ಖಂಡಿತಾ ಇದು ಬಲು ದೊಡ್ಡ ಗೆಲುವು
ಸೋಮವಾರ (ಅಕ್ಟೋಬರ್ 4) ಚೆನ್ನೈ ಸೂಪರ್ ಕಿಂಗ್ಸ್ ಮತ್ತು ಡೆಲ್ಲಿ ಕ್ಯಾಪಿಟಲ್ಸ್ ಮುಖಾಮುಖಿಯ ಬಳಿಕ ಪಂದ್ಯದ ಗೆಲುವಿನ ಬಗ್ಗೆ ಡಿಸಿ ನಾಯಕ ರಿಷಭ್ ಪಂತ್ ಮಾತನಾಡಿದ್ದಾರೆ. "ಖಂಡಿತವಾಗಿಯೂ ಇದೊಂದು ದೊಡ್ಡ ಗೆಲುವು. ಹುಟ್ಟು ಹಬ್ಬದ ಉಡುಗೊರೆ ಕೆಟ್ಟದಾಗಿ ಇರಲಿಲ್ಲ. ಆದರೆ ಪಂದ್ಯದ ಕೊನೆ ನಮ್ಮ ಪಾಲಿಗೆ ಸ್ವಲ್ಪ ತ್ರಾಸದಾಯಕ ಅನ್ನಿಸಿತು. ಆದರೆ ಒಮ್ಮೆ ಪಂದ್ಯ ಗೆದ್ದ ಬಳಿಕ ಎಲ್ಲವೂ ಸರಿಯೆನ್ನಬಹುದು," ಎಂದು ಪಂತ್ ಹೇಳಿದ್ದಾರೆ. ಅಕ್ಟೋಬರ್ 24ರಂದು ಪಂತ್ 24ರ ಹರೆಯಕ್ಕೆ ಕಾಲಿರಿಸಿದ್ದಾರೆ. ಪಂದ್ಯದಲ್ಲಿ ಪಂತ್ 15 ರನ್ ಬಾರಿಸಿ ರವೀಂದ್ರ ಜಡೇಜಾ ಓವರ್ನಲ್ಲಿ ಮೊಯೀನ್ ಅಲಿಗೆ ಕ್ಯಾಚ್ ನೀಡಿ ನಿರ್ಗಮಿಸಿದ್ದರು. ಪಂತ್ ಗಳಿಸಿದ ಈ 15 ರನ್ನಲ್ಲಿ 1 ಫೋರ್, 1 ಸಿಕ್ಸರ್ ಸೇರಿತ್ತು.
ಶಾ, ಧವನ್ರಿಂದ ಡೀಸೆಂಟ್ ಸ್ಟಾರ್ಟ್
"ಪೃಥ್ವಿ ಶಾ ಅವರು ನಮಗೆ ಡಿಸೆಂಟ್ ಸ್ಟಾರ್ಟ್ ನೀಡಿದರು. ಸಿಎಸ್ಕೆ ಮಾಡಿದ್ದು ಕಡಿಮೆ ಟೋಟಲ್ ಆಗಿದ್ದರಿಂದ ನಾವದನ್ನು ಚೇಸ್ ಮಾಡಬಹುದು ಎಂದು ಯಾವಾಗಲೂ ಅಂದುಕೊಂಡಿದ್ದೆವು. ಶಿಖರ್ ಧವನ್ ಕೂಡ ನಮಗೆ ಉತ್ತಮ ಕೊಡುಗೆ ನೀಡಿದರು. ನಿಜಕ್ಕೂ ಇದೊಂದು ದೊಡ್ಡ ಗೆಲುವು. ಈ ಗೆಲುವಿನ ಮೂಲಕ ನಾವು ಅಂಕಪಟ್ಟಿಯಲ್ಲಿ ಅಗ್ರ ಸ್ಥಾನಕ್ಕೇರಲು ಮತ್ತು ಮೊದಲ ಸ್ಥಾನದಲ್ಲೇ ಲೀಗ್ ಹಂತವನ್ನು ಮುಗಿಸಲು ಅವಕಾಶವಾಗಿದೆ," ಎಂದು ಪಂತ್ ವಿವರಿಸಿದ್ದಾರೆ. ಆರಂಭಿಕ ಬ್ಯಾಟ್ಸ್ಮನ್ಗಳಾದ ಪೃಥ್ವಿ ಶಾ 18 ರನ್, 3 ಬೌಂಡರಿಗಳ ಕೊಡುಗೆ ನೀಡಿದರೆ, ಶಿಖರ್ ಧವನ್ 39 ರನ್, 3 ಬೌಂಡರಿ, 2 ಸಿಕ್ಸರ್ ಬಾರಿಸಿದ್ದರು. ಅಂತಿಮವಾಗಿ ಶಿಮ್ರನ್ ಹೆಟ್ಮೈಯರ್ ಅಜೇಯ 28 ರನ್, ಕಾಗಿಸೋ ರಬಾಡ ಅಜೇಯ 4 ರನ್ ಬಾರಿಸಿ ಪಂದ್ಯ ಮುಗಿಸಿದರು.
ಸಿಎಸ್ಕೆ ಮತ್ತು ಡಿಸಿ ಪಂದ್ಯ ಸ್ಕೋರ್
ಟಾಸ್ ಸೋತು ಬ್ಯಾಟಿಂಗ್ಗೆ ಇಳಿಸಲ್ಪಟ್ಟ ಚೆನ್ನೈ ಸೂಪರ್ ಕಿಂಗ್ಸ್, ಋತುರಾಜ್ ಗಾಯಕವಾಡ್ 13, ಫಾಫ್ ಡು ಪ್ಲೆಸಿಸ್ 10, ರಾಬಿನ್ ಉತ್ತಪ್ಪ 19, ಮೊಯೀನ್ ಅಲಿ 5, ಅಂಬಟಿ ರಾಯುಡು 55, ಎಂಎಸ್ ಧೋನಿ 18, ರವೀಂದ್ರ ಜಡೇಜಾ 1 ರನ್ನೊಂದಿಗೆ 20 ಓವರ್ಗೆ 5 ವಿಕೆಟ್ ಕಳೆದು 136 ರನ್ ಗಳಿಸಿತು. ಪೃಥ್ವಿ ಶಾ 18, ಶಿಖರ್ ಧವನ್ 39, ಶ್ರೇಯಸ್ ಅಯ್ಯರ್ 2, ರಿಷಭ್ ಪಂತ್ 15, ರಿಪಾಲ್ ಪಟೇಲ್ 18, ಶಿಮ್ರಾನ್ ಹೆಟ್ಮೈಯರ್ 28, ಅಕ್ಸರ್ ಪಟೇಲ್ 5, ರವಿಚಂದ್ರನ್ ಅಶ್ವಿನ್ 2, ಕಾಗಿಸೊ ರಬಾಡಾ 4 ರನ್ನೊಂದಿಗೆ 19.4 ಓವರ್ಗೆ 7 ವಿಕೆಟ್ ಕಳೆದು 139 ರನ್ ಗಳಿಸಿತು.