ಆತ ಈಗ 3D ಅಲ್ಲ 4D ಆಟಗಾರ: ಭಾರತೀಯ ಕ್ರಿಕೆಟಿಗನ ಬಗ್ಗೆ ಹೊಗಳಿಕೆಯ ಸುರಿಮಳೆಗೈದ ಕಿರಣ್ ಮೋರೆ

ಪಾಂಡ್ಯ ಬಗ್ಗೆ ಮೋರೆ ಮೆಚ್ಚುಗೆ

ಐಪಿಎಲ್ 2022ರ ಆವೃತ್ತಿಯಲ್ಲಿ ಹಾರ್ದಿಕ್ ಪಾಂಡ್ಯ ಪ್ರದರ್ಶನದ ಬಗ್ಗೆ ಮಾತನಾಡಿರುವ ಕಿರಣ್ ಮೋರೆ ಮೆಚ್ಚುಗೆಯ ಮಾತುಗಳನ್ನಾಡಿದ್ದಾರೆ. ಈಗ ಹಾರ್ದಿಕ್ ಪಾಂಡ್ಯ 3D ಕ್ರಿಕೆಟರ್ ಸ್ಥಾನದಿಂದ 4D ಸ್ಥಾನಕ್ಕೆ ಬೆಳವಣಿಗೆ ಕಂಡಿದ್ದಾರೆ ಎಂದು ಮೆಚ್ಚುಗೆ ವ್ಯಕ್ತಪಡಿಸಿದ್ದಾರೆ. ಎಸ್‌ಜಿ ಪಾಡ್‌ಕಾಸ್ಟ್‌ ಜೊತೆಗೆ ಮಾತನಾಡಿದ ಸಂದರ್ಭದಲ್ಲಿ 59ರ ಹರೆಯದ ಕಿರಣ್ ಮೋರೆ ಈ ಮಾತುಗಳನ್ನಾಡಿದ್ದಾರೆ.

ಪಾಂಡ್ಯ ಆರಂಭಿಕ ದಿನಗಳನ್ನು ನೆನೆದ ಕಿರಣ್ ಮೋರೆ

ಈ ಸಂದರ್ಭದಲ್ಲಿ ಕಿರಣ್ ಮೋರೆ ಪಾಂಡ್ಯ ಸೋದರರ ಬಾಲ್ಯದ ಕ್ರಿಕೆಟ್ ಬದುಕಿನ ದಿನಗಳನ್ನು ಸ್ಮರಿಸಿಕೊಂಡಿದ್ದಾರೆ. "ಆತನಿಗೆ ಕ್ರಿಕೆಟ್ ಆಡುವ ಹುಮ್ಮಸ್ಸಿತ್ತು. ಹಾರ್ದಿಕ್ ಸೋದರ ಕೃನಾಲ್ ಪಾಂಡ್ಯ ನನ್ನ ಕ್ರಿಕೆಟ್ ಅಕಾಡೆಮಿಗೆ ಸೇರಿಕೊಂಡಿದ್ದ. ಆ ಸಂದರ್ಭದಲ್ಲಿ ಹಾರ್ದಿಕ್ ಮೈದಾನದ ಸುತ್ತಲೂ ಓಡಾಡುತ್ತಾ ಇದ್ದ. ನೆಟ್ಸ್‌ನ ಹಿಂದೆ ಓಡುತ್ತಾ, ಕ್ಯಾಚ್ ಹಿಡಿಯುತ್ತಾ ಇರುತ್ತಿದ್ದ. ಆ ಸಂದರ್ಭದಲ್ಲಿ ನಾನು ಆತನನ್ನು ಕೂಡ ನೆಟ್ಸ್‌ಗೆ ಕರೆದುಕೊಂಡು ಬಾ ಎಂದಿದ್ದೆ. ಅಂದು ಆತನಲ್ಲಿನ ಕ್ರಿಕೆಟ್ ಬಗೆಗಿನ ಹಸಿವನ್ನು ಕಂಡಿದ್ದೆ" ಎಂದಿದ್ದಾರೆ ಕಿರಣ್ ಮೋರೆ.

ಆತ ಈಗ 4D ಆಟಗಾರ

"ನನ್ನ ಪಾಲಿಗೆ ಹಾರ್ದಿಕ್ ಇನ್ನೂ ಸಣ್ಣ ಹುಡುಗ. ಆತನಿಂದ ಇನ್ನೂ ಅದ್ಭುತ ಪ್ರದರ್ಶನವನ್ನು ನಾನು ನಿರೀಕ್ಷಿಸುತ್ತಿದ್ದೇನೆ. ಈಗ ಆತನನ್ನು ನಾನು ನಾಲ್ಕು ಆಯಾಮದ ಆಟಗಾರ ಎಂದು ಹೇಳಲು ಬಯಸುತ್ತೇನೆ. ಇದಕ್ಕೂ ಮುನ್ನ ಆತ ಬೌಲಿಂಗ್, ಬ್ಯಾಟಿಂಗ್ ಹಾಗೂ ಫಿಲ್ಡಿಂಗ್ ಮಾಡುವ ಮೂಲಕ ಮೂರು ಆಯಾಮದ ಆಟಗಾರನಾಗಿದ್ದ. ಈಗ ಆತ ನಾಯಕತ್ವದ ಜವಾಬ್ಧಾರಿಯನ್ನು ಕೂಡ ವಹಿಸಿಕೊಂಡಿದ್ದಾನೆ" ಎಂದಿದ್ದಾರೆ ಕಿರಣ್ ಮೋರೆ.

Siraj ಐಪಿಎಲ್ ಬಳಿಕ Rohit Sharma ಬಗ್ಗೆ ಹೇಳಿದ್ದೇನು | Oneindia Kannada

ನಾಯಕನಾಗಿ, ಆಟಗಾರನಾಗಿ ಮಿಂಚಿದ ಹಾರ್ದಿಕ್

ಈ ಬಾರಿಯ ಐಪಿಎಲ್‌ನಲ್ಲಿ ಚೊಚ್ಚಲ ಬಾರಿಗೆ ಐಪಿಎಲ್ ತಂಡದ ನಾಯಕತ್ವ ವಹಿಸಿಕೊಂಡ ಹಾರ್ದಿಕ್ ಪಾಂಡ್ಯ ತಮ್ಮ ಜವಾಬ್ಧಾರಿಯನ್ನು ಅಚ್ಚುಕಟ್ಟಾಗಿ ನಿರ್ವಹಿಸಿದ್ದಾರೆ. 15 ಪಂದ್ಯಗಳನ್ನಾಡಿರುವ ಹಾರ್ದಿಕ್ ಪಾಂಡ್ಯ 487 ರನ್‌ಗಳನ್ನು ಗಳಿಸಿ ಮಿಂಚಿದ್ದಾರೆ. 44.27ರ ಸರಾಸರಿಯಲ್ಲಿ ಬ್ಯಾಟಿಂಗ್ ನಡೆಸಿರುವ ಹಾರ್ದಿಕ್ ಪಾಂಡ್ಯ ನಾಲ್ಕು ಅರ್ಧ ಶತಕಗಳನ್ನು ಸಿಡಿಸಿದ್ದಾರೆ. ಇನ್ನು ಈ ಬಾರಿಯ ಟೂರ್ನಿಯಲ್ಲಿ ಒಟ್ಟು 9 ವಿಕೆಟ್ ಸಂಪಾದಿಸಿರುವ ಹಾರ್ದಿಕ್ ಫೈನಲ್ ಪಂದ್ಯದಲ್ಲಿ 3 ವಿಕೆಟ್ ಸಂಪಾದಿಸಿ ಗೆಲುವಿನಲ್ಲಿ ಮಹತ್ವದ ಪಾತ್ರವಹಿಸಿದರು.