|
ಕಂಟಕ ತಂದ ಅಭಿಮಾನಿ
ಆಸ್ಟ್ರೇಲಿಯಾದ ಚಾಡ್ಸ್ಟೋನ್ ಶಾಪಿಂಗ್ ಸೆಂಟರ್ನ ಸೀಕ್ರೆಟ್ ಕಿಚನ್ ಚೈನೀಸ್ ರೆಸ್ಟೋರೆಂಟ್ನಲ್ಲಿ ತನ್ನ ಪಕ್ಕದಲ್ಲೇ ಕೂತಿದ್ದ ಭಾರತೀಯ ಆಟಗಾರರ ಬಿಲ್ ಅನ್ನು (118 ಆಸ್ಟ್ರೇಲಿಯಾನ್ ಡಾಲರ್ ಅಥವಾ 6,628.22 ರೂ.) ತಾನು ಪಾವತಿಸಿದ್ದೆ ಎಂದು ಭಾರತೀಯ ಅಭಿಮಾನಿ ನವದೀಪ್ ಸಿಂಗ್ ಎಂಬವರು ಟ್ವಿಟರ್ನಲ್ಲಿ ಹೇಳಿಕೊಂಡಿದ್ದರು. ವಿಡಿಯೋಗಳನ್ನು ಹಾಕಿದ್ದರು. ತಾನು ಆಟಗಾರರನ್ನು ಮಾತನಾಡಿಸಿದ್ದೆ ಎಂದೂ ಹೇಳಿದ್ದರು. ಅಭಿಮಾನಿಯ ಪೋಸ್ಟ್ ಗಮನಕ್ಕೆ ಬರುತ್ತಲೇ ಬಿಸಿಸಿಐ ಮತ್ತು ಕ್ರಿಕೆಟ್ ಆಸ್ಟ್ರೇಲಿಯಾ ಅಲರ್ಟ್ ಆಗಿದೆ.
ಹೋಟೆಲ್ಗೆ ಹೋಗುವಂತಿಲ್ಲವೆ?
ಬಯೋ ಬಬಲ್ ಒಳಗಿರುವ ಆಟಗಾರರು ರೆಸ್ಟೋರೆಂಟ್ಗಳಿಗೆ ಹೋಗುವಂತಿಲ್ಲವೆ? ಇದೆ. ಕ್ರಿಕೆಟ್ ಆಸ್ಟ್ರೇಲಿಯಾದ ಬಯೋಬಬಲ್ ನಿಯಮದ ಪ್ರಕಾರ, ಆಟಗಾರರು ಊಟಕ್ಕೆ ರೆಸ್ಟೋರೆಂಟ್ಗಳಿಗೆ ಹೊರಗೆ ಹೋಗಬಹುದು. ಆದರೆ ಇಂಡೋರ್ ಒಳಗೆ ಕೂರುವಂತಿಲ್ಲ. ಔಟ್ ಡೋರ್ನಲ್ಲಿ ಕೂತು ತಿನ್ನಬಹುದು. ಆದರೆ ಅಭಿಮಾನಿ ಪೋಸ್ಟ್ ಮಾಡಿರುವ ಚಿತ್ರಗಳಲ್ಲಿ ಭಾರತದ ಆಟಗಾರರು ಇಂಡೋರ್ನಲ್ಲಿ ಕೂತಿರುವುದು ದಾಖಲಾಗಿದೆ. ಜೊತೆಗೆ ಯಾರ ಮುಖದಲ್ಲೂ ಮಾಸ್ಕ್ ಕೂಡ ಇರಲಿಲ್ಲ.
ಆಟಗಾರರ ಮುಂದಿನ ಕತೆಯೇನು?
ಅಭಿಮಾನಿ ಮಾಡಿರುವ ಪೋಸ್ಟ್ನಿಂದ ಭಾರತದ ಆಟಗಾರರಿಗೆ ಸಮಸ್ಯೆ ಎದುರಾಗಿದೆ. ಹೋಟೆಲ್ನಲ್ಲಿ ಆಟಗಾರರು ಮತ್ತು ಅಭಿಮಾನಿ ಭೇಟಿಯಾಗಿದ್ದಾಗ ಅಭಿಮಾನಿ ನವದೀಪ್ ಅವರು ಬ್ಯಾಟ್ಸ್ಮನ್ ಕಮ್ ವಿಕೆಟ್ ಕೀಪರ್ ರಿಷಭ್ ಪಂತ್ ಅವರನ್ನು ಅಪ್ಪಿಕೊಂಡಿರುವ ಅನುಮಾನವೂ ಇದೆ. ಹೀಗಾಗಿ ಘಟನೆಯಲ್ಲಿ ತಗುಲುಹಾಕಿಕೊಂಡಿರುವ ರೋಹಿತ್ ಶರ್ಮಾ, ರಿಷಭ್ ಪಂತ್, ಶುಬ್ಮನ್ ಗಿಲ್, ಪೃಥ್ವಿ ಶಾ, ನವದೀಪ್ ಸೈನಿಗೆ ಮುನ್ನೆಚ್ಚರಿಕಾ ಕ್ರಮವಾಗಿ ಮತ್ತೆ ಕ್ವಾರಂಟೈನ್ ವಿಧಿಸಲಾಗುತ್ತದೆ. ಈ 5 ಆಟಗಾರರು ಪ್ರತ್ಯೇಕವಾಗಿ ಪ್ರಯಾಣ, ಅಭ್ಯಾಸ ನಡೆಸಲಿದ್ದಾರೆ.