ಭರ್ಜರಿ ಫಾರ್ಮ್‌ನಲ್ಲಿ ಕೆ.ಎಲ್ ರಾಹುಲ್: ಕೊಹ್ಲಿ ದಾಖಲೆ ಮುರಿದ ಕನ್ನಡಿಗ

ರಾಹುಲ್ ದಾಖಲೆಯೇನು

ಕೆ.ಎಲ್ ರಾಹುಲ್ ಸರಣಿಯಲ್ಲಿ ಒಟ್ಟಾರೆ 224 ರನ್‌ ಗಳಿಸಿದ್ದಾರೆ. ದ್ವಿಪಕ್ಷೀಯ ಟಿ20 ಸರಣಿಯಲ್ಲಿ ಇದು ಭಾರತೀಯ ಆಟಗಾರನೋರ್ವನ ಅತಿ ಹೆಚ್ಚು ರನ್‌ ಆಗಿದೆ. ಈ ಹಿಂದೆ ವಿರಾಟ್ ಕೊಹ್ಲಿ ಈ ದಾಖಲೆಯನ್ನು ತನ್ನ ಹೆಸರಿನಲ್ಲಿ ಬರೆದುಕೊಂಡಿದ್ದರು. 3 ಪಂದ್ಯಗಳ ಸರಣಿಯಲ್ಲಿ ಕೊಹ್ಲಿ 199 ರನ್ ಗಳಿಸಿದ್ದು ದಾಖಲೆಯಾಗಿತ್ತು.

ಒಟ್ಟಾರೆ 2ನೇ ಸ್ಥಾನದಲ್ಲಿ ರಾಹುಲ್

ಕೆ.ಎಲ್ ರಾಹುಲ್ ಈ ದಾಖಲೆಯ ಪಟ್ಟಿಯಲ್ಲಿ ಒಟ್ಟಾರೆಯಾಗಿ ಎರಡನೇ ಸ್ಥಾನದಲ್ಲಿದ್ದಾರೆ. ಮೊದಲನೇ ಸ್ಥಾನದಲ್ಲಿ ಸರಣಿಯೊಂದರಲ್ಲಿ 233 ರನ್ ಗಳಿಸಿರುವ ಮೊಝಾಂಬಿಕ್ ದೇಶದ ಡ್ಯಾಮಿಯಾವೋ ಕುವಾನಾ ಎಂಬ ಆಟಗಾರ ಈ ಪಟ್ಟಿಯಲ್ಲಿ ಮೊದಲ ಸ್ಥಾನವನ್ನು ಅಲಂಕರಿಸಿದ್ದಾರೆ. ಮೂರನೇ ಸ್ಥಾನದಲ್ಲಿ ನ್ಯೂಜಿಲ್ಯಾಂಡ್ ತಂಡದ ಕಾಲಿನ್ ಮನ್ರೋ ಇದ್ದಾರೆ.

ಸರಣಿಯಲ್ಲಿ ಎರಡು ಜವಾಬ್ಧಾರಿ ವಹಿಸಿಕೊಂಡು ಗೆದ್ದ ರಾಹುಲ್

ಈ ಸರಣಿಯಲ್ಲಿ ಕೆಎಲ್ ರಾಹುಲ್‌ಗೆ ಎರಡು ಜವಾಬ್ಧಾರಿಯನ್ನು ನೀಡಲಾಗಿತ್ತು. ಆರಂಭಿಕನಾಗಿ ಭಡ್ತಿ ಪಡೆದ ರಾಹುಲ್ ಈ ಸರಣಿಯುದ್ದಕ್ಕೂ ವಿಕೆಟ್ ಕೀಪರ್ ಆಗಿಯೂ ಜವಾಬ್ಧಾರಿಯನ್ನು ಹೊತ್ತಿದ್ದರು. ಈ ಎರಡೂ ಜವಾಬ್ಧಾರಿಯನ್ನು ಯಶಸ್ವಿಯಾಗಿ ನಿರ್ವಹಿಸಿ ಮನಗೆದ್ದರು.

ಅಂತಿಮ ಪಂದ್ಯದಲ್ಲಿ ನಾಯಕನೂ ಆದ ರಾಹುಲ್

ಕೆಎಲ್ ರಾಹುಲ್ ತನಗೆ ನೀಡಿದ ಎಲ್ಲಾ ಜವಾಬ್ದಾರಿಯನ್ನು ಯಶಸ್ವಿಯಾಗಿ ನಿರ್ವಹಿಸಿದ್ದಾರೆ. ಈ ಮೂಲಕ ತಂಡದ ಆಪತ್ಭಾಂಧವ ಎಂಬ ಹೆಗ್ಗಳಿಕೆಯನ್ನೂ ಪಡೆದುಕೊಂಡಿದ್ದಾರೆ. ಇಂದಿನ ಪಂದ್ಯದಲ್ಲಿ ವಿರಾಟ್ ಕೊಹ್ಲಿ ವಿಶ್ರಾಂತಿ ಪಡೆದ ಕಾರಣ ರೋಹಿತ್ ನಾಯಕರಾಗಿದ್ದರು. ಆದರೆ ಬ್ಯಾಟಂಗ್ ವೇಳೆ ಗಾಯಗೊಂಡಕಾರಣ ಫೀಲ್ಡಿಂಗ್ ವೇಳೆ ಅಂಗಳಕ್ಕೆ ಇಳಿಯಲಿಲ್ಲ. ಈ ಸಂದರ್ಭದಲ್ಲಿ ಬದಲಿ ನಾಯಕನಾಗಿಯೂ ರಾಹುಲ್ ಕರ್ತವ್ಯ ನಿರ್ವಹಿಸಿ ಸೈ ಎನಿಸಿಕೊಂಡರು.