ಶತಕ ಸಿಡಿಸಿ ಗೆಲ್ಲಿಸಿದ ರಾಸ್ ಟೇಯ್ಲರನ್ನು ಹರ್ಭಜನ್ ಪ್ರಶ್ನೆ ಮಾಡಿದ್ದು ಈ 'ವಿಚಿತ್ರ' ಕಾರಣಕ್ಕೆ!!

ಭಜ್ಜಿ ಪ್ರಶ್ನೆಗೆ ಕಾರಣವೇನು!

ಅಷ್ಟಕ್ಕೂ ಭಜ್ಜಿ ಟೇಯ್ಲರನ್ನು ಪ್ರಶ್ನೆ ಮಾಡಿದ್ದು ಕ್ರಿಕೆಟ್ ಆಟದ ವಿಚಾರಕ್ಕಲ್ಲ.ರಾಸ್ ಟೇಯ್ಲರ್ ಶತಕ ಸಿಡಿಸಿದ ಬಳಿಕ ಹೆಲ್ಮೆಟ್ ಎತ್ತಿ ಸಂಭ್ರಮಿಸುವ ಸಂದರ್ಭದಲ್ಲಿ ತನ್ನ ನಾಲಗೆಯನ್ನು ಹೊರಚಾಚಿಯೇ ಇರುತ್ತಾರೆ. ಈ ವಿಚಿತ್ರ ಮ್ಯಾನರಿಸಮ್ ಬಗ್ಗೆ ಅಭಿಮಾನಿಗಳಿಗೂ ಕುತೂಹಲ ಇದ್ದೇ ಇದೆ. ಆದರೆ ಯಾರೂ ಪ್ರಶ್ನಿಸಿರಲಿಲ್ಲ. ಆದರೆ ಹರ್ಭಜನ್ ಈ ಬಗ್ಗೆ ಪ್ರಶ್ನೆ ಮಾಡಿಯೇ ಬಿಟ್ಟಿದ್ದಾರೆ.

ಹೊಗಳಿ ಕಾಲೆಳೆದ ಹರ್ಭಜನ್:

ಟೀಮ್ ಇಂಡಿಯಾ ವಿರುದ್ಧದ ಮೊದಲ ಏಕದಿನ ಪಂದ್ಯದಲ್ಲಿ ಶತಕ ಸಿಡಿಸಿದ ಟೇಲರ್‌ ಅವರಿಗೆ ಹರ್ಭಜನ್ ಅಭಿನಂದನೆ ಸಲ್ಲಿಸಿ ಅದ್ಭುತ ಆಟ ಎಂದು ಹೊಗಳಿದ್ದಾರೆ. ಇದರ ಜೊತೆಗೇ ಪ್ರತಿ ಬಾರಿ ಶತಕ ಸಿಡಿಸಿದಾಗಲೂ ನಾಲಗೆ ಹೊರಹಾಕುತ್ತೀರಾ ಯಾಕೆ? ಎಂದು ಪ್ರಶ್ನೆ ಕೇಳಿದ್ದಾರೆ. ಆದರೆ ಇದಕ್ಕೆ ಟೇಯ್ಲರ್ ಈವರೆಗೂ ಪ್ರತಿಕ್ರಿಯೆ ನೀಡಿಲ್ಲ.

ನಾಲ್ಕನೇ ಕ್ರಮಾಂಕದಲ್ಲಿ ಅತಿಹೆಚ್ಚು ಶತಕ:

ರಾಸ್ ಟೇಯ್ಲರ್ ನಾಲ್ಕನೇ ಕ್ರಮಾಂಕದಲ್ಲಿ ಆಡುವ ಆಟಗಾರ. 19 ಶತಕ ಸಿಡಿಸಿರುವ ಟೇಯ್ಲರ್ ಈ ಕ್ರಮಾಂಕದಲ್ಲಿ ಅತಿ ಹೆಚ್ಚು ಶತಕ ಸಿಡಿಸಿದ ದಾಖಲೆ ಹೊಂದಿದ್ದಾರೆ. ಎರಡನೇ ಈ ಕ್ರಮಾಂಕದಲ್ಲಿ ಸ್ಥಾನದಲ್ಲಿ 15 ಶತಕ ಸಿಡಿಸಿದ ದಕ್ಷಿಣ ಆಫ್ರಿಕಾದ ಆಟಗಾರ ಎಬಿಡಿ ವಿಲಿಯರ್ಸ್ ಇದ್ದಾರೆ.

84 ಎಸೆತಗಳಲ್ಲಿ 109ರನ್ ಸಿಡಿಸಿದ ಟೇಯ್ಲರ್:

ಟೀಮ್ ಇಂಡಿಯಾ ವಿರುದ್ಧದ ಮೊದಲ ಏಕದಿನ ಪಂದ್ಯದಲ್ಲಿ ನ್ಯೂಜಿಲೆಂಡ್ ತಂಡ ಗೆದ್ದುಕೊಂಡಿದೆ. ಟೀಮ್ ಇಂಡಿಯಾ ನೀಡಿದ 348ರನ್‌ಗಳ ಬೃಹತ್ ಗುರಿಯನ್ನು ನ್ಯೂಜಿಲೆಂಡ್ ಬೆನ್ನತ್ತಿ ಹೊರಟಿತ್ತು. ಈ ವೇಳೆ ರಾಸ್‌ ಟೇಯ್ಲರ್ ಸ್ಪೋಟಕ ಆಟವಾಡಿ ಭರ್ಜರಿ ಶತಕ ಸಿಡಿಸಿದರು. ಅತಿಥೇಯರ ಗೆಲುವಿಗೆ ಕಾರಣವಾದರು.