ಅನುಷ್ಕಾ, ವಾಮಿಕಾಗೆ ಶತಕ ಅರ್ಪಣೆ
ಶತಕ ಗಳಿಸಿದ ನಂತರ ಮಾತನಾಡಿದ ವಿರಾಟ್ ಕೊಹ್ಲಿ ಪತ್ನಿ ಅನುಷ್ಕಾ ಶರ್ಮಾರನ್ನು ನೆನಪಿಸಿಕೊಂಡರು. "ನಾನು ಇಲ್ಲಿ ನಿಂತಿರುವುದನ್ನು ನೀವು ನೋಡುತ್ತೀರಿ, ಒಬ್ಬ ವ್ಯಕ್ತಿ ನನ್ನಲ್ಲಿ ಆತ್ಮವಿಶ್ವಾಸವನ್ನು ತುಂಬಿದ್ದಾರೆ, ಅದು ಅನುಷ್ಕಾ" ಎಂದು ಹೇಳಿದ ಕೊಹ್ಲಿ ತಮ್ಮ 71ನೇ ಶತಕವನ್ನು ಪತ್ನಿ ಅನುಷ್ಕಾ ಮತ್ತು ಮಗಳು ವಾಮಿಕಾಗೆ ಅರ್ಪಿಸಿದರು.
"ನೀವು ಕುಗ್ಗಿದಾಗ ಯಾರಾದರೂ ನಿಮ್ಮ ಜೊತೆಗೆ ಇರಬೇಕೆಂದು ಅನಿಸುತ್ತದೆ. ಅವರು ನಿಮ್ಮಲ್ಲಿ ಆತ್ಮವಿಶ್ವಾಸವನ್ನು ತುಂಬುತ್ತಾರೆ, ಸರಿಯಾದ ದಿಕ್ಕಿನಲ್ಲಿ ಆಲೋಚಿಸುವಂತೆ ಮಾಡುತ್ತಾರೆ, ಇದು ನಿಮ್ಮ ಯಶಸ್ಸಿಗೆ ಸಹಾಯವಾಗುತ್ತದೆ. ಎಲ್ಲಾ ಸಮಯದಲ್ಲೂ ಅನುಷ್ಕಾ ನನ್ನ ಪಕ್ಕದಲ್ಲಿದ್ದಳು" ಎಂದು ಹೇಳಿದ್ದಾರೆ.
1021 ದಿನಗಳ ಬಳಿಕ ಶತಕ ದಾಖಲಿಸಿದ ವಿರಾಟ್, 83 ಇನ್ನಿಂಗ್ಸ್ ನಂತರ ಮೂರಂಕಿ ಸ್ಕೋರ್
ಮದುವೆಯ ಉಂಗುರುಕ್ಕೆ ಚುಂಬಿಸಿದ ಕೊಹ್ಲಿ
ಅಫ್ಘಾನಿಸ್ತಾನದ ವಿರುದ್ಧ ಶತಕ ಬಾರಿಸುತ್ತಿದ್ದಂತೆ ವಿರಾಟ್ ಕೊಹ್ಲಿ ಸಂಭ್ರಮಾಚರಣೆ ಮಾಡಿದರು. ತಮ್ಮ ಕೊರಳಿನಲ್ಲಿ ಸರಕ್ಕೆ ಜೋಡಿಸಿದ್ದ ತಮ್ಮ ಮದುವೆಯ ಉಂಗುರವನ್ನು ತೆಗೆದು ಮುತ್ತಿಟ್ಟದ್ದು ವಿಶೇಷವಾಗಿತ್ತು.
ಕಳೆದ ಎರಡೂವರೆ ವರ್ಷಗಳು ನನಗೆ ಬಹಳಷ್ಟು ಪಾಠಗಳನ್ನು ಕಲಿಸಿವೆ ಎಂದು ವಿರಾಟ್ ಕೊಹ್ಲಿ ಹೇಳಿದ್ದಾರೆ. ನನಗೆ ಸಹಾಯ ಮಾಡಿದ್ದಕ್ಕಾಗಿ ಭಾರತೀಯ ತಂಡಕ್ಕೆ ಧನ್ಯವಾದ ಅರ್ಪಿಸುತ್ತೇನೆ, ಇದು ನನಗೆ ಮತ್ತು ತಂಡಕ್ಕೆ ತುಂಬಾ ವಿಶೇಷವಾದ ಕ್ಷಣವಾಗಿದೆ ಎಂದು ಅವರು ಹೇಳಿದ್ದಾರೆ.
ವಿಶ್ರಾಂತಿ ವೇಳೆ ಬಹಳಷ್ಟು ವಿಷಯಗಳನ್ನು ಕಲಿತಿದ್ದೇನೆ
ಆಟದಿಂದ ದೂರವಿರುವ ಸಮಯ ನನಗೆ ಬಹಳಷ್ಟು ವಿಷಯಗಳನ್ನು ಕಲಿಸಿದೆ. ವಿಶ್ರಾಂತಿ ಬಳಿಕ ಹಿಂತಿರುಗಿದಾಗ, ಹತಾಶನಾಗಿರಲಿಲ್ಲ. ದೇವರು ನನ್ನನ್ನು ಮೊದಲು ಆಶೀರ್ವದಿಸಿದ್ದಕ್ಕಾಗಿ ನಾನು ಕೃತಜ್ಞನಾಗಿದ್ದೆ. ನಾನು ಮೊದಲಿಗಿಂತ ಶಾಂತವಾಗಿದ್ದೇನೆ" ಎಂದು ಹೇಳಿದ್ದಾರೆ.
"ಆರು ವಾರಗಳ ರಜೆ ನಾನು ರಿಫ್ರೆಶ್ ಆಗಿದ್ದೆ. ನಾನು ಮಾನಸಿಕವಾಗಿ ಮತ್ತು ದೈಹಿಕವಾಗಿ ಎಷ್ಟು ದಣಿದಿದ್ದೇನೆ ಎಂದು ವಿರಾಮ ತೆಗೆದುಕೊಂಡ ನಂತರ ನನಗೆ ಅರ್ಥವಾಯಿತು. ಸ್ಪರ್ಧೆಯಲ್ಲಿದ್ದಾಗ ವಿಶ್ರಾಂತಿ ತೆಗೆದುಕೊಳ್ಳಲು ಸಾಧ್ಯವಾಗುವುದಿಲ್ಲ, ಆದರೆ ವಿಶ್ರಾಂತಿ ಸಿಕ್ಕಿದ್ದು ನನಗೆ ಆಶೀರ್ವಾದವಾಗಿತ್ತು. ನೆಟ್ಸ್ನಲ್ಲಿ ಆಡಲು ಪ್ರಾರಂಭಿಸಿದಾಗ, ನಾನು ನನ್ನ ಹಳೆಯ ಲಯವನ್ನು ಮರಳಿ ಪಡೆಯುತ್ತಿದ್ದೇನೆ ಎಂದು ಅನಿಸಿತು."
ಟೀಕಾಕಾರರಿಗೆ ಬ್ಯಾಟ್ನಿಂದಲೇ ಉತ್ತರ
ವಿರಾಟ್ ಕೊಹ್ಲಿ ಕೊನೆಯ ಬಾರಿ ಶತಕ ಗಳಿಸಿದ್ದು 1021 ದಿನಗಳ ಹಿಂದೆ. 2019ರ ನವೆಂಬರ್ 22ರಂದು ಕೋಲ್ಕತ್ತಾದ ಈಡನ್ ಗಾರ್ಡನ್ಸ್ ಮೈದಾನದಲ್ಲಿ ನಡೆದ ಬಾಂಗ್ಲಾ ವಿರುದ್ಧದ ಟೆಸ್ಟ್ ಪಂದ್ಯದಲ್ಲಿ ವಿರಾಟ್ ಕೊಹ್ಲಿ ಶತಕ ಗಳಿಸಿದ್ದರು. ಫಾರ್ಮ್ ಕಳೆದುಕೊಂಡಿದ್ದ ವಿರಾಟ್ ಕೊಹ್ಲಿ ಬಗ್ಗೆ ಸಾಕಷ್ಟು ಟೀಕೆ ವ್ಯಕ್ತವಾಗಿತ್ತು.
ಇಂಗ್ಲೆಂಡ್ ವಿರುದ್ಧದ ಸರಣಿ ನಂತರ ವಿರಾಟ್ ಕೊಹ್ಲಿ ದೀರ್ಘ ಕಾಲದ ವಿಶ್ರಾಂತಿ ಪಡೆದಿದ್ದರು. 84 ಇನ್ನಿಂಗ್ಸ್ಗಳ ನಂತರ ಮೊದಲ ಬಾರಿಗೆ ವಿರಾಟ್ ಕೊಹ್ಲಿ ಶತಕ ಬಾರಿಸಿ, ಟೀಕಾಕಾರರ ಬಾಯಿ ಮುಚ್ಚಿಸಿದ್ದಾರೆ.