ಚಾಹಲ್ ಓವರ್ನಲ್ಲಿ ಟ್ರಿಪಲ್ ಸಿಕ್ಸ್!
ಬೆಂಗಳೂರು ಪಂದ್ಯದಲ್ಲಿ ಯುವರಾಜ್ 12 ಎಸೆತಗಳಿಗೆ 23 ರನ್ ಬಾರಿಸಿದ್ದರು. ಇದರಲ್ಲಿ ಮೂರು ಸಿಕ್ಸ್ಗಳು ಸೇರಿದ್ದವು. ಈ ಮೂರೂ ಸಿಕ್ಸ್ಗಳು ಸಿಡಿದಿದ್ದು ಚಾಹಲ್ ಓವರ್ನಲ್ಲೇ. 14ನೇ ಓವರ್ ಎಸೆಯಲು ಬಂದಿದ್ದ ಚಾಹಲ್ರ ಪ್ರತಿ ಎಸೆತಕ್ಕೂ ಯುವಿ ಸಿಕ್ಸ್ ಬಾರಿಸುತ್ತ ಹೋಗಿದ್ದರು. ಆದರೆ 4ನೇ ಸಿಕ್ಸ್ ಪ್ರಯತ್ನದ ವೇಳೆ (13.4ನೇ ಓವರ್) ಯುವಿ, ಮೊಹಮ್ಮದ್ ಸಿರಾಜ್ಗೆ ಕ್ಯಾಚಿತ್ತು ನಿರ್ಗಮಿಸಿದರು.
ಸ್ಟುವರ್ಟ್ ಬ್ರಾಡ್ ನೆನಪಾದರು
'ಯಾವಾಗ ಅವರು (ಯುವಿ) ಮೂರು ಸಿಕ್ಸ್ಗಳನ್ನು ಬಾರಿಸಿದರೋ, ಆಗ ನನಗೆ ನಾನು ಸ್ಟುವರ್ಟ್ ಬ್ರಾಡ್ ಅನ್ನಿಸಿತು. ನಿಮಗೆಲ್ಲರಿಗೂ ಗೊತ್ತು; ಯುವಿ ಒಬ್ಬ ಬ್ಯಾಟಿಂಗ್ ದಂತಕತೆ. ಹೀಗಾಗಿ ಯುವಿ ನನ್ನ ಎಸೆತಕ್ಕೆ ಸಾಲು ಸಾಲಾಗಿ ಸಿಕ್ಸ್ ಬಾರಿಸುವಾಗ ನನಗೆ ನಾನೇ ಸಮಾಧಾನಿಸಿಕೊಂಡೆ' ಎಂದು ಚಾಹಲ್ ಹೇಳಿದರು.
ವೈಡರ್ ಗೂಗ್ಲಿ ಎಸೆತ
ಯುವರಾಜ್ ಬೆನ್ನುಬೆನ್ನಿಗೆ ಸಿಕ್ಸ್ ಬಾರಿಸುವುದನ್ನು ನೋಡಿದಾಗ ಅಳುಕೆನಿಸಿದ್ದು ನಿಜ. ಆದರೆ ಬೌಲಿಂಗ್ನಲ್ಲಿ ಬದಲಾವಣೆ ಮಾಡಿದರೆ ಯುವರಾಜ್ ವಿಕೆಟ್ ಪಡೆಯುವ ಸಾಧ್ಯತೆಯಿದೆ ಎಂದು ಅನಿಸಿತು. ಯಾಕೆಂದರೆ ನನ್ನ ಬೆಸ್ಟ್ ಬೌಲಿಂಗ್ಗೆಲ್ಲ ಯುವಿ ಸಿಕ್ಸ್ ಚಚ್ಚಿದ್ದರು. ಕೊನೆಗೆ ನಾನು ವೈಡರ್ ಗೂಗ್ಲಿ ಎಸೆದೆ' ಎಂದು ಪಂದ್ಯದ ಬಳಿಕ ಸ್ಪಿನ್ನರ್ ಚಾಹಲ್ ಸುದ್ದಿಗಾರರೊಂದಿಗೆ ಮಾತನಾಡುತ್ತ ವಿವರಿಸಿದರು.
ಬ್ರಾಡ್ ಬಲಿಪಶುವಾದ ಕತೆ
19 ಸೆಪ್ಟೆಂಬರ್ 2007ರಲ್ಲಿ ದಕ್ಷಿಣ ಆಫ್ರಿಕಾದ ಡರ್ಬನ್ನಲ್ಲಿರುವ ಕಿಂಗ್ಸ್ಮೀಡ್ ಸ್ಟೇಡಿಯಂನಲ್ಲಿ ಐಸಿಸಿ ವಿಶ್ವ ಟಿ20 ಟೂರ್ನಿಯ 21ನೇ ಪಂದ್ಯದಲ್ಲಿ ಭಾರತ ಮತ್ತು ಇಂಗ್ಲೆಂಡ್ ತಂಡಗಳು ಮುಖಾಮುಖಿಯಾಗಿದ್ದವು. ಈ ವೇಳೆ ಯುವಿ ಕೇವಲ 16 ಎಸೆತಗಳಿಗೆ 58 ರನ್ ಚಚ್ಚಿದ್ದರು. ಈ ರನ್ನಲ್ಲಿ ಸ್ಟುವರ್ಟ್ ಬ್ರಾಡ್ ಓವರ್ನಲ್ಲಿ ಯುವಿ ಸಿಡಿಸಿದ 6 ಸಿಕ್ಸ್ಗಳೂ ಸೇರಿದ್ದವು. ಅಂದ್ಹಾಗೆ, ಪಂದ್ಯದಲ್ಲಿ ಟಾಸ್ ಗೆದ್ದು ಬ್ಯಾಟಿಂಗ್ ಆಯ್ದ ಭಾರತ 20 ಓವರ್ಗೆ 4 ವಿಕೆಟ್ ಕಳೆದು 218 ರನ್ ಬಾರಿಸಿತ್ತು. ಇಂಗ್ಲೆಂಡ್ 20 ಓವರ್ಗೆ 6 ವಿಕೆಟ್ ಕಳೆದು 200 ರನ್ ಪೇರಿಸಿ ಶರಣಾಗಿತ್ತು.