ಆ್ಯಷಸ್ಗಿಂತಲೂ ದೊಡ್ಡ ಸರಣಿ
ಭಾರತ ಮತ್ತು ಪಾಕಿಸ್ತಾನ ದ್ವಿಪಕ್ಷೀಯ ಸರಣಿಯ ಬಗ್ಗೆ ಮಾತನಾಡಿರುವ ಶಾಹಿದ್ ಅಫ್ರಿದಿ, ಇತ್ತಂಡಗಳ ಕ್ರಿಕೆಟ್ ಕದನ ಮತ್ತೆ ಶುರುವಾಗಬೇಕೆಂಬ ಆಶಯ ವ್ಯಕ್ತಪಡಿಸಿದ್ದಾರೆ. ಅಷ್ಟೇ ಅಲ್ಲ; ಭಾರತ-ಪಾಕ್ ದ್ವಿಪಕ್ಷೀಯ ಸರಣಿ ಇಂಗ್ಲೆಂಡ್ ಮತ್ತು ಆಸ್ಟ್ರೇಲಿಯಾ ನಡುವಿನ ಆ್ಯಷನ್ ಸರಣಿಗಿಂತಲೂ ದೊಡ್ಡ ಮಟ್ಟದ ಕುತೂಹಲಕಾರಿ ಸರಣಿ ಎನಿಸಲಿದೆ ಎಂದೂ ಅಫ್ರಿದಿ ಹೇಳಿದ್ದಾರೆ.
ಕ್ರೀಡೆಯಲ್ಲಿ ರಾಜಕೀಯದ ಅಡ್ಡಗಾಲು ಬೇಡ
'ನನ್ನ ಪ್ರಕಾರ, ಒಂದು ವೇಳೆ ಭಾರತ ಮತ್ತು ಪಾಕಿಸ್ತಾನ ಸರಣಿಯಲ್ಲಿ ಪಾಲ್ಗೊಂಡರೆ ಆ ಸರಣಿ ಆ್ಯಷಸ್ ಸರಣಿಗಿಂತಲೂ ದೊಡ್ಡದೆನಿಸಲಿದೆ. ಆದರೆ ಇದು ಸಾಧ್ಯವಾಗದಿರುವುದು ವಿಷಾದಕರ. ಕ್ರಿಕೆಟ್ ಪ್ರೇಮಿಗಳು ಪ್ರೀತಿಸುವ ಕ್ರೀಡೆಯ ಮಧ್ಯೆ ನಾವು ರಾಜಕೀಯವನ್ನು ಅಡ್ಡ ತರುತ್ತಿದ್ದೇವೆ. ಅದಾಗಬಾರದು. ರಾಜಕೀಯದ ಅಡ್ಡಗಾಲಿಲ್ಲದೆ ಕ್ರಿಕೆಟ್ ಮುಂದುವರೆಯುವಂತಾಗಬೇಕು,' ಎಂದು ಅಫ್ರಿದಿ ಕೋರಿಕೊಂಡಿದ್ದಾರೆ.
ಭಾರತ-ಪಾಕ್ ಕದನ ಚಂದವೆಂದ ಯುವಿ
ಅಫ್ರಿದಿ ಮಾತಿಗೆ ಸಿಕ್ಸರ್ ಕಿಂಗ್ ಯುವರಾಜ್ ಕೂಡ ತಲೆದೂಗಿದ್ದಾರೆ. ಭಾರತ-ಪಾಕ್ ನಡುವಿನ ದ್ವಿಪಕ್ಷೀಯ ಸರಣಿ ಪುನರಾರಂಭಿಸುವುದು ತಮ್ಮ ಕೈಲಿಲ್ಲ. ಆದರೆ ಕ್ರೀಡೆಯ ವಿಚಾರದಲ್ಲಿ ಪಾಕಿಸ್ತಾನ-ಭಾರತ ಉತ್ತಮ ಪ್ರತಿಸ್ಪರ್ಧಿಗಳು. ಎರಡೂ ದೇಶಗಳಲ್ಲೂ ಕ್ರೀಡಾ ಪ್ರೇಮಿಗಳಿದ್ದಾರೆ. ಹೀಗಾಗಿ ಭಾರತ-ಪಾಕ್ ಪಂದ್ಯಗಳು ಶುರುವಾದರೆ ನೋಡಲು ಚಂದ ಎಂದು ಯುವಿ ಹೇಳಿದ್ದಾರೆ.
ಆ ದಿನಗಳನ್ನು ನೆನಪಿಸಿಕೊಳ್ಳಬಲ್ಲೆ
'ಪಾಕಿಸ್ತಾನ ವಿರುದ್ಧ 2004, 2006 ಮತ್ತು 2008ರ ದ್ವಿಪಕ್ಷೀಯ ಸರಣಿಯಲ್ಲಿ ಆಡಿದ್ದನ್ನು ನಾನು ನೆನಪಿಸಿಕೊಳ್ಳಬಲ್ಲೆ. ಕ್ರೀಡೆಯ ಬಗೆಗಿನ ಪ್ರೀತಿಗಾಗಿ ನಾವು ಆ ದಿನಗಳಲ್ಲಿ ಕ್ರಿಕೆಟ್ ಆಡುತ್ತಿದ್ದೆವು. ಯಾವ ದೇಶದ ವಿರುದ್ಧ ಆಡಬೇಕನ್ನೋದನ್ನು ನಾವು ಆರಿಸಲಾಗದು. ಆದರೆ ಭಾರತ vs ಪಾಕಿಸ್ತಾನ ಕ್ರಿಕೆಟ್, ಕ್ರೀಡಾ ವಿಚಾರದಲ್ಲಿ ತುಂಬಾ ಒಳ್ಳೇದು,' ಎಂದು ಯುವಿ ತನ್ನ ಮನದ ಮಾತನಾಡಿದ್ದಾರೆ.