ಒಂದೇ ಓವರ್‌ನಲ್ಲಿ 6 ಸಿಕ್ಸರ್ ಚಚ್ಚಿದ ಶ್ರೀಲಂಕಾದ ತಿಸರ ಪೆರೆರ: ವಿಡಿಯೋ

ಪೆರೆರ ಸ್ಫೋಟಕ ಬ್ಯಾಟಿಂಗ್‌

ಪನಗೋಡ ಟೌನ್‌ನಲ್ಲಿ ಭಾನುವಾರ ನಡೆದ, ಲಿಸ್ಟ್‌ ಎ ಪಂದ್ಯವೊಂದರಲ್ಲಿ ಶ್ರೀಲಂಕಾ ಆರ್ಮಿ ತಂಡದ ತಿಸರ ಪೆರೆರ ಅವರು ಬ್ಲೂಮ್‌ಫೀಲ್ಡ್‌ ಕ್ರಿಕೆಟ್ ತಂಡದ ವಿರುದ್ಧ ಓವರ್‌ನಲ್ಲಿ 6 ಸಿಕ್ಸಸ್ ಚಚ್ಚಿದ್ದಾರೆ. ಪಂದ್ಯದಲ್ಲಿ ಕೇವಲ 13 ಎಸೆತಗಳನ್ನು ಎದುರಿಸಿದ ಪೆರೆರ ಅಜೇಯ 52 ರನ್‌ ಬಾರಿಸಿದ್ದರು. ಲಂಕಾ ಪರ ಪೆರೆರ, 6 ಟೆಸ್ಟ್‌, 166 ಏಕದಿನ ಪಂದ್ಯಗಳು ಮತ್ತು 64 ಟಿ20ಐ ಪಂದ್ಯಗಳನ್ನು ಆಡಿದ್ದಾರೆ.

ಕೌಶಲ್ಯ ವೀರರತ್ನೆ ಮೊದಲಿಗ

ಭಾನುವಾರದ ಪಂದ್ಯದಲ್ಲಿ ಪೆರೆರ ಒಟ್ಟು 8 ಸಿಕ್ಸರ್‌ಗಳನ್ನು ಬಾರಿಸಿದ್ದರು. ಇದರಲ್ಲಿ ಒಂದೇ ಓವರ್‌ನಲ್ಲಿ 6 ಸಿಕ್ಸರ್ ದಾಖಲೆ ಕೂಡ ಸೇರಿತ್ತು. ಅಷ್ಟೇ ಅಲ್ಲ, ಶ್ರೀಲಂಕಾದ ಲಿಸ್ಟ್‌ 'ಎ' ಕ್ರಿಕೆಟ್‌ನಲ್ಲಿ ವೇಗವಾಗಿ ಅರ್ಧ ಶತಕ ಬಾರಿಸಿದ ಎರಡನೇ ಬ್ಯಾಟ್ಸ್‌ಮನ್‌ ಆಗಿಯೂ ಪೆರೆರ ಗುರುತಿಸಿಕೊಂಡಿದ್ದಾರೆ. 2015ರಲ್ಲಿ ಲಂಕಾ ಆಲ್ ರೌಂಡರ್ ಕೌಶಲ್ಯ ವೀರರತ್ನೆ ಅವರು ಕೇವಲ 12 ಎಸೆತಗಳಲ್ಲಿ ಅರ್ಧ ಶತಕ ಸಿಡಿಸಿದ್ದರು.

ಸಿಕ್ಸ್ ಸಿಕ್ಸರ್ ದಾಖಲೆ ಶೂರರು

5ನೇ ಕ್ರಮಾಂಕದಲ್ಲಿ ಬ್ಯಾಟಿಂಗ್‌ಗೆ ಬಂದಿದ್ದ ಪೆರೆರ, ಸ್ಪಿನ್ನರ್ ದಿಲ್ಹಾನ್ ಕೂರೆ ಎಸೆತಗಳಿಗೆ ಸಿಕ್ಸರ್‌ಗಳನ್ನು ಬಾರಿಸುತ್ತಾ ಸಾಗಿ ದಾಖಲೆ ನಿರ್ಮಿಸಿದ್ದಾರೆ. ಇದರೊಂದಿಗೆ ವಿಶ್ವದಲ್ಲಿ ಒಂದೇ ಓವರ್‌ನಲ್ಲಿ 6 ಸಿಕ್ಸ್ ಚಚ್ಚಿದ 9ನೇ ಬ್ಯಾಟ್ಸ್‌ಮನ್‌ ಆಗಿ ಪೆರೆರ ದಾಖಲೆ ಪಟ್ಟಿ ಸೇರಿದ್ದಾರೆ. ಇದಕ್ಕೂ ಮುನ್ನ ವೆಸ್ಟ್‌ ಇಂಡೀಸ್‌ನ ಗ್ಯಾರಿ ಸೋಬರ್ಸ್, ಭಾರತದ ರವಿ ಶಾಸ್ತ್ರಿ, ದಕ್ಷಿಣ ಆಫ್ರಿಕಾದ ಹರ್ಷೆಲ್ ಗಿಬ್ಸ್, ಭಾರತದ ಯುವರಾಜ್ ಸಿಂಗ್, ಇಂಗ್ಲೆಂಡ್‌ನ ರಾಸ್ ವೈಟ್ಲಿ, ಅಫ್ಘಾನಿಸ್ತಾನದ ಅಝರತುಲ್ಲ ಝಝಾಯ್, ನ್ಯೂಜಿಲೆಂಡ್‌ನ ಲಿಯೋ ಕಾರ್ಟರ್ ಮತ್ತು ವೆಸ್ಟ್ ಇಂಡೀಸ್ ನ ಕೀರನ್ ಪೊಲಾರ್ಡ್ ಈ ದಾಖಲೆಗಾಗಿ ಗುರುತಿಸಿಕೊಂಡಿದ್ದರು.