ಅಣ್ಣ ತಮ್ಮ ಇಬ್ಬರೂ ಹಾಕಿ ಆಟಗಾರರು
ನಿಕ್ಕಿನ್ ತಿಮ್ಮಯ್ಯ ಮಾತ್ರವಲ್ಲ ಅವರ ಸೋದರ ನಿತಿನ್ ತಿಮ್ಮಯ್ಯ ಕೂಡ ಹಾಕಿ ಕ್ರೀಡಾಪಟು. ಈ ಇಬ್ಬರಿಗೂ ಹಾಕಿ ಕೇವಲ ಕ್ರೀಡೆಯಾಲ್ಲ. ಕುಟುಂಬದ ಭಾಗವಾಗಿದ್ದ ಹಾಕಿ ರಕ್ತದಲ್ಲೇ ಬಂದಿತ್ತು. ಬಾಲ್ಯದಿಂದಲೇ ಜೊತೆಯಾಗಿ ಆಡಿಕೊಂಡು ಬಂದಿದ್ದ ಈ ಆಟಗಾರರು ಭರವಸೆ ಮುಡಿಸಿದ್ದರು. ಅದರಲ್ಲೂ ನಿಕ್ಕಿನ್ ತಮ್ಮ ಕೌಶಲ್ಯದಿಂದಾಗಿ ಭಾರತ ತಂಡದ ಒರವಾಗಿಯೂ ಆಡುವ ಅವಕಾಶ ಗಳಿಸಿಕೊಂಡಿದ್ದಾರೆ.
ಬೆಂಗಳೂರಿನಲ್ಲಿ ವಿದ್ಯಾಭ್ಯಾಸ, ಅಥ್ಲೀಟ್ ಆಗಿ ಮಿಂಚಿದ ನಿಕ್ಕಿನ್
ನಿಕ್ಕಿನ್ ತಿಮ್ಮಯ್ಯ ತಮ್ಮ ಪದವಿಯನ್ನು ಬೆಂಗಳೂರಿನ ಸೈಂಟ್ ಜೋಸೆಫ್ ಕಾಲೇಜಿನಲ್ಲಿ ಪಡೆದರು. ಹಾಕಿ ಆಟಗಾರನಾಗಿ ಸಾಧನೆ ಮಾಡುವ ಮೊದಲು ನಿಕ್ಕಿನ್ ಅಥ್ಲೀಟ್ ಆಗಿ ಮಿಂಚಿದ್ದಾರೆ. 400 ಮೀಟರ್ ಜೂನಿಯರ್ ಓಪನ್ ಸ್ಪರ್ಧೆಯಲ್ಲಿ ರಾಷ್ಟ್ರಮಟ್ಟದಲ್ಲಿ ಸ್ಪರ್ಧಿಸಿ ಪದಕ ಗೆದೊದ್ದಾರೆ ನಿಕ್ಕಿನ್. ನಿಕ್ಕಿನ್ ಅವರ ತಂದೆ ಚೆಂಡಾಂಡ ಅಯ್ಯಣ್ಣ ಆರ್ಮಿ ಸರ್ವಿಸ್ ಕಾಪ್ಸ್ ತಂಡದ ಆಟಗಾರರಾಗಿದ್ದರು.
ಒಲಿಂಪಿಕ್ಸ್ನಲ್ಲಿ ಭಾರತದ ಪರ ಆಡಿರುವ ನಿಕ್ಕಿನ್
ಹಾಕಿಯಲ್ಲಿ ಕರ್ನಾಟಕ ತಂಡವನ್ನು ಪ್ರತಿನಿಧಿಸಿರುವ ನಿಕ್ಕಿನ್ ನಂತರ ಭಾರತ ತಂಡದಲ್ಲಿಯೂ ಸ್ಥಾನವನ್ನು ಪಡೆದುಕೊಂಡಿದ್ದಾರೆ. 2016ರಲ್ಲಿ ಭಾರತ ತಂಡವನ್ನು ರಿಯೋ ಒಲಿಂಪಿಕ್ಸ್ ಟೂರ್ನಿಯಲ್ಲಿ ಪ್ರತಿನಿಧಿಸಿದ್ದಾರೆ. ಇದಕ್ಕೂ ಮುನ್ನ 2014ರಲ್ಲಿ ಏಷ್ಯನ್ ಗೇಮ್ಸ್ ಹಾಗೂ ಕಾಮನ್ವೆಲ್ತ್ ಗೇಮ್ಸ್ನಲ್ಲಿಯೂ ಪ್ರತಿನಿಧಿಸಿದ್ದಾರೆ. 2018ರಲ್ಲಿ ಹಾಕಿ ಕ್ರೀಡೆಗೆ ನೀಡಿದ ಕೊಡುಗೆಯನ್ನು ಪರಿಗಣಿಸಿ ಕರ್ನಾಟಕ ರಾಜ್ಯ ಸರ್ಕಾರ ನಿಕ್ಕಿನ್ ತಿಮ್ಮಯ್ಯ ಅವರಿಗೆ ಏಕಲವ್ಯ ಪ್ರಶಸ್ತಿ ನೀಡಿ ಗೌರವಿಸಿದೆ.