ಪೃಥ್ವಿ ಶಾ ಅವರನ್ನು ವೀರೇಂದ್ರ ಸೆಹ್ವಾಗ್ ಗೆ ಹೋಲಿಸಬೇಡಿ: ಸೌರವ್ ಗಂಗೂಲಿ

ಪೃಥ್ವಿ ವಿಶ್ವದಲ್ಲೆಡೆ ಆಡಲಿ

ಕೋಲ್ಕತ್ತಾದಲ್ಲಿ ನಡೆದ 'ಟಾಟಾ ಸ್ಟೀಲ್ 25k ಮ್ಯಾರಥಾನ್ ರನ್' ಗೆ ಚಾಲನೆ ನೀಡುತ್ತ ಸುದ್ದಿಗಾರರೊಂದಿಗೆ ಮಾತನಾಡಿದ ಗಂಗೂಲಿ, 'ಪೃಥ್ವಿ ಶಾ ಅವರನ್ನು ಸೆಹ್ವಾಗ್ ಹೋಲಿಸಬೇಡಿ. ಮೊದಲು ಪೃಥ್ವಿ ವಿಶ್ವದೆಲ್ಲೆಡೆ ಹೋಗಿ ಕ್ರಿಕೆಟ್ ಆಡುವಂತಾಗಲಿ, ಅಲ್ಲೆಲ್ಲಾ ಕಡೆ ಹೆಚ್ಚು ರನ್ ಗಳಿಸುವಂತಾಗಲಿ' ಎಂದರು.

ಹೋಲಿಕೆ ಸರಿಯಲ್ಲ

'ಸೆಹ್ವಾಗ್ ಒಬ್ಬರು ಅದ್ಭುತ ಪ್ರತಿಭೆ. ಅವರಿಗೆ ಪೃಥ್ವಿಯನ್ನು ಹೋಲಿಸಬಾರದು. ಪೃಥ್ವಿಯನ್ನು ವಿಶ್ವದೆಲ್ಲೆಡೆ ಆಡಲು ಬಿಡಿ. ಆಸ್ಟ್ರೇಲಿಯಾ, ದಕ್ಷಿಣ ಆಫ್ರಿಕಾ ಮತ್ತು ಇಂಗ್ಲೆಂಡ್ ನಲ್ಲಿ ಪೃಥ್ವಿ ಒಳ್ಳೆಯ ರನ್ ಗಳಿಸಬಲ್ಲರೆಂದು ನನಗೆ ನಂಬಿಕೆಯಿದೆ. ಆದರೆ ಪೃಥ್ವಿಯನ್ನು ಸೆಹ್ವಾಗ್ ಗೆ ಹೋಲಿಸುವುದು ಮಾತ್ರ ಸರಿಯಲ್ಲ' ಎಂದು ದಾದಾ ತಿಳಿಸಿದರು.

ಪೃಥ್ವಿಗದು ಅವಿಸ್ಮರಣೀಯ ಕ್ಷಣ

'ಪಾದಾರ್ಪಣೆ ಟೆಸ್ಟ್ ನಲ್ಲಿ ಶತಕ ಸಿಡಿಸಿದ ಪೃಥ್ವಿಗದು ಒಂದು ಅಪೂರ್ವ ಕ್ಷಣವಾಗಿರಬಹುದು. ರಣಜಿ, ದುಲೀಪ್ ಟ್ರೋಫಿ ಮತ್ತು ಅಂತಾರಾಷ್ಟ್ರೀಯ ಟೆಸ್ಟ್ ಹೀಗೆ ಈ ಮೂರೂ ಚೊಚ್ಚಲ ಪಂದ್ಯದಲ್ಲೂ ಪೃಥ್ವಿ ಶತಕ ಬಾರಿಸಿದ್ದಾರೆ. ಹೀಗಾಗಿ ಪೃಥ್ವಿ ಪಾಲಿಗೆ ಇದು (ಅಕ್ಟೋಬರ್ 4) ಅವಿಸ್ಮರಣೀಯ ಕ್ಷಣ' ಎಂದು 'ಬಂಗಾಳ ಹುಲಿ' ಅಭಿಪ್ರಾಯಿಸಿದರು.

ಚೊಚ್ಚಲ ಶತಕ ಬಾರಿಸಿದ್ದ ದಾದಾ

'ನಾನು ಚೊಚ್ಚಲ ರಣಜಿ ಟ್ರೋಫಿಯಲ್ಲಿ ಶತಕ ಬಾರಿಸಿಲ್ಲ. ಆದರೆ ಮೊದಲ ದುಲೀಪ್ ಟ್ರೋಫಿ ಮತ್ತು ಅಂತಾರಾಷ್ಟ್ರೀಯ ಮೊದಲ ಟೆಸ್ಟ್ ನಲ್ಲಿ ಶತಕ ಬಾರಿಸಿದ್ದೆ' ಎಂದು ಗಂಗೂಲಿ ಸ್ಮರಿಸಿಕೊಂಡರು. 1996ರಲ್ಲಿ ಇಂಗ್ಲೆಂಡ್ ನ ಲಾರ್ಡ್ಸ್ ನಲ್ಲಿ ನಡೆದಿದ್ದ ಇಂಗ್ಲೆಂಡ್ ವಿರುದ್ಧದ ಪಾದಾರ್ಪಣೆ ಪಂದ್ಯದಲ್ಲಿ 'ಗಾಡ್ ಆಫ್ ಆಫ್ ಸೈಡ್' ಖ್ಯಾತಿಯ ಗಂಗೂಲಿ 131 ರನ್ ಸಿಡಿಸಿದ್ದರು.