ಮೌಲ್ಯ ಕಳೆದುಕೊಂಡಿರುವ ಸ್ಟಾರ್ ಕ್ರಿಕೆಟ್ ಆಟಗಾರರು

ಯುವರಾಜ್ ಸಿಂಗ್

ಒಂದಾನೊಂದು ಕಾಲದಲ್ಲಿ ಟಿ20ಯ ಹೀರೋ ಆಗಿದ್ದ ಯುವರಾಜ್ ಸಿಂಗ್ ಇಂದು ಯಾವ ಫ್ರಾಂಚೈಸಿಗೂ ಬೇಡವಾಗಿರುವ ಆಟಗಾರರಾಗಿದ್ದಾರೆ. ಆಲ್ ರೌಂಡರ್ ಯುವರಾಜ್ ಸಿಂಗ್ ಅವರು ಕೇವಲ 2 ಕೋಟಿ ರುಪಾಯಿಗೆ ಕಿಂಗ್ಸ್ XI ಪಂಜಾಬ್ ತಂಡ ಸೇರಿಕೊಂಡಿದ್ದಾರೆ. ಯುವರಾಜ್ ಅವರನ್ನು 2014ರಲ್ಲಿ ರಾಯಲ್ ಚಾಲೆಂಜರ್ಸ್ ಬೆಂಗಳೂರು 14 ಕೋಟಿ ರುಪಾಯಿ ನೀಡಿ ಕೊಂಡುಕೊಂಡಿತ್ತು.

ಹರ್ಭಜನ್ ಸಿಂಗ್

ಮುಂಬೈ ಇಂಡಿಯನ್ಸ್ ತಂಡದ ಕ್ಯಾಪ್ಟನ್ ಕೂಡ ಆಗಿದ್ದ ಹರ್ಭಜನ್ ಸಿಂಗ್ ಅವರ ಆಟ ಹೆಚ್ಚೂ ಕಡಿಮೆ ಮುಗಿದಿದೆ. ಐಪಿಎಲ್ ನಲ್ಲಿ ಒಟ್ಟು 136 ಪಂದ್ಯಗಳನ್ನು ಆಡಿರುವ ಹರಭಜನ್ ಸಿಂಗ್ ಬೇಸ್ ಅಂಕ - 2 ಕೋಟಿ. ಅದೇ ಬೆಲೆಗೆ ಅವರು ಪಂಜಾಬ್ ಪಾಲಾಗಿದ್ದಾರೆ. ಭಾರತ ತಂಡದಲ್ಲಿಯೂ ಸ್ಥಾನ ಕಳೆದುಕೊಂಡಿರುವ ಹರ್ಭಜನ್ ಸಿಂಗ್ ಅವರು ಈ ಬಾರಿಯೂ ಆಡಲು ಅವಕಾಶ ಸಿಗದಿದ್ದರೆ, ಬೇರಾವುದೋ ತಂಡಕ್ಕೆ ಕೋಚ್ ಆಗುವುದು ಒಳಿತು.

ಗೌತಮ್ ಗಂಭೀರ್

ಕಳೆದ ಬಾರಿ ಕೋಲ್ಕತಾ ನೈಟ್ ರೈಡರ್ಸ್ ಆಗಿದ್ದ ಗೌತಮ್ ಗಂಭೀರ್ ಅವರನ್ನು ಈ ಬಾರಿ ತಂಡವೇ ಬಿಟ್ಟುಕೊಟ್ಟಿದೆ. ಅವರು ಆ ಬಾರಿಯ ಹರಾಜಿನಲ್ಲಿ ಡೆಲ್ಲಿ ಡೇರ್ ಡೆವಿಲ್ಸ್ ತಂಡದಲ್ಲಿ ಕೇವಲ 2.8 ಕೋಟಿ ರುಪಾಯಿಗೆ ಸೇರಿಕೊಂಡಿದ್ದಾರೆ. ಇವರು ಕೂಡ ಭಾರತ ತಂಡದಲ್ಲಿ ಸ್ಥಾನ ಪಡೆಯಲು ಸತತವಾಗಿ ವಿಫಲರಾಗಿದ್ದು, ಹೆಚ್ಚೂ ಕಡಿಮೆ ನಿವೃತ್ತಿಯ ಹೊಸ್ತಿಲಲ್ಲಿದ್ದಾರೆ.

ಮುರಳಿ ವಿಜಯ್, ಇಶಾಂತ್ ಶರ್ಮಾ

ಇದು ನಿಜಕ್ಕೂ ಅಚ್ಚರಿಯ ಸಂಗತಿ. ಮುರಳಿ ವಿಜಯ್ ಅವರನ್ನು ಯಾವುದೇ ಫ್ರಾಂಚೈಸಿ ಹರಾಜಿನಲ್ಲಿ ಪರಿಗಣನೆಗೆ ತೆಗೆದುಕೊಂಡಿಲ್ಲ. ಅವರು ಟಿ20 ಆವೃತ್ತಿಗೆ ಸೂಕ್ತವಲ್ಲ ಎಂಬ ನಿರ್ಧಾರಕ್ಕೆ ಮಾಲಿಕರು ಬಂದಂತಿದೆ. ಇದೇ ರೀತಿ ದಕ್ಷಿಣ ಆಫ್ರಿಕಾದಲ್ಲಿ ವಿಫಲರಾಗಿರುವ ಇಶಾಂತ್ ಶರ್ಮಾ ಕೂಡ ಮಾರಾಟವಾಗದೆ ಉಳಿದುಕೊಂಡಿದ್ದಾರೆ.