'ರಾಹುಲ್ ದ್ರಾವಿಡ್ ಎದುರು ನಾನೊಬ್ಬ 11ರ ಹರೆಯದ ಮಗು ಅನ್ನಿಸುತ್ತಿತ್ತು'

ಬೆಂಗಳೂರು, ಏಪ್ರಿಲ್ 17: ಟೀಮ್ ಇಂಡಿಯಾದ ಶಕ್ತಿಯಾಗಿದ್ದವರು ಕರ್ನಾಟಕದ ಆಟಗಾರ, ಗ್ರೇಟ್ ವಾಲ್ ಖ್ಯಾತಿಯ ರಾಹುಲ್ ದ್ರಾವಿಡ್ ಅವರು. ದ್ರಾವಿಡ್ ಇಂಗ್ಲೆಂಡ್‌ನ ಕೌಂಟಿ ಕ್ರಿಕೆಟ್‌ನಲ್ಲಿ ಕೆಂಟ್ ಪರ ಆಡಿದ್ದಾರೆ. ದ್ರಾವಿಡ್, ಕೆಂಟ್‌ನಲ್ಲಿ ಆಡುವಾಗ ಇಂಗ್ಲೆಂಡ್ ಮಾಜಿ ಆಫ್‌ ಸ್ಪಿನ್ನರ್ ಗ್ರೇಮ್ ಸ್ವಾನ್ ಅವರಿಗೆ ತಾನೊಬ್ಬ ಪುಟ್ಟ ಮಗು ಅನ್ನಿಸುತ್ತಿತ್ತಂತೆ.

ನನ್ನನ್ನು ನಾನು ಮಗುವಿನಂತೆ ಭಾವಿಸುವಂತೆ ರಾಹುಲ್ ದ್ರಾವಿಡ್ ಮಾಡುತ್ತಿದ್ದರು ಎಂದು ಸ್ವತಃ ಗ್ರೇಮ್ ಸ್ವಾನ್ ಅವರೇ ಹೇಳಿಕೊಂಡಿದ್ದಾರೆ. ಇಂಗ್ಲೆಂಡ್ ಕೌಂಟಿ ತಂಡದಲ್ಲಿ ಆಡುವಾಗ ಜಾನ್ ರೈಟ್ ತರಬೇತಿಯಡಿಯಲ್ಲಿ ದ್ರಾವಿಡ್ ಇದ್ದರು.

ಕೌಂಟಿ ಕ್ರಿಕೆಟ್‌ ಆಡುವಾಗಿನ ಕ್ಷಣವನ್ನು ಸ್ಮರಿಸಿಕೊಂಡ ಸ್ವಾನ್, 'ಆ ದಿನ ರಾಹುಲ್ ದ್ರಾವಿಡ್ ನನ್ನ ಪಾಲಿಗೆ ಬಲುದೊಡ್ಡ ಆಟಗಾರನಾಗಿದ್ದರು. ಅವರು ಕೆಂಟ್ ಪರ ಆಡುವಾಗ ನಾನು ಬೌಲಿಂಗ್ ಮಾಡಿದೆ. ಆಗೆಲ್ಲ ನನಗೆ ದ್ರಾವಿಡ್ ಒಬ್ಬರು ಅದ್ಭುತ ಆಟಗಾರ ಅನ್ನಿಸುತ್ತಿತ್ತು,' ಎಂದು ಸ್ಕೈ ಸ್ಪೋರ್ಟ್ಸ್ ಜೊತೆ ಮಾತನಾಡುತ್ತ ಹೇಳಿಕೊಂಡರು.

'ಕೌಂಟಿ ಪಂದ್ಯದಲ್ಲಿ ರಾಹುಲ್ ಸುಲಭವಾಗಿ ಔಟೇ ಆಗುತ್ತಿರಲಿಲ್ಲ. ನಾನು ದ್ರಾವಿಡ್ ಅವರಂತ ಆಟಗಾರರನ್ನು ನೋಡಿಯೇ ಇರಲಿಲ್ಲ. ಅವರೊಬ್ಬರು ವಿಶ್ವಶ್ರೇಷ್ಠ ಆಟಗಾರ. ಅವರೆದುರು ನಾನೊಬ್ಬ 11ರ ಹರೆಯದ ಸ್ಪಿನ್ನರ್ ಎನಿಸುತ್ತಿತ್ತು,' ಎಂದು ಸ್ವಾನ್ ವಿವರಿಸಿದರು.

'ಒಂದು ಬಾರಿ ನಾನು ದ್ರಾವಿಡ್ ಅವರನ್ನು ಔಟ್ ಮಾಡಿದ್ದೆ. ಅದು ನಿಜಕ್ಕೂ ಗ್ರೇಟ್ ಬಾಲ್. ಯಾವತ್ತೂ ಔಟ್ ಆಗದ ದ್ರಾವಿಡ್ ಆವತ್ತು ಅಚಾನಕ್ ಔಟಾಗಿದ್ದರು,' ಎಂದು ಗ್ರೇಮ್ ಸ್ವಾನ್ ಪಂದ್ಯದ ಕ್ಷಣ ಸ್ಮರಿಸಿಕೊಂಡರು. ಅಂದ್ಹಾಗೆ ಇಂಗ್ಲೆಂಡ್ ಕೌಂಟಿಯಲ್ಲಿ ನಾಟಿಂಗ್‌ಹ್ಯಾಮ್‌ಶೈರ್ ಪರ ಆಡಿದ್ದರು.