ. 2009ರಲ್ಲಿ ಬ್ರಬೌರ್ನ್ ನಲ್ಲಿ ನಡೆದಿದ್ದ ಶ್ರೀಲಂಕಾ ವಿರುದ್ಧದ ಟೆಸ್ಟ್ ಪಂದ್ಯದಲ್ಲಿ 133 ರನ್ ಗಳಿಸಿ ಈ ಪಟ್ಟಿಯಲ್ಲಿ ಮೊದಲ ಸ್ಥಾನದಲ್ಲಿದ್ದಾರೆ.