ನನ್ನ ಗುರಿ ದೊಡ್ಡದಿದೆ
ಪಂದ್ಯದ ಬಳಿಕ ಮಾತನಾಡಿದ ದಿನೇಶ್ ಕಾರ್ತಿಕ್ "ನಾನು ದೊಡ್ಡ ಗುರಿಯನ್ನು ಇಟ್ಟುಕೊಂಡಿದ್ದೇನೆ. ಅದಕ್ಕಾಗಿ ನಾನು ನಿಜಕ್ಕೂ ಬಹಳ ಬಹಳ ಶ್ರಮಪಡುತ್ತಿದ್ದೇನೆ. ಕೆಲ ಬಾರಿ ಜನರು ಅದನ್ನು ನಂಬುವುದಿಲ್ಲ. ನನ್ನ ಗುದಿ ನನ್ನ ದೇಶಕ್ಕಾಗಿ ವಿಶೇಷ ಸಾಧನೆಯನ್ನು ಮಾಡುವುದಾಗಿದೆ. ಇದು ಆ ಪ್ರಯಾಣದ ಭಾಗವಾಗಿದ್ದು ಅದಕ್ಕಾಗಿ ನಾನು ಎಲ್ಲವನ್ನೂ ಮಾಡುತ್ತಿದ್ದೇನೆ. ಹಾಗಿದ್ದಾಗ ನಾನು ಟೀಮ್ ಇಂಡಿಯಾದ ಭಾಗವಾಗಬಹುದು. ಇದು ಆ ನಿಟ್ಟಿನಲ್ಲಿ ನನ್ನ ಹೆಜ್ಜೆ" ಎಂದು ದಿನೇಶ್ ಕಾರ್ತಿಕ್ ತನ್ನ ಗುರಿಯನ್ನು ಸ್ಪಷ್ಟವಾಗಿ ಸಾರಿ ಹೇಳಿದ್ದಾರೆ.
ಫಿನಿಷರ್ ಆಗಿ ಕಾರ್ತಿಕ್ ಆರ್ಭಟ
ಈ ಬಾರಿಯ ಐಪಿಎಲ್ ಆವೃತ್ತಿಯಲ್ಲಿ ಆರ್ಸಿಬಿ ಪರವಾಗಿ ದಿನೇಶ್ ಕಾರ್ತಿಕ್ ಫಿನಿಷರ್ ಜವಾಬ್ಧಾರಿಯನ್ನು ವಹಿಸಿಕೊಂಡಿದ್ದು ಆ ಜವಾಬ್ಧಾರಿಯನ್ನು ಅತ್ಯಂತ ಅದ್ಭುತವಾಗಿ ನಿರ್ವಹಿಸುತ್ತಿದ್ದಾರೆ. ಕಳೆದ ಆರು ಇನ್ನಿಂಗ್ಸ್ಗಳಲ್ಲಿ ಆರ್ಸಿಬಿ ಪರವಾಗಿ ಬ್ಯಾಟಿಂಗ್ಗೆ ಇಳಿದಿರುವ ಡಿಕೆ ಕೆಳ ಕ್ರಮಾಂಖದಲ್ಲಿ ಕಣಕ್ಕಿಳಿದರೂ 192 ರನ್ಗಳನ್ನು ಬಾರಿಸಿದ್ದಾರೆ. ಅವರ ಹೈಯೆಸ್ಟ್ ಅಜೇಯ 61 ರನ್. ಇಡೀ ಟೂರ್ನಿಯಲ್ಲಿ ದಿನೇಶ್ ಕಾರ್ತಿಕ್ ಒಮ್ಮೆ ಮಾತ್ರವೇ ವಿಕೆಟ್ ಒಪ್ಪಿಸಿದ್ದಾರೆ ಎಂಬುದು ಗಮನಾರ್ಹ ಅಂಶ. ಆಡಿರುವ 6 ಇನ್ನಿಂಗ್ಸ್ಗಳಲ್ಲಿ 18 ಬೌಂಡರಿ ಹಾಗೂ 14 ಸಿಕ್ಸರ್ ಸಿಡಿಸಿದ್ದಾರೆ.
2019ರ ವಿಶ್ವಕಪ್ ಬಳಿಕ ತಂಡದಿಂದ ಹೊರಬಿದ್ದ ಡಿಕೆ
ದಿನೇಶ್ ಕಾರ್ತಿಕ್ 2019ರ ಏಕದಿನ ವಿಶ್ವಕಪ್ನ ಬಳಿಕ ಟೀಮ್ ಇಂಡಿಯಾ ಸ್ಕ್ವಾಡ್ನಿಂದ ಹೊರಬಿದ್ದಿದ್ದಾರೆ. ನ್ಯೂಜಿಲೆಂಡ್ ವಿರುದ್ಧ ಈ ವಿಶ್ವಕಪ್ನಲ್ಲಿ ಭಾರತ ಸಮಿ ಫೈನಲ್ನಲ್ಲಿ ಸೋತು ಹೊರಬಿದ್ದ ಬಳಿಕ ಡಿನೇಶ್ ಕಾರ್ತಿಕ್ ಭಾರತ ತಂಡದಿಂದ ಸಂಪೂರ್ಣವಾಗಿ ಹೊರಗುಳಿದರು. ಇನ್ನು ದಿನೇಶ್ ಕಾರ್ತಿಕ್ ಭಾರತದ ಪರವಾಗಿ ಟಿ20 ಮಾದರಿಯಲ್ಲಿ ಕೊನೆಯ ಬಾರಿಗೆ ಕಣಕ್ಕಿಳಿದಿದ್ದು 2019ರ ಫೆಬ್ರವರಿಯಲ್ಲಿ. ಅದಾದ ಬಳಿಕ ದಿನೇಶ್ ಕಾರ್ತಿಕ್ ಭಾರತ ತಂಡದ ಆಯ್ಕೆಗೆ ಪರಿಗಣನೆಯಾಗಲೇ ಇಲ್ಲ.