ಇಂಗ್ಲೆಂಡ್ vs ಭಾರತ: ವಿಶ್ವಕಪ್‌ ಮುಖಾಮುಖಿಯ ಕುತೂಹಕಾರಿ ಅಂಕಿ-ಅಂಶ!

ಇಂಗ್ಲೆಂಡ್ ಸೋತರೆ ಕಂಟಕ

ಟೂರ್ನಿಯ ಆರಂಭದಲ್ಲಿ ಗೆಲುವಿನ ಹಾದಿ ತುಳಿದಿದ್ದ ಇಂಗ್ಲೆಂಡ್ ಸೆಮಿಫೈನಲ್‌ಗೆ ನಿರಾಯಾಸವಾಗಿ ಪ್ರವೇಶಿಸುವ ನಿರೀಕ್ಷೆ ಮೂಡಿಸಿತ್ತು. ಆದರೆ ಲೀಗ್ ಹಂತದ ಕೊನೇ ಗಳಿಗೆಗಳಲ್ಲಿ ಆಂಗ್ಲರ ಲೆಕ್ಕಾಚಾರ ಉಲ್ಟಾ ಆಗಿದೆ. ಇಂಗ್ಲೆಂಡ್ ಆಡಿರುವ 7 ಪಂದ್ಯಗಳಲ್ಲಿ 3 ಪಂದ್ಯಗಳನ್ನು ಸೋತು ವಿಶ್ವಕಪ್ ಅಂಕಪಟ್ಟಿಯಲ್ಲಿ 5ನೇ ಸ್ಥಾನಕ್ಕೆ ಕುಸಿದಿದೆ. ಕೊಹ್ಲಿ ಬಳಗ ಮಾತ್ರ ಈ ಬಾರಿಯ ವಿಶ್ವಕಪ್‌ನಲ್ಲಿ ಸೋಲೇ ಕಂಡಿರದ ತಂಡವಾಗಿ ಗುರುತಿಸಿಕೊಂಡಿದೆ. ಭಾರತ 6ರಲ್ಲಿ 5 ಪಂದ್ಯ ಗೆದ್ದು ಮತ್ತೊಂದನ್ನು ರದ್ದಾಗಿಸಿಕೊಂಡಿದೆ. ಇಂಗ್ಲೆಂಡ್ ವಿರುದ್ಧ ಭಾರತ ಗೆದ್ದರೆ ಇಂಗ್ಲೆಂಡ್ ಸೆಮಿಫೈನಲ್ ಹಾದಿ ಇನ್ನಷ್ಟು ದುರ್ಗಮವಾಗಲಿದೆ.

ಮುಖಾಮುಖಿ ಸಮಬಲ

ವಿಶ್ವಕಪ್ ನಲ್ಲಿ ಈವರೆಗೆ ಇಂಗ್ಲೆಂಡ್ ಮತ್ತು ಭಾರತ ಒಟ್ಟಿಗೆ 7 ಸಾರಿ ಮುಖಾಮುಖಿಯಾಗಿವೆ. ಇದರಲ್ಲಿ ಭಾರತ 3 ಪಂದ್ಯಗಳನ್ನು ಗೆದ್ದಿದ್ದರೆ, ಇಂಗ್ಲೆಂಡ್ 3 ಪಂದ್ಯಗಳನ್ನು ಜಯಿಸಿತ್ತು. ಇನ್ನೊಂದು ಪಂದ್ಯ ಟೈ ಅನ್ನಿಸಿಕೊಂಡಿತ್ತು. ಈ ಅಂಕಿ-ಅಂಶಗಳ ಪ್ರಕಾರ ಜೂನ್ 30ರ ಪಂದ್ಯ ಜಿದ್ದಾಜಿದ್ದಿ ಅನ್ನಿಸುವುದರಲ್ಲಿ ಸಂಶಯವೇ ಇಲ್ಲ.

ಬಾಂಗ್ಲಾ-ಪಾಕ್‌ಗೆ ಅವಕಾಶ

ಭಾರತ ವಿರುದ್ಧ ಈ ಕುತೂಹಲಕಾರಿ ಪಂದ್ಯವನ್ನು ಇಂಗ್ಲೆಂಡ್ ಏನಾದರೂ ಸೋತುಬಿಟ್ಟರೆ ಇಂಗ್ಲೆಂಡ್ ತಂಡ ಲೀಗ್ ಹಂತದ ಸ್ಪರ್ಧೆಯಲ್ಲಿ ಮುನ್ನಡೆ ಸಾಧಿಸಲಾರದು. ಅಂದರೆ ಇಂಗ್ಲೆಂಡ್ ಸೆಮಿಫೈನಲ್ ಪ್ರವೇಶ ಕಷ್ಟವಾಗಲಿದೆ. ಯಾಕೆಂದರೆ ಸೆಮಿಫೈನಲ್‌ನತ್ತ ಕಣ್ಣಿಟ್ಟಿರುವ ಪಾಕಿಸ್ತಾನ ಮತ್ತು ಬಾಂಗ್ಲಾದೇಶಗಳು ಅವಕಾಶಗಳನ್ನು ಬಳಸಿಕೊಳ್ಳಲಿವೆ. ಸದ್ಯದ ಅಂಕಪಟ್ಟಿಯಲ್ಲಿ ಮೊದಲ ಸ್ಥಾನದಲ್ಲಿ ಆಸ್ಟ್ರೇಲಿಯಾ ಅನಂತರದ ಸ್ಥಾನಗಳಲ್ಲಿ ಭಾರತ, ನ್ಯೂಜಿಲೆಂಡ್, ಪಾಕಿಸ್ತಾನ, ಇಂಗ್ಲೆಂಡ್, ಬಾಂಗ್ಲಾದೇಶ ತಂಡಗಳಿವೆ. ಆದರೆ ಇಂಗ್ಲೆಂಡ್‌ಗೆ ಸೆಮಿಫೈನಲ್ ನಿಟ್ಟಿನಲ್ಲಿ ನೆರವಾಗಬಲ್ಲ ಅಂಶವೆಂದರೆ ನೆಟ್ ರನ್ ರೇಟ್. ಇಂಗ್ಲೆಂಡ್ +1.051 ರನ್ ರೇಟ್ ಹೊಂದಿದ್ದರೆ, ಪಾಕ್ -0.792 ರನ್‌ ರೇಟ್ ಗಳಿಸಿದೆ.

ಮೊದಲು ಗೆದ್ದಿದ್ದು ಇಂಗ್ಲೆಂಡ್

ಭಾರತ-ಇಂಗ್ಲೆಂಡ್ ವಿಶ್ವಕಪ್‌ನಲ್ಲಿ ಮೊದಲ ಮುಖಾಮುಖಿಯಾಗಿದ್ದು 1975ರಲ್ಲಿ ಲಾರ್ಡ್ಸ್‌ನಲ್ಲಿ ನಡೆದಿದ್ದ ಪಂದ್ಯದಲ್ಲಿ. ಇದರಲ್ಲಿ ಇಂಗ್ಲೆಂಡ್ ಭರ್ಜರಿ 202 ರನ್‌ಗಳಿಂದ ಗೆದ್ದಿತ್ತು. ಮುಂದೆ 1983 ರಲ್ಲಿ ಭಾರತ 6 ವಿಕೆಟ್ ಜಯ, 1987ರಲ್ಲಿ ಇಂಗ್ಲೆಂಡ್ 35 ರನ್ ಗೆಲುವು, 1992ರಲ್ಲಿ ಆಂಗ್ಲರು 9 ರನ್ ಜಯ, 1999ರಲ್ಲಿ ಭಾರತಕ್ಕೆ 63 ರನ್ ಗೆಲುವು, 2003ರಲ್ಲೀ ಭಾರತ 82 ರನ್ ಜಯಭೇರಿ ಬಾರಿಸಿತ್ತು. ಆದರೆ 2011ರ ಪಂದ್ಯ ಟೈ ಅನ್ನಿಸಿತ್ತು. ಆ ಪಂದ್ಯದಲ್ಲಿ ಎರಡೂ ತಂಡಗಳೂ 338 ರನ್ ಬಾರಿಸಿ ಸಮಬಲ ಸಾಧಿಸಿದ್ದವು.