ಕೋಚ್ ರವಿಶಾಸ್ತ್ರಿಗೆ ಕುಂಬ್ಳೆಗಿಂತ 1.5 ಕೋಟಿ ರೂ ಹೆಚ್ಚು ಸಂಬಳ

ನವದೆಹಲಿ, ಜುಲೈ 19 : ಅನಿಲ್ ಕುಂಬ್ಳೆ ಅವರು ಕೇಳಿದ್ದ ವೇತನವನ್ನು ಕೊಡಲು ನಿರಾಕರಿಸಿದ್ದ ಭಾರತೀಯ ಕ್ರಿಕೆಟ್ ಮಂಡಳಿ, ಇದೀಗ ಹೊಸದಾಗಿ ಭಾರತ ತಂಡದ ಕೋಚ್ ಆಗಿ ಆಯ್ಕೆಯಾಗಿರುವ ರವಿಶಾಸ್ತ್ರಿ ಅವರಿಗೆ ಈ ಹಿಂದಿನ ಎಲ್ಲಾ ಕೋಚ್ ​ಗಳಿಗಿಂತ ಹೆಚ್ಚಿನ ವೇತನ ನೀಡಲು ನಿರ್ಧರಿಸಿದೆ.

ರವಿಶಾಸ್ತ್ರಿ ಅವರು ವಾರ್ಷಿಕ ಬರೋಬ್ಬರಿ 8 ಕೋಟಿ ರು. ಪಡೆಯಲಿದ್ದಾರೆ. ಅನಿಲ್ ಕುಂಬ್ಳೆ ಅವರು ಕೋಚ್ ಆಗಿದ್ದ ವೇಳೆ ಅವರಿಗೆ 6.5 ಕೋಟಿ ನೀಡಲಾಗಿತ್ತು. ಇದೀಗ ಬಿಸಿಸಿಐ ಶಾಸ್ತ್ರಿಗೆ ಅದಕ್ಕಿಂತ ಹೆಚ್ಚಿನ ಸಂಬಳ ಮತ್ತು ಸೌಲಭ್ಯಗಳನ್ನು ನೀಡಿದೆ.

ಇನ್ನು ಬೌಲಿಂಗ್​ ಕೋಚ್​ ಭರತ್​ ಅರುಣ್​ ಮತ್ತು ಸಹಾಯಕ ಕೋಚ್​ ಸಂಜಯ್​ ಬಂಗಾರ್​ ಹಾಗೂ ಫೀಲ್ಡಿಂಗ್​ ಕೋಚ್ ​ ಆಗಿರುವ ಆರ್​ ಶ್ರೀಧರ್​ ತಲಾ 2 ರಿಂದ 3 ಕೋಟಿ ರು. ವೇತನ ಪಡೆಯುವ ಸಾಧ್ಯತೆಗಳಿವೆ.

ಅನಿಲ್ ಕುಂಬ್ಳೆ ಅವರು ಕೋಚ್ ಆಗಿದ್ದ ವೇಳೆ ತಮ್ಮ ವೇತನವನ್ನು ಹೆಚ್ಚಿಸಿ ಎಂದು ಭಾರತೀಯ ಕ್ರಿಕೆಟ್ ಮಂಡಳಿಗೆ ಮನವಿ ಮಾಡಿದ್ದರು. ಆದರೆ, ಕುಂಬ್ಳೆ ಅವರ ಮನವಿಗೆ ಬಿಸಿಸಿಐ ನಿರಾಕರಿಸಿತ್ತು.