ವಿಶ್ವ ಬಿಲಿಯರ್ಡ್ಸ್ ಚಾಂಪಿಯನ್ ಪಟ್ಟ ಉಳಿಸಿಕೊಂಡ ಪಂಕಜ್ ಅಡ್ವಾಣಿ

ಯಾಂಗೊನ್ (ಮ್ಯಾನ್ಮರ್), ನವೆಂಬರ್ 15 : ಭಾರತದ ಚಿನ್ನದ ಹುಡುಗ, ಬೆಂಗಳೂರು ನಿವಾಸಿ ಪಂಕಜ್ ಅಡ್ವಾಣಿ ಅವರು ತಮ್ಮ ವಿಶ್ವ ಬಿಲಿಯರ್ಡ್ಸ್ ಚಾಂಪಿಯನ್ ಪಟ್ಟವನ್ನು ಉಳಿಸಿಕೊಂಡಿದ್ದಾರೆ. ಅತಿಥೇಯ ರಾಷ್ಟ್ರದ ನಾಯ್ ಥ್ವಾಯ್ ಓ ಅವರನ್ನು 6-2 ಅಂತರದಿಂದ ಫೈನಲ್ ಪಂದ್ಯದಲ್ಲಿ ಅಡ್ವಾಣಿ ಅವರು ಸೋಲಿಸಿದರು. ಈ ಮೂಲಕ ಇಂಟರ್ ನ್ಯಾಷನಲ್ ಬಿಲಿಯರ್ಡ್ಸ್ ಅಂಡ್ ಸ್ನೂಕರ್ ಫೆಡರೆಷನ್ (ಐಬಿಎಸ್ ಎಫ್) ವಿಶ್ವ ಬಿಲಿಯರ್ಡ್ಸ್ ಪ್ರಶಸ್ತಿ ಗೆದ್ದುಕೊಂಡಿದ್ದಾರೆ.

150 ಅಪ್ ಅಂಕಗಳ ಮಾದರಿಯ ಫೈನಲ್ ಪಂದ್ಯದಲ್ಲಿ ಗೆಲ್ಲುವ ಮೂಲಕ ಅಡ್ವಾಣಿ ಅವರು ತಮ್ಮ ಮಡಲಿಗೆ 20ನೇ ವಿಶ್ವ ಪ್ರಶಸ್ತಿ ಹಾಕಿಕೊಂಡಿದ್ದಾರೆ. ಇತ್ತೀಚೆಗೆ ಏಷ್ಯನ್ ಸ್ನೂಕರ್ ಟೂರ್ ಗೆದಿದ್ದರು. ನವೆಂಬರ್ 18ರಂದು ಇದೇ ಅಂಗಳದಲ್ಲಿ ವಿಶ್ವ ಚಾಂಪಿಯನ್ ಶಿಪ್ (long format) ಗೆಲ್ಲುವ ಅವಕಾಶವನ್ನು ಅಡ್ವಾಣಿ ಪಡೆದುಕೊಂಡಿದ್ದಾರೆ.

33 ವರ್ಷ ವಯಸ್ಸಿನ ಅಡ್ವಾಣಿ ಅವರು 150-21, 0-151, 151-0, 4-151, 151-11, 150-81, 151-109, 151-0 ಅಂತರದಲ್ಲಿ ಗೆದ್ದರು.