ಆರ್‌ಸಿಬಿ ತಂಡದಲ್ಲಿ ಪ್ರಮುಖ ಬದಲಾವಣೆ : ವೇಗಿ ಅಲಭ್ಯ, ಆಸಿಸ್ ಸ್ಪಿನ್ನರ್ ಸೇರ್ಪಡೆ

ಕೇನ್ ಅಲಭ್ಯತೆಗೆ ಕಾರಣ

ಮೂಲಗಳ ಮಾಹಿತಿ ಪ್ರಕಾರ ಕೇನ್ ರಿಚರ್ಡ್ಸನ್ ದಂಪತಿ ಮಗುವಿನ ನಿರೀಕ್ಷೆಯಲ್ಲಿದ್ದಾರೆ. ಈ ಕಾರಣದಿಂದಾಗಿ ಈ ಬಾರಿಯ ಟೂರ್ನಿಯನ್ನು ತೊರೆಯುವ ನಿರ್ಧಾರ ಕೈಗೊಂಡಿದ್ದಾರೆ ಎನ್ನಲಾಗಿದೆ. ಆದರೆ ವೇಗಿಯ ಸ್ಥಾನಕ್ಕೆ ಸ್ಪಿನ್ನರ್ ಆಯ್ಕೆ ಮಾಡಿಕೊಂಡು ಆರ್‌ಸಿಬಿ ಫ್ರಾಂಚೈಸಿ ಅಚ್ಚರಿ ಮೂಡಿಸಿದೆ.

ಝಂಪಾ ಉತ್ತಮ ದಾಖಲೆ

ಆ್ಯಡಂ ಝಂಪಾ ಐಪಿಎಲ್‌ನಲ್ಲಿ ಉತ್ತಮ ದಾಖಲೆಯನ್ನು ಹೊಂದಿದ್ದಾರೆ. ಐಪಿಎಲ್ ಇತಿಹಾಸದಲ್ಲಿ 6 ವಿಕೆಟ್ ಪಡೆದ ಏಕೈಕ ಸ್ಪಿನ್ ಬೌಲರ್ ಎಂಬ ಹೆಗ್ಗಳಿಕೆ ಝಂಪಾ ಅವರಿಗಿದೆ. 28 ವರ್ಷದ ಝಂಪಾ 2016-2017ರಲ್ಲಿ ರೈಸಿಂಗ್ ಪುಣೆ ಸುಪರ್ ಜೇಂಟ್ಸ್ ತಂಡದ ಭಾಗವಾಗಿದ್ದರು. 11 ಪಂದ್ಯಗಳಿಂದ 19 ವಿಕೆಟ್ ಪಡೆದು ದಾಖಲೆಯನ್ನು ಬರೆದಿದ್ದಾರೆ ಮಿಂಚಿದ್ದಾರೆ. ಆದರೂ ಈ ಬಾರಿಯ ಐಪಿಎಲ್ ಟೂರ್ನಿಗಾಗಿ ನಡೆದ ಹರಾಜಿನಲ್ಲಿ ಯಾವುದೇ ತಂಡದ ಪಾಲಾಗದೆ ಉಳಿದುಕೊಂಡಿದ್ದರು.

ಯುಎಇನಲ್ಲಿ ಪರಿಣಾಮಕಾರಿಯಾಗಲಿದ್ದಾರಾ ಝಂಪಾ?

ಆರ್‌ಸಿಬಿ ತಂಡಕ್ಕೆ ಆ್ಯಡಂ ಝಂಪಾ ಸೇರ್ಪಡೆಯಾಗುತ್ತಿರುವುದು ಸ್ಪಿನ್ ವಿಭಾಗವನ್ನು ಮತ್ತಷ್ಟು ಬಲಿಷ್ಠಗೊಳಿಸಿದೆ. ಈಗಾಗಲೇ ಆರ್‌ಸಿಬಿಯಲ್ಲಿ ಯುಜುವೇಂದ್ರ ಚಾಹಲ್, ವಾಶಿಂಗ್ಟನ್ ಸುಂದರ್, ಮೊಯೀನ್ ಅಲಿ ಪವನ್ ನೇಗಿ ಹಾಗೂ ಶಹ್ಬಾಜ್ ಅಹ್ಮದ್ ಇದ್ದಾರೆ. ಅದರಲ್ಲೂ ಯುಎಇ ಪಿಚ್‌ನಲ್ಲಿ ಝಂಪಾ ಪರಿಣಾಮಕಾರಿಯಾಗುವ ನಿರೀಕ್ಷೆಯಿದೆ. ಇಷ್ಟು ಪೈಪೋಟಿಯಲ್ಲಿ ಆಡುವ ಬಳಗದಲ್ಲಿಅವಕಾಶ ಗಿಟ್ಟಿಸಿಕೊಳ್ಳುವುದೇ ಸಾಹಸವಾಗಲಿದೆ.

ವೇಳಾಪಟ್ಟಿ ವಿಳಂಬ

ಐಪಿಎಲ್ 13ನೇ ಆವೃತ್ತಿ ಸೆಪ್ಟೆಂಬರ್ 19ರಿಂದ ಆರಂಭವಾಗಲಿದೆ. ಫೈನಲ್‌ ಪಂದ್ಯ ನವೆಂಬರ್ 10ರಂದು ಆಯೋಜನೆಯಾಗಲಿದೆ. ಆದರೆ ಪಂದ್ಯದ ಅಂತಿಮ ವೇಳಾಪಟ್ಟಿ ಇನ್ನು ಕೂಡ ಪ್ರಕಟವಾಗದೆ ಉಳಿದುಕೊಂಡಿದೆ. ಕೊರೊನಾ ವೈರಸ್‌ನಿಂದಾಗಿ ಅಬುದಾಬಿ-ದುಬೈ ಪ್ರಯಾಣದಲ್ಲಿ ನಿರ್ಬಂಧ ಹಾಗೂ ಸಿಎಸ್‌ಕೆ ಪಾಳಯದಲ್ಲಿ ಕೊರೊನಾ ವೈರಸ್ ಕಾಣಿಸಿಕೊಂಡಿರುವುದು ಐಪಿಎಲ್ ವೇಳಾಪಟ್ಟಿ ಮತ್ತಷ್ಟು ತಡವಾಗಲು ಕಾರಣವಾಗಿದೆ.