ಭಾರತದ ಆಟಗಾರರಿಗೆ ನಿದ್ದೆ ಮಾತ್ರೆ ಕೊಡಿ: ಪಾಕ್ ಆಟಗಾರರಿಗೆ ಗೆಲುವಿನ ಸುಲಭ ದಾರಿ ಹೇಳಿದ ಅಖ್ತರ್!

ಪಾಕ್ ಗೆಲುವಿಗೆ ಅಖ್ತರ್ ಮೂರು ಸಲಹೆ

ಭಾರತದ ವಿರುದ್ಧ ಪಾಕಿಸ್ತಾನ ಗೆಲುವು ಸಾಧಿಸಬೇಕಾದರೆ ಮೂರು ತಮಾಷೆಯ ದಾರಿಯನ್ನು ಶೋಯೆಬ್ ಅಖ್ತರ್ ಹೇಳಿದ್ದಾರೆ. "ಮೊದಲಿಗೆ ಭಾರತೀಯ ಆಟಗಾರರಿಗೆ ನಿದ್ದೆ ಮಾತ್ರೆ ನೀಡಬೇಕು. ಎರಡನೇಯದ್ದು ವಿರಾಟ್ ಕೊಹ್ಲಿ ಇನ್ಸ್ಟಾಗ್ರಾಂ ಎರಡು ದಿನಗಳ ಕಾಲ ಬಳಕೆ ಮಾಡದಂತೆ ನೋಡಿಕೊಳ್ಳಬೇಕು ಹಾಗೂ ಮೆಂಟರ್ ಆಗಿರುವ ಎಂಎಸ್ ಧೋನಿ ಬ್ಯಾಟರ್ ಆಗಿ ಮೈದಾನಕ್ಕೆ ಇಳಿಯದಂತೆ ನೋಡಿಕೊಳ್ಳಬೇಕು" ಎಂದು ಶೋಯೆಬ್ ಅಖ್ತರ್ ಸಲಹೆಯನ್ನು ನೀಡಿದ್ದಾರೆ.

ಗಂಭೀರವಾಗಿ ಸಲಹೆ ನೀಡಿದ ಅಖ್ತರ್

ಇನ್ನು ತಮಾಷೆಯಾಗಿ ನಿಡಿದ ಈ ಮೂರು ಸಲಹೆಗಳ ನಂತರ ಶೋಯೆಬ್ ಅಖ್ತರ್ ಗಂಭೀರವಾಗಿ ಪಾಕಿಸ್ತಾನ ತಂಡ ಯಾವ ನಿಟ್ಟಿನಲ್ಲಿ ಯೋಜನೆಗಳನ್ನು ರೂಪಿಸಿಕೊಳ್ಳಬೇಕು ಎಂಬ ಸಲಹೆಯನ್ನು ಕೂಡ ನೀಡಿದ್ದಾರೆ. "ಪಾಕಿಸ್ತಾನ ತಂಡ ಉತ್ತಮವಾದ ಆರಂಭವನ್ನು ಪಡೆಯಬೇಕಿದೆ. ನಂತರ ಪಾಕಿಸ್ತಾನ ಡಾಟ್ ಬಾಲ್‌ಗಳನ್ನು ಕಡಿಮೆಗೊಳಿಸಬೇಕಿದೆ. ಮೊದಲ ಐದು ಆರು ಓವರ್‌ಗಳಲ್ಲಿ ಪ್ರತಿ ಎಸೆತಕ್ಕೊಂದರಂತೆ ರನ್ ಗಳಿಸಬೇಕು ಹಾಗೂ ಅದಾದ ಬಳಿಕ ಸ್ಟ್ರೈಕ್‌ರೇಟ್ ಹೆಚ್ಚಿಸುವತ್ತ ಚಿತ್ತ ನೆಡಬೇಕಿದೆ. ಇನ್ನು ಬೌಲಿಂಗ್ ವಿಚಾರವಾಗಿ ಉತ್ತಮವಾದ ರನ್‌ಗಳಿಸಿದ್ದರೆ ನೀವು ವಿಕೆಟ್ ಕಬಳಿಸುವ ಸಲುವಾಗಿ ಕಣಕ್ಕಿಳಿದಿದ್ದೀರಿ ಎಂಬುದನ್ನು ಅರಿತುಕೊಳ್ಳಿ" ಎಂದು ಶೋಯೆಬ್ ಅಖ್ತರ್ ಪಾಕಿಸ್ತಾನ ತಂಡಕ್ಕೆ ಸಲಹೆಯನ್ನು ನೀಡಿದ್ದಾರೆ.

ಆಸಿಫ್ ಅಲಿ ಪ್ರದರ್ಶನದ ಮೇಲೆ ಅಖ್ತರ್ ಭರವಸೆ

ಇನ್ನು ಭಾರತ ಹಾಗೂ ಪಾಕಿಸ್ತಾನ ತಂಡಗಳ ನಡುವಿನ ಈ ಕದನದಲ್ಲಿ ಪಾಕಿಸ್ತಾನದ ಓರ್ವ ಆಟಗಾರನ ಪ್ರದರ್ಶನ ಮೇಲೆ ನಿರೀಕ್ಷೆಯಿಡಬಹುದು ಎಂದಿದ್ದಾರೆ ಶೋಯೆಬ್ ಅಖ್ತರ್. ಕೆಳ ಕ್ರಮಾಂಕದಲ್ಲಿ ಕಣಕ್ಕಿಳಿಯುವ ಆಸಿಫ್ ಅಲಿ ಪಾಕಿಸ್ತಾನದ ಪರವಾಗಿ ಟ್ರಂಫ್ ಕಾರ್ಡ್ ಆಗಬಲ್ಲ ಆಟಗಾರ ಎಂದು ಶೋಯೆಬ್ ಅಖ್ತರ್ ವಿಶ್ವಾಸ ವ್ಯಕ್ತಪಡಿಸಿದ್ದಾರೆ. "ಆಸಿಫ್ ಅಲಿ ಕೆಳ ಕ್ರಮಾಂಕದಲ್ಲಿ ರನ್‌ಗತಿಯನ್ನು ಅದ್ಭುತವಾಗಿ ಏರಿಸಲಿದ್ದಾರೆ. ಈ ಪಂದ್ಯದಲ್ಲಿ ಪಾಕಿಸ್ತಾನ ತಂಡಕ್ಕೆ ಈತನೇ ಟ್ರಂಪ್ ಕಾರ್ಡ್ ಎನಿಸಲಿದ್ದಾರೆ" ಎಂದು ಶೋಯೆಬ್ ಅಖ್ತರ್ ಭವಿಷ್ಯ ನುಡಿದಿದ್ದಾರೆ.