ಮೊಣಕೈ ಗಾಯದಲ್ಲೇ ಟಿ20 ವಿಶ್ವಕಪ್‌ ಆಡಲಿದ್ದಾರೆ ಕೇನ್ ವಿಲಿಯಮ್ಸನ್

ಮೆಲ್ಬರ್ನ್: ಹ್ಯಾಮ್‌ಸ್ಟ್ರಿಂಗ್ ಗಾಯದ ಸಮಸ್ಯೆ ಗುಣವಾಗಿದೆ. ಆದರೆ ಮೊಣಕೈ ಗಾಯದ ಸಮಸ್ಯೆ ಇನ್ನೂ ಇದ್ದು ಹತಾಶೆಯಾಗಿದೆ. ನಾನು ಮೊಣಕೈ ಗಾಯವಿಟ್ಟುಕೊಂಡೇ ಟಿ20 ವಿಶ್ವಕಪ್‌ ಟೂರ್ನಿಯಿಡೀ ಆಡಬೇಕಾಗಿದೆ ಎಂದು ನ್ಯೂಜಿಲೆಂಡ್ ಕ್ರಿಕೆಟ್ ತಂಡದ ನಾಯಕ ಕೇನ್ ವಿಲಿಯಮ್ಸನ್ ಹೇಳಿದ್ದಾರೆ.

ಇಂಡಿಯನ್ ಪ್ರೀಮಿಯರ್ ಲೀಗ್‌ (ಐಪಿಎಲ್)ನಲ್ಲಿ ಸನ್ ರೈಸರ್ಸ್ ಹೈದರಾಬಾದ್ ಮತ್ತು ಮುಂಬೈ ಇಂಡಿಯನ್ಸ್ ನಡುವಿನ ಕೊನೇ ಪಂದ್ಯದಲ್ಲಿ ಕೇನ್ ವಿಲಿಯಮ್ಸನ್ ಆಡಿರಲಿಲ್ಲ. ಹ್ಯಾಮ್‌ಸ್ಟ್ರಿಂಗ್‌ ಕಾರಣ ವಿಲಿಯಮ್ಸನ್ ಕಣಕ್ಕಿಳಿದಿರಲಿಲ್ಲ. ಈಗ ಹ್ಯಾಮ್‌ಸ್ಟ್ರಿಂಗ್‌ ಗುಣವಾಗಿದೆ, ಆದರೆ ಮೊಣಕೈ ಗಾಯ ವರ್ಷವಿಡೀ ತೊಂದರೆ ಕೊಡುತ್ತಿದೆ ಎಂದು ವಿಲಿಯಮ್ಸನ್ ಹೇಳಿದ್ದಾರೆ.

"ಹ್ಯಾಮ್‌ಸ್ಟ್ರಿಂಗ್ ಗಾಯ ಚಿಕ್ಕದು. ಅದು ಚೆನ್ನಾಗಿ ಗುಣವಾಗುತ್ತಿದೆ. ಅದರ ಬಗ್ಗೆ ಯೋಚನೆಯಿಲ್ಲ. ಇನ್ನೂ ಸುಧಾರಿಸಲು ನಮಗೆ ಸಾಕಷ್ಟು ಸಮಯವಿದೆ. ಮುಂದಿನ ಕೆಲವು ದಿನಗಳಲ್ಲಿ ನಾನು ಅಭ್ಯಾಸದಲ್ಲಿ ಸಂಪೂರ್ಣವಾಗಿ ಪಾಲ್ಗೊಳ್ಳಲಿದ್ದೇನೆ," ಎಂದು ದುಬೈನಲ್ಲಿರುವ ವಿಲಿಯಮ್ಸನ್ ಹೇಳಿದ್ದಾರೆ.

ಟಿ20 ವಿಶ್ವಕಪ್‌ ಚೊಚ್ಚಲ ಟ್ರೋಫಿ ಗೆಲ್ಲುವತ್ತ ನ್ಯೂಜಿಲೆಂಡ್ ಚಿತ್ತ ಹರಿಸಿದೆ. ಅಕ್ಟೋಬರ್‌ 26ರಂದು ಪಾಕಿಸ್ತಾನ ವಿರುದ್ಧದ ಪಂದ್ಯದೊಂದಿಗೆ ನ್ಯೂಜಿಲೆಂಡ್ ತಂಡ ಟಿ20 ವಿಶ್ವಕಪ್‌ನಲ್ಲಿ ಸ್ಪರ್ಧೆ ಆರಂಭಿಸಲಿದೆ. ಅಕ್ಟೋಬರ್ 17ರಿಂದ ನವೆಂಬರ್ 14ರ ವರೆಗೆ ಟಿ20 ವಿಶ್ವಕಪ್‌ ಯುನೈಟೆಡ್ ಅರಬ್ ಎಮಿರೇಟ್ಸ್ ಮತ್ತು ಯುಎಇಯಲ್ಲಿ ನಡೆಯಲಿದೆ.