ಐಎಸ್‌ಎಲ್‌ 2019: ನಾಲ್ಕರಲ್ಲೇ ಭದ್ರವಾದ ನಾರ್ತ್ ಈಸ್ಟ್ ಯುನೈಟೆಡ್

ಇತ್ತಂಡಗಳು ಮುಖಾಮುಖಿ

ಹೀರೋ ಇಂಡಿಯನ್ ಸೂಪರ್ ಲೀಗ್‌ನ 71ನೇ ಪಂದ್ಯದಲ್ಲಿ ನಾರ್ತ್ ಈಸ್ಟ್ ಯುನೈಟೆಡ್ ಹಾಗೂ ಡೆಲ್ಲಿ ಡೈನಮೋಸ್ ತಂಡಗಳು ಮುಖಾಮುಖಿಯಾದವು. ನಿರಂತರ ಎರಡು ಸೋಲುಗಳಿಂದ ಕಂಗೆಟ್ಟಿರುವ ನಾರ್ತ್ ಈಸ್ಟ್‌ಗೆ ನಾಲ್ಕನೇ ಸ್ಥಾನದಲ್ಲಿ ಉಳಿದುಕೊಳ್ಳಬೇಕಾದರೆ ಇಲ್ಲಿ ಜಯದ ಅಗತ್ಯವಿದೆ. ಏಕೆಂದರೆ ಈ ಸ್ಥಾನಕ್ಕಾಗಿ ಜೆಮ್ಷೆಡ್ಪುರ ಹಾಗೂ ಎಟಿಕೆ ತಂಡಗಳು ಈ ಸ್ಥಾನಕ್ಕಾಗಿ ಸ್ಪರ್ಧೆಯಲ್ಲಿರುವುದರಿಂದ ಮೂರು ತಂಡಗಳ ನಡುವೆ ಪೈಪೋಟಿ ಏರ್ಪಟ್ಟಿರುವುದು ಸಹಜ.

ತಂಡಕ್ಕೆ ಜಯದ ಅಗತ್ಯವಿದೆ

ಆದರೆ ಇಲ್ಲಿ ಪರ್ವತಪ್ರದೇಶದ ತಂಡಕ್ಕೆ ಜಯದ ಅಗತ್ಯವಿದೆ. ನಾರ್ತ್ ಈಸ್ಟ್ ಹಿಂದಿನ ಆರು ಪಂದ್ಯಗಳಲ್ಲಿ ಜಯ ಕಂದಿರುವುದು ಒಂದರಲ್ಲಿ ಮಾತ್ರ. ಜೆಮ್ಷೆಡ್ಪುರ ತಂಡಕ್ಕಿಂತ ಮೂರು ಅಂಕ ಮೇಲುಗೈ ಸಾಧಿಸಿರುವ ನಾರ್ತ್ ಈಸ್ಟ್‌ಗೆ ಇಲ್ಲಿನ ಜಯ ಮತ್ತಷ್ಟು ಆತ್ಮವಿಶ್ವಾಸವನ್ನು ಹೆಚ್ಚಿಸುವುದು ಸ್ಪಷ್ಟ. ಇಲ್ಲವಾದರಲ್ಲಿ ಈ ಸ್ಥಾನ ತಾತ್ಕಾಲಿಕವೆನಿಸಲಿದೆ.

ಅಧಿಕ ಗೋಲ್‌ನಲ್ಲಿ 2ನೇ ಸ್ಥಾನ

ನಾಯಕ ಬಾರ್ತಲೋಮ್ಯೊ ಒಗ್ಬಚೆ 10 ಗೋಲುಗಳನ್ನು ಗಳಿಸಿ ಅತಿ ಹೆಚ್ಚು ಗೋಲು ಗಳಿಸಿದ ಆಟಗಾರರ ಪಟ್ಟಿಯಲ್ಲಿ ಎರಡನೇ ಸ್ಥಾನದಲ್ಲಿದ್ದಾರೆ. ಗೋವಾದ ಫೆರಾನ್ ಕೊರೊಮಿನಾಸ್ ಅಗ್ರ ಸ್ಥಾನದಲ್ಲಿದ್ದಾರೆ. ಪ್ರವಾಸಿ ಡೆಲ್ಲಿ ತಂಡ ಅಂಕ ಪಟ್ಟಿಯಲ್ಲಿ ಎಂಟನೇ ಸ್ಥಾನದಲ್ಲಿದ್ದು, ಪ್ಲೇ ಆಫ್ನಿಂದ ದೂರ ಸರಿದಿದೆ. ಆದರೆ ಸತತ ಎರಡು ಪಂದ್ಯಗಳಲ್ಲಿ ಜಯ ಗಳಿಸಿ ಮುನ್ನಡೆವ ತಂಡಕ್ಕೆ ಆಘಾತ ನೀಡುವ ಲೆಕ್ಕಾಚಾರದಲ್ಲಿದೆ. ಗೋವಾ ವಿರುದ್ಧದ ಪಂದ್ಯದಲ್ಲಿ ಡ್ರಾ ಸಾಧಿಸಿರುವುದು ಡೆಲ್ಲಿ ತಂಡದ ಅದ್ಭುತ ಸಾಧನೆಯಾಗಿದೆ.

ಡೆಲ್ಲಿ ಗೆಲ್ಲಲೇಬೇಕು

ಸೆಮಿಫೈನಲ್ ಆಸೆಯನ್ನು ಜೀವಂತವಾಗಿರಿಸಿಕೊಳ್ಳುವ ಅವಕಾಶವನ್ನು ಹಸಿರಾಗಿಸಿಕೊಳ್ಳಬೇಕಾದರೆ ಡೆಲ್ಲಿಗೆ ಈ ಪಂದ್ಯದಲ್ಲಿ ಗೆಲ್ಲಲೇಬೇಕಾಗಿದೆ. ಡೆಲ್ಲಿ ತಂಡ ಕೊನೆಯ ಹದಿನೈದು ನಿಮಿಷಗಳ ಆಟದಲ್ಲಿ 15 ಗೋಲುಗಳನ್ನು ನೀಡಿರುವುದು ಗಮನಾರ್ಹ ಮತ್ತು ಆತಂಕ. ಅದೇ ರೀತಿ ಕೇರಳ ತಂಡ ಕೂಡ 9 ಗೋಲುಗಳನ್ನು ನೀಡಿದೆ. ಡೆಲ್ಲಿ ತಂಡ ಕಳೆದ ಮೂರು ಪಂದ್ಯಗಳಲ್ಲಿ ಕೇವಲ ಒಂದು ಗೋಲನ್ನು ಎದುರಾಳಿ ತಂಡಕ್ಕೆ ನೀಡಿದೆ. ಇತ್ತಂಡಗಳು ಆರು ಪಂದ್ಯಗಳಲ್ಲಿ ಮುಖಾಮುಖಿಯಾಗಿದ್ದು, ಮೂರು ಜಯ ಮೂರು ಡ್ರಾ ಕಂಡಿವೆ.