ಢಾಕಾ, ಜ. 24: ಅಂಡರ್ 19 ವಿಶ್ವಕಪ್ ಗಾಗಿ ಪೂರ್ವ ತಯಾರಿ ನಡೆಸಿರುವ ಭಾರತದ ಯುವ ತಂಡ ಭರ್ಜರಿ ಆರಂಭ ಪಡೆದುಕೊಂಡಿದೆ. ಕೋಚ್ ರಾಹುಲ್ ದ್ರಾವಿಡ್ ಅವರ ಮಾರ್ಗದರ್ಶನದಲ್ಲಿ ಇಶಾನ್ ಕಿಶಾನ್ ನೇತೃತ್ವದಲ್ಲಿ ಕೆನಡಾ ವಿರುದ್ಧ 372 ರನ್ ಗಳ ಬೃಹತ್ ಅಂತರದ ಜಯ ದಾಖಲಿಸಿದೆ.
ಕೆನಡಾ ವಿರುದ್ಧ 50 ಓವರ್ ಗಳಲ್ಲಿ 485/3 ಸ್ಕೋರ್ ಮಾಡಿದ ಯುವ ಭಾರತ ತಂಡ ನಂತರ ಕೆನಡಾ ತಂಡವನ್ನು 113 ಸ್ಕೋರಿಗೆ ನಿಯಂತ್ರಿಸಿ ಭರ್ಜರಿ ಜಯ ದಾಖಲಿಸಿದೆ. ಭಾರತ ತನ್ನ ಮುಂದಿನ ಅಭ್ಯಾಸ ಪಂದ್ಯವನ್ನು ಜನವರಿ 25ರಂದು ಪಾಕಿಸ್ತಾನ ವಿರುದ್ಧ ಆಡಲಿದೆ.[ದ್ರಾವಿಡ್ ಕೋಚಿಂಗ್ ಕಮಾಲ್, ಕಿರಿಯರಿಗೆ ಕಿರೀಟ]
ಬಾಂಗ್ಲಾದೇಶದ ಕ್ರಿರಾ ಶಿಖಾ ಪ್ರತಿಷ್ಠಾನ್ ಮೈದಾನದಲ್ಲಿ ಶನಿವಾರ ನಡೆದ ಪಂದ್ಯದಲ್ಲಿ ಭಾರತದ ನಾಯಕ ಇಶಾನ್ ಕಿಶನ್ 138 ರನ್(86 ಎಸೆತ, 16 X 4, 7 X6) ಹಾಗೂ ರಿಕಿ ಭುಯಿ 115 ರನ್(71 ಎಸೆತ, 10 X4, 7 X6) ಅಮೋಘ ಜೊತೆಯಾಟ ನೆರವಿನಿಂದ ಬೃಹತ್ ಮೊತ್ತ ದಾಖಲಿಸಿತು.
ಶತಕ ವೀರರಿಬ್ಬರೂ ಮಿಕ್ಕವರಿಗೆ ಅಭ್ಯಾಸವಾಗಲಿ ಎಂದು ನಿವೃತ್ತಿ ಪಡೆದು ಪೆವಿಲಿಯನ್ ಗೆ ಬಂದರು. ನಂತರ ಮಹಿಪಾಲ್ ಅವರು 23 ಎಸೆತಗಳಲ್ಲಿ 55 ರನ್ (4x4, 4x6) ಬಾರಿಸಿದರು.[ಅಂಡರ್-19 ವಿಶ್ವಕಪ್ ಟೂರ್ನಿಗೆ ಕಿಶನ್ ನಾಯಕ]
485ರನ್ ಚೇಸ್ ಮಾಡಿದ ಕೆನಡಾ ತಂಡ 31.1 ಓವರ್ಗಳಲ್ಲಿ ಕೇವಲ 113 ರನ್ಗೆ ಆಲೌಟಾಗಿ ಸೊಲೊಪ್ಪಿಕೊಂಡಿತು.
ಭಾರತ: 6 ವಿಕೆಟ್ಗೆ 485 (ಇಶಾನ್ ಕಿಶನ್ 138, ರಿಕಿ ಭುಯಿ 115, ರಿಷಭ್ ಪಂತ್ 62, ಲಾಮ್ರರ್ 55*, ಸರ್ಫ್ರಾಜ್ಖಾನ್ 48, ಅಬ್ದುಲ್ ಹಸೀಬ್ 56ಕ್ಕೆ 1), ಕೆನಡಾ: 31.1 ಓವರ್ಗಳಲ್ಲಿ 113( ಹರ್ಷ್ ಠಾಕರ್ 25, ಶುಭಂ ಮವಿ 20ಕ್ಕೆ 2, ಜೀಶನ್ ಅನ್ಸಾರಿ 39ಕ್ಕೆ 2, ಲಾಮ್ರರ್ 19ಕ್ಕೆ 3).
ಆಸ್ಟ್ರೇಲಿಯಾ ತಂಡ 19 ವಯೋಮಿತಿಯ ಏಕದಿನ ಕ್ರಿಕೆಟ್ನಲ್ಲಿ 2002ರಲ್ಲಿ 480 ರನ್ ಬಾರಿಸಿದ್ದು ದಾಖಲೆ. ಭಾರತ 2004ರಲ್ಲಿ 425 ರನ್ ಮೊತ್ತ 2ನೇ ಸ್ಥಾನದಲ್ಲಿದೆ. ವಿಶ್ವಕಪ್ ಟೂರ್ನಿಯ ಅಭ್ಯಾಸ ಪಂದ್ಯವಾಗಿದ್ದರೂ ಇದು ಅಧಿಕೃತ ದಾಖಲೆಯಾಗಿ ಪರಿಗಣಿಸುತ್ತಿಲ್ಲ.
ಡಿ ಗುಂಪಿನಲ್ಲಿರುವ ಭಾರತ ತಂಡದ ಜೊತೆಗೆ ಐರ್ಲೆಂಡ್, ನೇಪಾಳ ಹಾಗೂ ನ್ಯೂಜಿಲೆಂಡ್ ಕೂಡಾ ಸ್ಪರ್ಧಿಸುತ್ತಿವೆ. ಜನವರಿ 28 (ಗುರುವಾರ) ಮಿರ್ಪುರ್ ನಲ್ಲಿ ಐರ್ಲೆಂಡ್ ವಿರುದ್ಧ ಭಾರತ ತನ್ನ ಮೊದಲ ಪಂದ್ಯವಾಡಲಿದೆ. ಜನವರಿ 27 ರಿಂದ ಫೆಬ್ರವತರಿ 14ರ ತನಕ ವಿಶ್ವಕಪ್ ನಡೆಯಲಿದೆ (ಒನ್ಇಂಡಿಯಾ ಸುದ್ದಿ)