ನಾವು ಪಂದ್ಯ ಗೆಲ್ಲುತ್ತಿದ್ದೆವು, ಆದರೆ..
'ನಾವು 2003ರ ವಿಶ್ವಕಪ್ ಪಂದ್ಯವನ್ನು ಗೆಲ್ಲುತ್ತಿದ್ದೆವು. ಆದರೆ ನಾವಂದು ವಿಶ್ವದ ಅತ್ಯುತ್ತಮ ತಂಡವಾದ ಆಸ್ಟ್ರೇಲಿಯಾ ವಿರುದ್ಧ ಮೈದಾನಕ್ಕಿಳಿದಿದ್ದೆವು. ಆವತ್ತು ಆಸೀಸ್ ತಂಡ ನಾವು ಹತ್ತಿರಕ್ಕೂ ಹೋಗಲಾರದಂತ ಪ್ರದರ್ಶನ ನೀಡಿತ್ತು. ಆ ಪಂದ್ಯದಲ್ಲಿ ನಾವು ಸೋತೆವು. ನಾನು ಆ ಪಂದ್ಯದಲ್ಲಿ ಉತ್ತಮ ಆಟವೇನೂ ಆಡಲಿಲ್ಲ. ಆ ಪಂದ್ಯ ಗೆದ್ದಿದ್ದರೆ ನನ್ನ ವೃತ್ತಿ ಬದುಕಿಗೆ ವಿಶೇಷ ಗರಿ ಸೇರಿಕೊಳ್ಳುತ್ತಿತ್ತು. ಆದರೆ ಬದುಕಿನಲ್ಲಿ ನಡೆಯೋ ಎಲ್ಲವನ್ನು ನಾವು ನಿರೀಕ್ಷಿಸಿರಲ್ಲ ನೋಡಿ,' ಎಂದು ಶ್ರೀನಾಥ್ ಹೇಳಿದ್ದಾರೆ.
ರಿಕಿ ಪಾಂಟಿಂಗ್ ಅಬ್ಬರದಾಟ
ಜೋಹಾನ್ಸ್ಬರ್ಗ್ನ ವಾಂಡರರ್ಸ್ ಸ್ಟೇಡಿಯಂನಲ್ಲಿ 2003ರ ಮಾರ್ಚ್ 23ರಂದು ಈ ವಿಶ್ವಕಪ್ ಫೈನಲ್ ಪಂದ್ಯ ನಡೆದಿತ್ತು. ಟಾಸ್ ಸೋತು ಬ್ಯಾಟಿಂಗ್ಗೆ ಇಳಿಸಲ್ಪಟ್ಟ ರಿಕಿ ಪಾಂಟಿಂಗ್ ನಾಯಕತ್ವದ ಆಸ್ಟ್ರೇಲಿಯಾ ತಂಡ, ಆ್ಯಡಮ್ ಗಿಲ್ಕ್ರಿಸ್ಟ್ 57, ಮ್ಯಾಥ್ಯೂ ಹೇಡನ್ 37, ರಿಕಿ ಪಾಂಟಿಂಗ್ ಅಜೇಯ 140 (121 ಎಸೆತ), ಡೇಮಿಯನ್ ಮಾರ್ಟಿನ್ 88 ರನ್ನೊಂದಿಗೆ 50 ಓವರ್ಗೆ 2 ವಿಕೆಟ್ ನಷ್ಟದಲ್ಲಿ 359 ರನ್ ಗಳಿಸಿತ್ತು.
ಉಳಿದಿದ್ದ ದಾರಿ ಅದೊಂದೇ
ಮಾತು ಮುಂದುವರೆಸಿದ ಶ್ರೀನಾಥ್, 'ಒಂದುವೇಳೆ ಮೊದಲು ಬ್ಯಾಟಿಂಗ್ ಮಾಡಿದ್ದರೆ ಗೆಲ್ಲಲಾಗುತ್ತಿತ್ತಾ ಎಂದು ನಾವು ಈ ಮೊದಲು ಮಾತನಾಡಿದ್ದೇವೆ. ಆದರೆ ಆಸೀಸ್ ಅಗಾಧ ಅನುಭವಿ ತಂಡವಾಗಿತ್ತು. ಅವರದ್ದು ಅತ್ಯುತ್ತಮ ತಂಡವಾಗಿತ್ತು ಅಂತ ನಾನು ಭಾವಿಸುತ್ತೇನೆ. ಇದೇ ತಂಡ ಹಿಂದೆಯೂ ವಿಶ್ವಕಪ್ ಗೆದ್ದಿತ್ತು. ನನ್ನ ಪ್ರಕಾರ ಆವತ್ತು ನಾವು ನಮ್ಮ ಸಾಮರ್ಥ್ಯಕ್ಕೆ ಎರಡುಪಟ್ಟು ಹೆಚ್ಚಿಗೆ ಆಡುತ್ತಿದ್ದರೆ ಬಹುಶಃ ನಾವು ಪಂದ್ಯ ಗೆಲ್ಲುತ್ತಿದ್ದೆವೋ ಏನೊ. ಅದೇ ಉಳಿದಿದ್ದ ಒಳ್ಳೆಯ ದಾರಿಯಾಗಿತ್ತು,' ಎಂದಿದ್ದಾರೆ.
ಶ್ರೀನಾಥ್, ನೆಹ್ರಾ ನೀರಸ ಬೌಲಿಂಗ್
ಅಂದಿನ ಪಂದ್ಯದಲ್ಲಿ ಆಸ್ಟ್ರೇಲಿಯಾ ನೀಡಿದ್ದ 360 ರನ್ ಗುರಿ ಬೆನ್ನಟ್ಟಿದ ಭಾರತ, ವೀರೇಂದ್ರ ಸೆಹ್ವಾಗ್ 82, ಸೌರವ್ ಗಂಗೂಲಿ 24, ರಾಹುಲ್ ದ್ರಾವಿಡ್ 47, ಯುವರಾಜ್ ಸಿಂಗ್ 24 ಗಮನಾರ್ಹ ರನ್ನೊಂದಿಗೆ 39.2 ಓವರ್ಗೆ ಎಲ್ಲಾ ವಿಕೆಟ್ ಕಳೆದು 234 ರನ್ ಬಾರಿಸಿ 125 ರನ್ನಿಂದ ಸೋತಿತ್ತು. ಗ್ಲೆನ್ ಮೆಗ್ರಾತ್ 3, ಬ್ರೆಟ್ ಲೀ 2, ಆ್ಯಂಡ್ರ್ಯೂ ಸೈಮಂಡ್ಸ್ 2, ಬ್ರಾಡ್ ಹಾಗ್ ಮತ್ತು ಆ್ಯಂಡಿ ಬಿಚೆಲ್ ತಲಾ 1 ವಿಕೆಟ್ ಮುರಿದು ಪಾರಮ್ಯ ಮೆರೆದಿದ್ದರು. ಆವತ್ತು ಆಸ್ಟ್ರೇಲಿಯಾದ 2 ವಿಕೆಟ್ ಉರುಳಿಸಿದ್ದು ಸ್ಪಿನ್ನರ್ ಹರ್ಭಜನ್ ಸಿಂಗ್ ಒಬ್ಬರೆ. ಇನ್ನು ಝಹೀರ್ ಖಾನ್ 67, ಜಾವಗಲ್ ಶ್ರೀನಾಥ್ 87, ಆಶಿಷ್ ನೆಹ್ರಾ 57 ರನ್ ನೀಡಿದ್ದರು, ಆದರೆ ಒಂದೂ ವಿಕೆಟ್ ಪಡೆದಿರಲಿಲ್ಲ.