ಭಾವುಕರಾಗಿ ಎಲ್ಲಾ ಮಾದರಿಯ ಕ್ರಿಕೆಟ್‌ಗೆ ಗುಡ್‌ಬೈ ಹೇಳಿದ ಕನ್ನಡಿಗ ಸ್ಟುವರ್ಟ್ ಬಿನ್ನಿ

ಸ್ಟುವರ್ಟ್ ಬಿನ್ನಿ ಮೂಲತಃ ಬೆಂಗಳೂರಿನವರು

ಸ್ಟುವರ್ಟ್ ಬಿನ್ನಿ ಸಂಪೂರ್ಣ ಹೆಸರು ಲಾರ್ಡ್ ಸ್ಟುವರ್ಟ್ ಟೆರೆನ್ಸ್ ರೋಜರ್ ಬಿನ್ನಿ ಎಂದು. ಜೂನ್ 3, 1984 ರಲ್ಲಿ ಬೆಂಗಳೂರಿನಲ್ಲಿ ಜನಿಸಿದ ಸ್ಟುವರ್ಟ್ ಬಿನ್ನಿ ಅಪ್ಪಟ ಕನ್ನಡಿಗ. 2010 ರ ಇಂಡಿಯನ್ ಪ್ರೀಮಿಯರ್ ಲೀಗ್ ಟೂರ್ನಿಯಲ್ಲಿ ಮುಂಬೈ ಇಂಡಿಯನ್ಸ್ ತಂಡದ ಪರ ಆಟವಾಡಿದ್ದ ಸ್ಟುವರ್ಟ್ ಬಿನ್ನಿ 2011 ರಿಂದ 2015 ಮತ್ತು 2018 ರಿಂದ 2019 ರವರೆಗೆ ರಾಜಸ್ಥಾನ್ ರಾಯಲ್ಸ್ ಪರ ಕಣಕ್ಕಿಳಿದಿದ್ದರು. 2016 ರಿಂದ 2017 ರವರೆಗೆ ರಾಯಲ್ ಚಾಲೆಂಜರ್ಸ್ ಬೆಂಗಳೂರು ತಂಡದಲ್ಲಿ ಕೂಡ ಸ್ಟುವರ್ಟ್ ಬಿನ್ನಿ ಕಾಣಿಸಿಕೊಂಡಿದ್ದರು. ಇನ್ನು ಕರ್ನಾಟಕ ಪ್ರಿಮಿಯರ್ ಲೀಗ್ ಟೂರ್ನಿಯ 2017ರ ಆವೃತ್ತಿಯಲ್ಲಿ ಬೆಳಗಾವಿ ಪ್ಯಾಂಥರ್ಸ್ ತಂಡದ ಪರ ಸ್ಟುವರ್ಟ್ ಬಿನ್ನಿ ಕಣಕ್ಕಿಳಿದಿದ್ದರು. ಇನ್ನು ರಣಜಿ ಕ್ರಿಕೆಟ್‍ನಲ್ಲಿ 2003ರಿಂದ 2019ರವರೆಗೂ ಕರ್ನಾಟಕ ತಂಡವನ್ನು ಪ್ರತಿನಿಧಿಸಿದ್ದ ಸ್ಟುವರ್ಟ್ ಬಿನ್ನಿ 2019ರಿಂದೀಚೆಗೆ ನಾಗಾಲ್ಯಾಂಡ್ ತಂಡದ ಆಟಗಾರನಾಗಿದ್ದರು.

ಕ್ರಿಕೆಟ್ ನನ್ನ ರಕ್ತದಲ್ಲಿದೆ ಎಂದು ಭಾವುಕರಾದ ಸ್ಟುವರ್ಟ್ ಬಿನ್ನಿ

ಅಂತರರಾಷ್ಟ್ರೀಯ ಕ್ರಿಕೆಟ್‌ಗೆ ನಿವೃತ್ತಿಯನ್ನು ಘೋಷಿಸಿರುವ ಸ್ಟುವರ್ಟ್ ಬಿನ್ನಿ ನಿವೃತ್ತಿ ವೇಳೆ ತಮಗೆ ಕ್ರಿಕೆಟ್ ಜೀವನದಲ್ಲಿ ಬೆಂಬಲ ಸೂಚಿಸಿದ ಹಲವಾರು ಫ್ರಾಂಚೈಸಿಗಳು, ಬಿಸಿಸಿಐ ಮತ್ತು ಕುಟುಂಬಸ್ಥರಿಗೆ ಭಾವನಾತ್ಮಕವಾಗಿ ಕೃತಜ್ಞತೆಯನ್ನು ಸಲ್ಲಿಸುವುದರ ಮೂಲಕ ತಮ್ಮ ಕ್ರಿಕೆಟ್ ಪ್ರಯಾಣವನ್ನು ನೆನಪಿಸಿಕೊಂಡಿದ್ದಾರೆ. ಅಂತರರಾಷ್ಟ್ರೀಯ ಮಟ್ಟದಲ್ಲಿ ಟೀಮ್ ಇಂಡಿಯಾವನ್ನು ಪ್ರತಿನಿಧಿಸಿದ್ದು ಹೆಮ್ಮೆಯ ವಿಷಯ ಎಂದು ಸಂತಸ ವ್ಯಕ್ತಪಡಿಸಿದ ಸ್ಟುವರ್ಟ್ ಬಿನ್ನಿ ಈ ಅವಕಾಶವನ್ನು ಕೊಟ್ಟ ಬಿಸಿಸಿಐಗೆ ಕೃತಜ್ಞತೆಯನ್ನು ಸಲ್ಲಿಸಿದ್ದಾರೆ. ಹಾಗೂ ಕರ್ನಾಟಕ ರಾಜ್ಯ ಕ್ರಿಕೆಟ್ ಬೋರ್ಡ್‌ಗೂ ತಮ್ಮ ಧನ್ಯವಾದಗಳನ್ನು ಅರ್ಪಿಸಿರುವ ಸ್ಟುವರ್ಟ್ ಬಿನ್ನಿ ಇಂಡಿಯನ್ ಪ್ರೀಮಿಯರ್ ಲೀಗ್ ಟೂರ್ನಿಯಲ್ಲಿ ತಮ್ಮನ್ನು ಆಯ್ಕೆ ಮಾಡಿಕೊಂಡಿದ್ದ ಮುಂಬೈ ಇಂಡಿಯನ್ಸ್, ರಾಜಸ್ತಾನ್ ರಾಯಲ್ಸ್ ಮತ್ತು ರಾಯಲ್ ಚಾಲೆಂಜರ್ಸ್ ಬೆಂಗಳೂರು ತಂಡಗಳಿಗೂ ತಮ್ಮ ಕೃತಜ್ಞತೆಗಳನ್ನು ಅರ್ಪಿಸಿದ್ದಾರೆ. ಕೊನೆಯದಾಗಿ ತಮ್ಮ ಬೆಂಬಲಕ್ಕೆ ನಿಂತ ಸ್ನೇಹಿತರು ಮತ್ತು ಕುಟುಂಬಸ್ಥರಿಗೆ ಕೃತಜ್ಞತೆಯನ್ನು ಅರ್ಪಿಸಿರುವ ಸ್ಟುವರ್ಟ್ ಬಿನ್ನಿ ಕ್ರಿಕೆಟ್ ತನ್ನ ರಕ್ತದಲ್ಲಿ ಸದಾ ಹರಿಯುತ್ತದೆ ಎಂದು ಹೇಳುತ್ತಾ ಭಾವುಕರಾಗಿದ್ದಾರೆ.

ಶ್ರೀಲಂಕಾ ಕ್ರಿಕೆಟ್ ಮಂಡಳಿಯಿಂದ RCB ಗೆ ಸಿಹಿ ಸುದ್ದಿ!! | Oneindia Kannada

ಸ್ಟುವರ್ಟ್ ಬಿನ್ನಿ ತಂದೆ ಕೂಡ ವಿಶ್ವಕಪ್ ಗೆದ್ದ ತಂಡದ ಆಟಗಾರ

ಸ್ಟುವರ್ಟ್ ಬಿನ್ನಿ ಅವರ ತಂದೆ ರೋಜರ್ ಬಿನ್ನಿ ತಮ್ಮ ಅತ್ಯದ್ಭುತ ಬೌಲಿಂಗ್ ಪ್ರದರ್ಶನದಿಂದ ಖ್ಯಾತಿಯನ್ನು ಪಡೆದಿದ್ದರು. ರೋಜರ್ ಬಿನ್ನಿ ಭಾರತ ಅಂತರರಾಷ್ಟ್ರೀಯ ತಂಡದಲ್ಲಿ ಸ್ಥಾನ ಪಡೆದುಕೊಂಡು ಬೌಲಿಂಗ್ ವಿಭಾಗದಲ್ಲಿ ಮಿಂಚಿ ಖ್ಯಾತಿಯನ್ನು ಪಡೆದಿದ್ದರು. 1983 ರಲ್ಲಿ ಅಂತರರಾಷ್ಟ್ರೀಯ ಏಕದಿನ ವಿಶ್ವಕಪ್ ಟ್ರೋಫಿ ಗೆದ್ದಿದ್ದ ಟೀಮ್ ಇಂಡಿಯಾ ತಂಡದಲ್ಲಿ ರೋಜರ್ ಬಿನ್ನಿ ಕೂಡ ಸ್ಥಾನ ಪಡೆದುಕೊಂಡಿದ್ದರು. 1983ರ ವಿಶ್ವಕಪ್ ಟೂರ್ನಿಯಲ್ಲಿ ಭಾಗವಹಿಸಿದ್ದ ರೋಜರ್ ಬಿನ್ನಿ 18 ವಿಕೆಟ್ ಪಡೆದುಕೊಳ್ಳುವುದರ ಮೂಲಕ ಟೂರ್ನಿಯಲ್ಲಿ ಅತಿಹೆಚ್ಚು ವಿಕೆಟ್ ಪಡೆದ ಬೌಲರ್ ಎಂಬ ಹೆಗ್ಗಳಿಕೆಗೆ ಪಾತ್ರರಾಗಿದ್ದರು. ಹಾಗೂ 1985ರಲ್ಲಿ ಆಸ್ಟ್ರೇಲಿಯಾದಲ್ಲಿ ನಡೆದ ವರ್ಲ್ಡ್ ಸೀರೀಸ್ ಕ್ರಿಕೆಟ್ ಚಾಂಪಿಯನ್‍ಶಿಪ್ ಟೂರ್ನಿಯಲ್ಲಿಯೂ 17 ವಿಕೆಟ್ ಪಡೆದಿದ್ದ ರೋಜರ್ ಬಿನ್ನಿ ಅತಿ ಹೆಚ್ಚು ವಿಕೆಟ್ ಪಡೆದ ಬೌಲರ್ ಎನಿಸಿಕೊಂಡಿದ್ದರು.