ಮೈದಾನದಲ್ಲಿ ಸೆಣೆಸಾಡಲಿದ್ದಾರೆ ನಟರು ಹಾಗೂ ಕ್ರಿಕೆಟ್ ದಿಗ್ಗಜರು: ಟೂರ್ನಿ ಬಗ್ಗೆ ಕಿಚ್ಚ ಸುದೀಪ್, ಕ್ರಿಸ್ ಗೇಲ್ ಅಧಿಕೃತ ಮಾಹಿತಿ

ಹರ್ಷ ವ್ಯಕ್ತಪಡಿಸಿದ ಕ್ರಿಸ್ ಗೇಲ್

ವಿಶ್ವಾದ್ಯಂತ ಕ್ರಿಕೆಟ್ ಟೂರ್ನಿಗಳಲ್ಲಿ ಭಾಗವಹಿಸಿ ಚುಟುಕು ಕ್ರಿಕೆಟ್ ಮಾದರಿಯ ದಿಗ್ಗಜ ಆಟಗಾರ ಎನಿಸಿಕೊಂಡಿರುವ ಕ್ರಿಸ್ ಗೇಲ್ ಈ ವಿಭಿನ್ನ ಟೂರ್ನಿ ಬಗ್ಗೆ ಉತ್ಸುಕತೆ ವ್ಯಕ್ತಪಡಿಸಿದ್ದಾರೆ. "ವಿಶ್ವದ ಕ್ರಿಕೆಟ್ ಲೋಕದ ಪ್ರಮುಖರ ಜೊತೆಗೆ ಭಾರತದ ಸಿನಿಮಾ ಲೋಕದ ಖ್ಯಾತನಾಮರ ಜೊತೆಗೆ ಕ್ರಿಕೆಟ್ ಆಡುವುದಕ್ಕೆ ನಾನು ಉತ್ಸಾಹಿತನಾಗಿದ್ದೇನೆ. ಈ ಟೂರ್ನಮೆಂಟ್ ಟಿ10 ಮಾದರಿಯಲ್ಲಿ ನಡೆಯಲಿರುವ ಕಾರಣ ಸಾಕಷ್ಟು ಮನರಂಜನೆ ದೊರೆಯುವುದರಲ್ಲಿ ಅನುಮಾನವಿಲ್ಲ. ಡೆಸೆಂಬರ್‌ನಲ್ಲಿ ಆರಂಭವಾಗಲಿರುವ ಈ ಟೂರ್ನಿ ಬಗ್ಗೆ ಉತ್ಸಾಹ ತಡೆದುಕೊಳ್ಳಲು ಆಗುತ್ತಿಲ್ಲ" ಎಂದಿದ್ದಾರೆ ಕ್ರಿಸ್ ಗೇಲ್.

ಕಿಚ್ಚ ಸುದೀಪ್ ಹೇಳಿದ್ದಿಷ್ಟು

ಇನ್ನು ಈ ವಿಭಿನ್ನ ಟೂರ್ನಿಯ ಬಗ್ಗೆ ಸ್ಯಾಂಡಲ್‌ವುಡ್‌ನ ಸೂಪರ್ ಸ್ಟಾರ್ ನಟ ಕಿಚ್ಚ ಸುದೀಪ್ ಕೂಡ ಹೇಳಿಕೆ ನೀಡಿದ್ದಾರೆ. "ಕ್ರಿಕೆಟ್, ಮನರಂಜನೆ ಹಾಗೂ ಕಾರ್ಪೊರೇಟ್ ಸೆಕ್ಟರ್‌ನಲ್ಲಿರುವ ಸ್ನೇಹಿತರೊಂದಿಗೆ ಒಗ್ಗೂಡಲು ಸೂಪರ್ 10 ಲೀಗ್ ಅದ್ಭುತವಾದ ಅವಕಾಶವಾಗಿದೆ. ನಾವು ಭಾರತೀಯರು ಕ್ರಿಕೆಟ್ ಅನ್ನು ಸಾಕಷ್ಟು ಪ್ರೀತಿಸುತ್ತೇವೆ. ಹಾಗಾಗಿ ನನ್ನಂಥಾ ನಟರಿಗೆ ಕ್ರೀಡೆಯ ಮೇಲಿನ ನಮ್ಮ ಉತ್ಸಾಹ ಮತ್ತು ನಮ್ಮ ಕೌಶಲ್ಯವನ್ನು ಪ್ರದರ್ಶಿಸಲು ಉತ್ತಮ ವೇದಿಕೆ ಇದಾಗಿದೆ. ಸಾಕಷ್ಟು ಮಜವಾದ ಆಟಗಳನ್ನು ಇಲ್ಲಿ ನಿರೀಕ್ಷಿಸಬಹುದು" ಎಂದಿದ್ದಾರೆ ಕಿಚ್ಚ ಸುದೀಪ್.

ಕ್ರಿಕೆಟ್ ಹಾಗೂ ಸಿನಿಮಾ ಲೋಕದ ಖ್ಯಾತನಾಮರು ಕಣಕ್ಕೆ

"ಈ ಕ್ರಿಕೆಟೈನ್‌ಮೆಂಟ್ ಪ್ರಯೋಗದ ಬಗ್ಗೆ ನಾವು ಕಳೆದ ಒಂದು ವರ್ಷದಿಂದ ಯೋಜನೆಗಳನ್ನು ರೂಪಿಸುತ್ತಿದ್ದೇವೆ. ಇದು ಮೊದಲ ಆವೃತ್ತಿಯಾಗಿದ್ದು ವೀಕ್ಷಕರಿಗೆ ಹೆಚ್ಚಿನ ಮನೋರಂಜನಾತ್ಮಕ ಆಟವನ್ನು ನೀಡಲು ನಾವು ಬದ್ಧರಾಗಿದ್ದೇವೆ. ವಿಶ್ವ ಮಟ್ಟದಲ್ಲಿ ಕ್ರಿಕೆಟ್‌ನ ಆಸಕ್ತಿಯನ್ನು ಮತ್ತಷ್ಟು ಹೆಚ್ಚಿಸುವುದು ಪಂದ್ಯಾವಳಿಯ ಆಶಯವಾಗಿದೆ. ಮನರಂಜನೆ ಮತ್ತು ಕ್ರಿಕೆಟ್ ಲೋಕದಲ್ಲಿ ಸಾಕಷ್ಟು ಖ್ಯಾತರಾಗಿರುವವನ್ನು ಸೇರ್ಪಡೆಗೊಳಿಸಲು ಯೋಜನೆ ರೂಪಿಸುತ್ತಿದ್ದೇವೆ. ಶೀಘ್ರದಲ್ಲೇ ಆ ಬಗ್ಗೆ ನಾವು ಘೊಷಣೆಗಳನ್ನು ಮಾಡಲಿದ್ದೇವೆ" ಎಂದು ಈ ಸೂಪರ್ 10 ಟೂರ್ನಿಯ ಫೌಂಡರ್ ಹಾಗೂ ಸಿಇಒ ದಿನೇಶ್ ಕುಮಾರ್ ಮಾಹಿತಿ ಹಂಚಿಕೊಂಡಿದ್ದಾರೆ.