ವೆಸ್ಟ್ ಇಂಡೀಸ್, ಆಸ್ಟ್ರೇಲಿಯಾ ರೀತಿ ಕೊಹ್ಲಿ ಪಡೆ ಮಿಂಚುವುದು ಅನುಮಾನ ಎಂದ ಭಾರತದ ಮಾಜಿ ಕ್ರಿಕೆಟಿಗ!

ವೆಸ್ಟ್ ಇಂಡೀಸ್, ಆಸ್ಟ್ರೇಲಿಯಾ ರೀತಿ ಕೊಹ್ಲಿ ಪಡೆ ಪ್ರಾಬಲ್ಯ ಸಾಧಿಸುವುದು ಅನುಮಾನ

ಕೊಹ್ಲಿ ಪಡೆಯ ಪ್ರದರ್ಶನದ ಬಗ್ಗೆ ಮಾತನಾಡಿರುವ ಸುನಿಲ್ ಗವಾಸ್ಕರ್ ಈಗಿನ ಟೀಮ್ ಇಂಡಿಯಾ ತಂಡ 1970 ಹಾಗೂ 1980ರ ವೇಳೆಯ ವೆಸ್ಟ್ ಇಂಡೀಸ್ ತಂಡದ ರೀತಿ ಹಾಗೂ 2000 ವೇಳೆಯ ಆಸ್ಟ್ರೇಲಿಯಾ ರೀತಿ ಉತ್ತಮ ಪ್ರದರ್ಶನ ನೀಡುವುದು ಅನುಮಾನ ಎಂದಿದ್ದಾರೆ. 'ವೆಸ್ಟ್ ಇಂಡೀಸ್ ತಂಡ 5 ಪಂದ್ಯಗಳ ಪೈಕಿ 5 ಪಂದ್ಯಗಳನ್ನೂ ಗೆಲ್ಲುತ್ತಿತ್ತು, ಆಸ್ಟ್ರೇಲಿಯಾ 5 ಪಂದ್ಯಗಳ ಪೈಕಿ 4 ಪಂದ್ಯಗಳಲ್ಲಿ ಜಯ ಸಾಧಿಸಿ ಪ್ರಾಬಲ್ಯವನ್ನು ಸಾಧಿಸುತ್ತಿತ್ತು. ಆದರೆ ಈಗಿನ ಟೀಮ್ ಇಂಡಿಯಾ ತಂಡ ಆ ಎರಡೂ ತಂಡಗಳ ರೀತಿ ಪ್ರಾಬಲ್ಯ ಸಾಧಿಸುವುದು ಅನುಮಾನ' ಎಂದು ಸುನೀಲ್ ಗವಾಸ್ಕರ್ ಅಭಿಪ್ರಾಯಪಟ್ಟಿದ್ದಾರೆ.

ತಂಡದ 11 ಆಟಗಾರರು ಮಿಂಚುವುದು ಅಸಾಧ್ಯ

ಇನ್ನೂ ಮುಂದುವರಿದು ಮಾತನಾಡಿರುವ ಸುನಿಲ್ ಗವಾಸ್ಕರ್ ಪಂದ್ಯವೊಂದರಲ್ಲಿ ಎಲ್ಲಾ 11 ಆಟಗಾರರೂ ಉತ್ತಮ ಪ್ರದರ್ಶನ ನೀಡುವುದು ಅಸಾಧ್ಯ. ಆದರೆ ಪಂದ್ಯವೊಂದರಲ್ಲಿ 4 ಆಟಗಾರರು ( ಇಬ್ಬರು ಬ್ಯಾಟ್ಸ್‌ಮನ್‌ ಹಾಗೂ ಇಬ್ಬರು ಬೌಲರ್‌ಗಳು ) ಉತ್ತಮ ಪ್ರದರ್ಶನ ನೀಡಿದರೆ ಸಾಕು ಆ ತಂಡ ಹೆಚ್ಚಿನ ಗೆಲುವನ್ನು ಸಾಧಿಸಬಹುದು. ಇದನ್ನೇ ಖಚಿತವಾಗಿಯೂ ಪ್ರಸ್ತುತ ಟೀಮ್ ಇಂಡಿಯಾ ತಂಡ ಮಾಡುತ್ತಿದೆ ಎಂದು ಸುನೀಲ್ ಗವಾಸ್ಕರ್ ಹೇಳಿದ್ದಾರೆ.

ಇಂಗ್ಲೆಂಡ್ ವಿರುದ್ಧ ಸರಣಿ ಗೆಲುವು ಸಾಧಿಸಲಿದೆ ಟೀಮ್ ಇಂಡಿಯಾ

ಹಾಗೆಯೇ ಭಾರತ ಮತ್ತು ಇಂಗ್ಲೆಂಡ್ ನಡುವಿನ 5 ಪಂದ್ಯಗಳ ಟೆಸ್ಟ್ ಸರಣಿ ಕುರಿತು ಮಾತನಾಡಿರುವ ಸುನಿಲ್ ಗವಾಸ್ಕರ್ ಟೀಮ್ ಇಂಡಿಯಾ ಖಚಿತವಾಗಿ 4-0 ಅಂತರದಿಂದ ಸರಣಿಯನ್ನು ವಶಪಡಿಸಿ ಕೊಳ್ಳಲಿದೆ ಎಂದು ವಿಶ್ವಾಸ ವ್ಯಕ್ತಪಡಿಸಿದ್ದಾರೆ. ನ್ಯೂಜಿಲೆಂಡ್ ವಿರುದ್ಧದ ವಿಶ್ವ ಟೆಸ್ಟ್ ಚಾಂಪಿಯನ್‍ಶಿಪ್ ಫೈನಲ್ ಪಂದ್ಯದ ಬಳಿಕ 6 ವಾರಗಳ ಕಾಲಾವಕಾಶ ಭಾರತೀಯರಿಗೆ ಸಿಗಲಿದ್ದು ಇಂಗ್ಲೆಂಡ್ ವಿರುದ್ಧದ ಸರಣಿಯಲ್ಲಿ ಉತ್ತಮ ಪ್ರದರ್ಶನ ನೀಡಲಿದ್ದಾರೆ ಎಂದು ಗವಾಸ್ಕರ್ ತಿಳಿಸಿದ್ದಾರೆ.