|
'ಹಲೋ ವೆಲ್ಲಿಂಗ್ಟನ್' ಎಂದ ಸೂರ್ಯಕುಮಾರ್ ಯಾದವ್
ವೆಲ್ಲಿಂಗ್ಟನ್ಗೆ ಬಂದಿಳಿದ ನಂತರ ಸೂರ್ಯಕುಮಾರ್ ಯಾದವ್ ಟ್ವಿಟ್ಟರ್ನಲ್ಲಿ 'ಹಲೋ ವೆಲ್ಲಿಂಗ್ಟನ್' ಎಂದು ನಗುವಿನ ಇಮೋಜಿ ಜೊತೆ ಪೋಸ್ಟ್ ಹಾಕಿದರು.
ಇದಕ್ಕೆ ಆಸ್ಟ್ರೇಲಿಯಾ ತಂಡದ ಮಹಿಳಾ ಕ್ರಿಕೆಟರ್ ಅಮಂಡಾ-ಜಡೆ ವೆಲ್ಲಿಂಗ್ಟನ್ ನಗುವಿನ ಇಮೋಜಿಯೊಂದಿಗೆ 'ಹಲೋ ಯಾದವ್' ಎಂದು ಉತ್ತರಿಸಿದ್ದಾಳೆ. 25 ವರ್ಷ ವಯಸ್ಸಿನ ಆಸೀಸ್ ಲೆಗ್ ಸ್ಪಿನ್ನರ್ ವೆಲ್ಲಿಂಗ್ಟನ್ ಅವರ ಪೋಸ್ಟ್ ಶೀಘ್ರದಲ್ಲೇ ಸಾಮಾಜಿಕ ಜಾಲತಾಣದಲ್ಲಿ ವೈರಲ್ ಆಗಿದೆ. ಇದನ್ನು ನೋಡಿದ ಭಾರತೀಯ ಕ್ರಿಕೆಟ್ ಮತ್ತು ಸೂರ್ಯಕುಮಾರ್ ಯಾದವ್ ಅವರ ಅಭಿಮಾನಿಗಳು ಗೊಂದಲಕ್ಕೊಳಗಾಗಿದ್ದಾರೆ ಮತ್ತು ಆಶ್ಚರ್ಯಕರ ವ್ಯಕ್ತಿಯಿಂದ ಬಂದ ಉತ್ತರ ನೋಡಿ ನಕ್ಕಿದ್ದಾರೆ.
ಅಮಂಡಾ-ಜಡೆ ವೆಲ್ಲಿಂಗ್ಟನ್ ಯಾರು?
ಆಸ್ಟ್ರೇಲಿಯಾ ಕ್ರಿಕೆಟ್ ತಂಡದ ಬಲಗೈ ಬ್ಯಾಟರ್ ಮತ್ತು ಬಲಗೈ ಲೆಗ್-ಸ್ಪಿನ್ನರ್ ಆಗಿರುವ ಅಮಂಡಾ-ಜಡೆ ವೆಲ್ಲಿಂಗ್ಟನ್ ಅವರು ಆಸ್ಟ್ರೇಲಿಯಾದ ಅಡಿಲೇಡ್ನಲ್ಲಿ ಜನಿಸಿದರು. ವೆಲ್ಲಿಂಗ್ಟನ್ ಆಸ್ಟ್ರೇಲಿಯಾ ಮಹಿಳಾ ತಂಡದ ಮೂರು ಮಾದರಿಯ ಕ್ರಿಕೆಟ್ನಲ್ಲಿ ಪ್ರತಿನಿಧಿಸುತ್ತಿದ್ದು, ಈವರೆಗೆ 13 ಏಕದಿನ, 8 ಟಿ20 ಮತ್ತು ಏಕೈಕ ಟೆಸ್ಟ ಪಂದ್ಯವಾಡಿದ್ದಾರೆ.
ದೇಶೀಯ ಕ್ರಿಕೆಟ್ನಲ್ಲಿ ಅಮಂಡಾ-ಜಡೆ ವೆಲ್ಲಿಂಗ್ಟನ್ ಮಹಿಳೆಯರ ಬಿಗ್ ಬ್ಯಾಷ್ ಲೀಗ್ನಲ್ಲಿ ಅಡಿಲೇಡ್ ಸ್ಟ್ರೈಕರ್ಸ್ ಮತ್ತು ಮಹಿಳಾ ರಾಷ್ಟ್ರೀಯ ಕ್ರಿಕೆಟ್ ಲೀಗ್ನಲ್ಲಿ ಸೌತ್ ಆಸ್ಟ್ರೇಲಿಯನ್ ಸ್ಕಾರ್ಪಿಯಾನ್ಸ್ ತಂಡಕ್ಕಾಗಿ ಆಡುತ್ತಿದ್ದಾರೆ. ಆಸ್ಟ್ರೇಲಿಯಾದ ಸ್ಪಿನ್ನಿಂಗ್ ದಿಗ್ಗಜ ಶೇನ್ ವಾರ್ನ್ ಅವರಿಂದ ಅಮಂಡಾ-ಜಡೆ ವೆಲ್ಲಿಂಗ್ಟನ್ ಸ್ಫೂರ್ತಿ ಪಡೆದಿದ್ದಾಳೆ.
6 ಪಂದ್ಯಗಳಿಂದ 239 ರನ್ ಗಳಿಸಿರುವ ಸೂರ್ಯಕುಮಾರ್ ಯಾದವ್
ಭಾರತ ತಂಡ ನ್ಯೂಜಿಲೆಂಡ್ ವಿರುದ್ಧ ನವೆಂಬರ್ 18, 20 ಮತ್ತು 22ರಂದು ನಡೆಯುವ ಮೂರು ಟಿ20 ಪಂದ್ಯಗಳಿಗಾಗಿ ಪ್ರವಾಸಕ್ಕೆ ತೆರಳಿದ್ದು, ಸೂರ್ಯಕುಮಾರ್ ಯಾದವ್ ಸದ್ಯ ವೆಲ್ಲಿಂಗ್ಟನ್ನಲ್ಲಿದ್ದಾರೆ. ಟಿ20 ವಿಶ್ವಕಪ್ನಲ್ಲಿ ಸೂರ್ಯಕುಮಾರ್ ಯಾದವ್ ಬ್ಯಾಟ್ನೊಂದಿಗೆ ಅತ್ಯುತ್ತಮ ಪ್ರದರ್ಶನ ನೀಡಿದ್ದು, 6 ಪಂದ್ಯಗಳಿಂದ 239 ರನ್ಗಳೊಂದಿಗೆ ಹೆಚ್ಚು ರನ್ ಗಳಿಸಿದವರ ಪಟ್ಟಿಯಲ್ಲಿ ಮೂರನೇ ಸ್ಥಾನದಲ್ಲಿದ್ದಾರೆ. ಟೂರ್ನಿಯಲ್ಲಿ ಅವರು ಮೂರು ಅರ್ಧಶತಕ ಬಾರಿಸಿದ್ದಾರೆ.