ಟೋಕಿಯೋ ಒಲಿಂಪಿಕ್ಸ್: ಬಜರಂಗ್ ಪುನಿಯಾ ಅಬ್ಬರ; ಭಾರತಕ್ಕೆ ಮತ್ತೊಂದು ಪದಕ

ಕಂಚಿನ ಸುತ್ತಿನಲ್ಲಿ ಒಂದೇ ಒಂದು ಅಂಕವನ್ನೂ ಬಿಟ್ಟುಕೊಡದ ಪೂನಿಯಾ!

ಸೆಮಿಫೈನಲ್ ಹಂತದಲ್ಲಿ ಅಜರ್‌ಬೈಜನಿಯದ ಕುಸ್ತಿಪಟು ಹಾಜಿ ಅಲಿಯವ್ ವಿರುದ್ಧ 5-12 ಅಂತರದಿಂದ ಸೋತು ಫೈನಲ್ ಪ್ರವೇಶಿಸುವ ಅವಕಾಶವನ್ನು ಕಳೆದುಕೊಂಡಿದ್ದ ಭಾರತದ ಕುಸ್ತಿಪಟು ಬಜರಂಗ್ ಪೂನಿಯಾ ಕಂಚಿನ ಸುತ್ತಿನಲ್ಲಿ ಎದುರಾಳಿಯ ಮೇಲೆ ಸಂಪೂರ್ಣ ಸವಾರಿ ಮಾಡಿದ್ದಾರೆ. ಪಂದ್ಯ ಆರಂಭವಾದಾಗಿನಿಂದ ಕೊನೆಯವರೆಗೂ ಅಬ್ಬರಿಸಿದ ಬಜರಂಗ್ ಪೂನಿಯಾ ಎದುರಾಳಿಗೆ ಎಲ್ಲಿಯೂ ಸಹ ಅಂಕವನ್ನು ಬಿಟ್ಟುಕೊಡಲೇ ಇಲ್ಲ. ಬಜರಂಗ್ ಪೂನಿಯಾ ಕಂಚಿನ ಸುತ್ತಿನಲ್ಲಿ ತಮ್ಮ ಎದುರಾಳಿ ಕಜಕಿಸ್ತಾನದ ದೌಲತ್ ನಿಯಾಜ್ ಬೆಕಾವೋ ವಿರುದ್ಧ 8-0 ಅಂತರದಿಂದ ಜಯ ಗಳಿಸುವುದರ ಮೂಲಕ ಕಂಚಿನ ಪದಕವನ್ನು ಗೆದ್ದುಕೊಂಡರು.

ಭಾರತಕ್ಕಿದು ಆರನೇ ಪದಕ

ಕಂಚಿನ ಸುತ್ತಿನಲ್ಲಿ ಭಾರತದ ಕುಸ್ತಿಪಟು ಬಜರಂಗ್ ಪೂನಿಯಾ ಕಂಚಿನ ಪದಕವನ್ನು ಗೆಲ್ಲುವುದರ ಮೂಲಕ ಪ್ರಸ್ತುತ ಟೋಕಿಯೋ ಒಲಿಂಪಿಕ್ಸ್‌ನಲ್ಲಿ ಭಾರತದ ಪದಕಗಳ ಸಂಖ್ಯೆ ಆರಕ್ಕೇರಿದೆ. ಮಹಿಳಾ ವೇಟ್ ಲಿಫ್ಟಿಂಗ್ ವಿಭಾಗದಲ್ಲಿ ಭಾರತದ ಕ್ರೀಡಾಪಟು ಮೀರಾಬಾಯಿ ಚಾನು ಬೆಳ್ಳಿ ಪದಕ ಗೆದ್ದರು, ರಸ್ಲಿಂಗ್ ವಿಭಾಗದಲ್ಲಿ ಭಾರತದ ರವಿಕುಮಾರ್ ದಾಹಿಯಾ ರಜತ ಪದಕವನ್ನು ತಮ್ಮದಾಗಿಸಿಕೊಂಡರು, ಮಹಿಳಾ ಬ್ಯಾಡ್ಮಿಂಟನ್ ವಿಭಾಗದಲ್ಲಿ ಪಿವಿ ಸಿಂಧು ಕಂಚಿನ ಪದಕ, ಹಾಕಿ ವಿಭಾಗದಲ್ಲಿ ಪುರುಷರ ತಂಡ ಕಂಚಿನ ಪದಕ ಹಾಗೂ ಮಹಿಳಾ ಬಾಕ್ಸಿಂಗ್ ವಿಭಾಗದಲ್ಲಿ ಲವ್ಲಿನಾ ಬೊರ್ಗೆಹೈನ್ ಕಂಚಿನ ಪದಕಗಳನ್ನು ಗೆದ್ದಿದ್ದರು. ಇದೀಗ ಬಜರಂಗ್ ಪೂನಿಯಾ ಕಂಚಿನ ಪದಕವನ್ನು ಗೆದ್ದಿದ್ದು ಪ್ರಸ್ತುತ ಟೋಕಿಯೋ ಒಲಿಂಪಿಕ್ಸ್‌ನಲ್ಲಿ ಭಾರತದ ಪಾಲಿಗಿದು ಆರನೇ ಪದಕವಾಗಿದೆ.

ಬಜರಂಗ್ ಪೂನಿಯಾ ಗೆದ್ದು ಬಂದ ಹಾದಿ

ಪ್ರಸ್ತುತ ಟೋಕಿಯೋ ಒಲಿಂಪಿಕ್ಸ್‌ನಲ್ಲಿ ಭಾರತದ ಕ್ರೀಡಾ ಪಟು ಬಜರಂಗ್ ಪೂನಿಯಾ ಪ್ರೀ ಕ್ವಾರ್ಟರ್ ಫೈನಲ್ ಪಂದ್ಯದಲ್ಲಿ ಕಿರ್ಗಿಸ್ತಾನದ ಕುಸ್ತಿಪಟು ಎರ್ನಾಸರ್ ವಿರುದ್ಧ ಜಯಗಳಿಸಿದರು, ಕ್ವಾರ್ಟರ್ ಫೈನಲ್ ಸುತ್ತಿನಲ್ಲಿ ಇರಾನ್ ದೇಶದ ಖ್ಯಾತ ಕುಸ್ತಿಪಟು ಮೊರ್ಟೆಜಾ ಗಿಯಾಸಿ ವಿರುದ್ಧ ಬಜರಂಗ್ ಪೂನಿಯಾ 2-1 ಅಂತರದಿಂದ ಜಯಗಳಿಸಿದರು. ಹೀಗೆ ಸೆಮಿಫೈನಲ್ ಪ್ರವೇಶವನ್ನು ಪಡೆದುಕೊಂಡ ಬಜರಂಗ್ ಪೂನಿಯಾ ಅಜರ್‌ಬೈಜನಿಯದ ಕುಸ್ತಿಪಟು ಹಾಜಿ ಅಲಿಯವ್ ವಿರುದ್ಧ 5-12 ಅಂತರದಿಂದ ಸೋಲುಂಡು ಕಂಚಿನ ಪದಕದ ಸುತ್ತಿನಲ್ಲಿ ಕಜಕಿಸ್ತಾನದ ದೌಲತ್ ನಿಯಾಜ್ ಬೆಕಾವೋ ವಿರುದ್ಧ 8-0 ಅಂತರದಿಂದ ಗೆಲ್ಲುವುದರ ಮೂಲಕ ಕಂಚಿನ ಪದಕವನ್ನು ತಮ್ಮದಾಗಿಸಿಕೊಂಡಿದ್ದಾರೆ.