ಐಪಿಎಲ್‌ನಲ್ಲಿ ದಾಖಲೆಗಳ ದಾಖಲೆ ಬರೆದ ಬೇರ್ಸ್ಟೊವ್-ವಾರ್ನರ್ ಜೋಡಿ!

ಐಪಿಎಲ್ 2ನೇ, 3ನೇ ಶತಕ

ಪಂದ್ಯದಲ್ಲಿ ಕೇವಲ 56 ಎಸೆತಗಳಿಗೆ 114 ರನ್ ಸಿಡಿಸಿದ ಜಾನಿ ಬೇರ್ಸ್ಟೊವ್ ಮತ್ತು 55 ಎಸೆತಗಳಿಗೆ ಭರ್ತಿ 100 ರನ್ ಗಳಿಸಿದ ಡೇವಿಡ್ ವಾರ್ನರ್ 2019ರ ಐಪಿಎಲ್‌ನಲ್ಲಿ ಕ್ರಮವಾಗಿ 2ನೇ ಮತ್ತು 3ನೇ ಶತಕ ದಾಖಲೆಗೆ ಕಾರಣರಾದರು. 12ನೇ ಸೀಸನ್‌ನಲ್ಲಿ ಮೊದಲ ಶತಕ ಬಾರಿಸಿದ್ದು ರಾಜಸ್ಥಾನ್ ರಾಯಲ್ಸ್‌ನ ಸಂಜು ಸ್ಯಾಮ್ಸನ್.

ಅತ್ಯಧಿಕ ಜೊತೆಯಾಟ

ಐಪಿಎಲ್‌ನಲ್ಲಿ ಅತ್ಯಧಿಕ ಜೊತೆಯಾಟಕ್ಕಾಗಿ ಬೇರ್ಸ್ಟೊವ್-ವಾರ್ನರ್ ಜೋಡಿ ದಾಖಲೆ ಬರೆದಿದೆ. ಇಬ್ಬರೂ 16.2 ಓವರ್‌ ವರೆಗೆ ವಿಕೆಟ್ ಕಾವಲು ಕಾದರಲ್ಲದೆ ಒಟ್ಟು 185 ರನ್‌ಗಳನ್ನು ಜೊತೆಯಾಟದ ಮೂಲಕ ತಂಡಕ್ಕೆ ನೀಡಿದರು. ಅಲ್ಲದೆ ಒಂದೇ ಐಪಿಎಲ್ ಇನ್ನಿಂಗ್ಸ್‌ನಲ್ಲಿ ತಲಾ ಎರಡು ಶತಕಗಳನ್ನು ಬಾರಿಸಿದ ಮೊದಲ ಆಟಗಾರರಾಗಿ ಬೇರ್ಸ್ಟೊವ್, ವಾರ್ನರ್ ಗುರುತಿಸಿಕೊಂಡರು.

ಬೇರ್ಸ್ಟೊವ್ ಚೊಚ್ಚಲ ಐಪಿಎಲ್ ಶತಕ

ಐಪಿಎಲ್‌ನಲ್ಲಿ ಜಾನಿ ಬೇರ್ಸ್ಟೊವ್ ಬಾರಿಸಿದ ಮೊದಲ ಶತಕವಿದು. ಒಟ್ಟಾರೆ ಟಿ20 ಮಾದರಿಯಲ್ಲಿ ಬೇರ್ಸ್ಟೊವ್ ಬಾರಿಸಿದ ಎರಡನೇ ಸೆಂಚುರಿಯಿದು. ಇದಕ್ಕೂ ಮುನ್ನ ಬೇರ್ಸ್ಟೊವ್ 2014ರಲ್ಲಿ ಯಾರ್ಕ್ ಶೈರ್ ಪ್ರತಿನಿಧಿಸಿದ್ದಾಗ ಶತಕ ಬಾರಿಸಿದ್ದರು.

ಬೌಂಡರಿ ದಾಖಲೆ

ಜಾನಿ ಬಾರಿಸಿದ 114 ರನ್‌ಗಳಲ್ಲಿ 90 ರನ್‌ಗಳು ಬರೀ ಬೌಂಡರಿಗಳಿಂದಲೇ ಬಂದವು. 12 ಫೋರ್, 7 ಸಿಕ್ಸರ್‌ಗಳು ಬೇರ್ಸ್ಟೊವ್ ಬ್ಯಾಟ್‌ನಿಂದ ಸಿಡಿದಿದ್ದವು. ಅಂದರೆ ಗಳಿಸಿದ ರನ್‌ನಲ್ಲಿ ಶೇ. 78.95 ರನ್‌ಗಳು ಬೌಂಡರಿಂದಲೇ ಬಂದಿದ್ದವು. ಬೌಂಡರಿ ಮೂಲಕ ಅತ್ಯಧಿಕ ರನ್ ಪೇರಿಸಿದ ದಾಖಲೆ ಹಿಂದೆ ವಾರ್ನರ್ ಹೆಸರಿನಲ್ಲಿತ್ತು. 2017ರಲ್ಲಿ ಹೈದರಾಬಾದ್ ಪ್ರತಿನಿಧಿಸಿದ್ದ ವಾರ್ನರ್ ಕೆಕೆಆರ್ ವಿರುದ್ಧ 88 ರನ್‌ಗಳನ್ನು ಬರೀ ಬೌಂಡರಿಗಳಿಂದಲೇ ಗಳಿಸಿ ದಾಖಲೆ ಬರೆದಿದ್ದರು.

ಅತ್ಯಧಿಕತ ತಂಡದ ಮೊತ್ತ

2019ರ ಐಪಿಎಲ್‌ನಲ್ಲಿ ತಂಡವೊಂದು ಗಳಿಸಿದ ಅತ್ಯಧಿಕ ರನ್‌ ಆಗಿ ಸದ್ಯಕ್ಕೆ ಹೈದರಾಬಾದ್ ಗಳಿಸಿದ 231 ರನ್ ಗುರುತಿಸಿಕೊಂಡಿದೆ. ಅಲ್ಲದೆ ಡೇವಿಡ್ ವಾರ್ನರ್ ಈ ಪಂದ್ಯದಲ್ಲಿ ಐಪಿಎಲ್ 4ನೇ ಶತಕ ಪೂರೈಸಿಕೊಂಡರು. ಐಪಿಎಲ್ ಹೆಚ್ಚಿನ ಶತಕ ದಾಖಲೆಗಾಗಿ ವಾರ್ನರ್ ವಿರಾಟ್ ಕೊಹ್ಲಿ, ಶೇನ್ ವ್ಯಾಟ್ಸನ್ ಜೊತೆ ಸ್ಥಾನ ಹಂಚಿಕೊಂಡಿದ್ದಾರೆ. ಐಪಿಎಲ್ ಹೆಚ್ಚಿನ ಶತಕಕ್ಕಾಗಿ ಮೊದಲ ಸ್ಥಾನದಲ್ಲಿರುವ ಕ್ರಿಸ್‌ಗೇಲ್ 6 ಸೆಂಚುರಿಗಳನ್ನು ಬಾರಿಸಿದ್ದಾರೆ.