ಪ್ರಿನ್ಸ್ ಲಾರಾಗೆ ಸಡ್ಡುಹೊಡೆದ ಕಿಂಗ್ ಕೊಹ್ಲಿ
ಇಷ್ಟೇಲ್ಲಾ ದಾಖಲೆ ಬರೆದ ಕೊಹ್ಲಿ, ಸದ್ದಿಲ್ಲದಂತೆ ವೆಸ್ಟ್ ಇಂಡೀಸ್ನ ದಂತಕತೆ ಹಾಗೂ ಮಾಜಿ ನಾಯಕ ಬ್ರಿಯಾನ್ ಲಾರಾ ಅವರ ದಾಖಲೆಯನ್ನು ಮುರಿದಿದ್ದಾರೆ. ತಂಡದ ನಾಯಕನಾಗಿ ಕೆರಿಬಿಯನ್ ನೆಲದಲ್ಲಿ ಇನಿಂಗ್ಸ್ ಒಂದರಲ್ಲಿ ಗರಿಷ್ಠ ಸ್ಕೋರ್ ದಾಖಲಿಸಿದ ದಾಖಲೆ ಕಿಂಗ್ ಕೊಹ್ಲಿ ಮುಡಿಗೇರಿದೆ. 2003ರಲ್ಲಿ ಶ್ರೀಲಂಕಾ ವಿರುದ್ಧ ಬಾರ್ಬೇಡೊಸ್ನಲ್ಲಿ ನಡೆದ ಪಂದ್ಯದಲ್ಲಿ ಪ್ರಿನ್ಸ್ ಖ್ಯಾತಿಯ ಲಾರಾ, 116 ರನ್ಗಳನ್ನು ಗಳಿಸಿದ್ದು ಈವರೆಗಿನ ದಾಖಲೆಯಾಗಿತ್ತು.
ಇನ್ನು ವಿಂಡೀಸ್ ನೆಲದಲ್ಲಿ ಶತಕ ಬಾರಿಸಿದ ನಾಯಕ ಪಟ್ಟಿಯಲ್ಲಿ ಶ್ರೀಲಂಕಾದ ಮಾಜಿ ನಾಯಕ ಮಹೇಲಾ ಮೂರನೇ ಸ್ಥಾನದಲ್ಲಿದ್ದಾರೆ. ಜಯವರ್ಧನೆ 2005ರಲ್ಲಿ ಜಮೈಕಾದ ಸಬೈನಾ ಪಾರ್ಕ್ನಲ್ಲಿ ನಡೆದ ಪಂದ್ಯದಲ್ಲಿ ನ್ಯೂಜಿಲೆಂಡ್ ಎದುರು ಅಜೇಯ 115 ರನ್ ಬಾರಿಸಿದ್ದರು.
5 ಇನಿಂಗ್ಸ್ಗೆ ಒಂದು ಶತಕದ ಸರಾಸರಿ
ಕಳೆದ ತಿಂಗಳು ಅಂತ್ಯಗೊಂಡ ಏಕದಿನ ಕ್ರಿಕೆಟ್ ವಿಶ್ವಕಪ್ನಲ್ಲಿ ಸತತ 5 ಅರ್ಧಶತಕ ದಾಖಲಿಸಿದರೂ ಒಂದನ್ನೂ ಶತಕವನ್ನಾಗಿ ಪರಿವರ್ತಿಸದೆ ನಿರಾಸೆ ಅನುಭವಿಸಿದ್ದ ಕೊಹ್ಲಿ, ಭಾನುವಾರದ ಪಂದ್ಯದಲ್ಲಿ ತಮ್ಮ ವಿರಾಟ ರೂಪ ಅನಾವರಣ ಪಡಿಸಿ 125 ಎಸೆತಗಳಲ್ಲಿ 14 ಫೋರ್ ಮತ್ತೊಂದು ಸಿಕ್ಸರ್ ಒಳಗೊಂಡ 120 ರನ್ಗಳನ್ನು ಚೆಚ್ಚಿದರು. 41ನೇ ಶತಕ ಬಾರಿಸಿದ ನಂತರ 42ನೇ ಶತಕ ಸಲುವಾಗಿ ಕೊಹ್ಲಿ ತೆಗೆದುಕೊಂಡದ್ದು 12 ಇನಿಂಗ್ಸ್ಗಳನ್ನು ಎಂಬುದು ವಿಶೇಷ.
ತಂಡಕ್ಕೆ ಶತಕದ ಅಗತ್ಯವಿತ್ತು
"ಶತಕ ಗಳಿಸುವುದು ಆನಂದ ನೀಡುತ್ತದೆ. ತಂಡಕ್ಕೂ ಕೂಡ ನನ್ನ ಶತಕದ ಅಗತ್ಯವಿತ್ತು. ಶಿಖರ್ ಮತ್ತು ರೋಹಿತ್ ದೊಡ್ಡ ಇನಿಂಗ್ಸ್ ಆಡಿರಲಿಲ್ಲ. ಹೀಗಾಗಿ ಅಗ್ರ ಮೂವರಲ್ಲಿ ಒಬ್ಬರು ಶತಕ ಗಳಿಸುವ ಅಗತ್ಯವಿದ್ದೇ ಇರುತ್ತದೆ. ಹಿರಿಯ ಆಟಗಾರರಿಗೆ ಮುನ್ನುಗ್ಗಿ ಆಡುವ ಅಗತ್ಯವಿರುತ್ತದೆ. ಇಂದು ಆ ಅವಕಾಶ ನನ್ನದಾಗಿತ್ತು,' ಎಂದು ಪಂದ್ಯದ ಬಳಿಕ ಮಾತನಾಡಿದ ಕೊಹ್ಲಿ ತಮ್ಮ ಅನುಭವ ಹಂಚಿಕೊಂಡಿದ್ದಾರೆ.
ಸಾರ್ವಕಾಲಿಕ ಪಟ್ಟಿಯಲ್ಲಿ 8ನೇ ಗರಿಷ್ಠ ಸ್ಕೋರರ್
30 ವರ್ಷದ ಬಲಗೈ ಬ್ಯಾಟ್ಸ್ಮನ್ ಕೊಹ್ಲಿ, ಭಾರತದ ಪರ 238 ಪಂದ್ಯಗಳನ್ನು ಆಡಿದ್ದು, 59.91ರ ಸರಾಸರಿಯಲ್ಲಿ 11,406 ರನ್ಗಳನ್ನು ಗಳಿಸಿದ್ದಾರೆ. ಈ ಮೂಲಕ ಏಕದಿನ ಕ್ರಿಕೆಟ್ನಲ್ಲಿ ಸಾರ್ವಕಾಲಿಕ ಅತಿ ಹೆಚ್ಚು ರನ್ಗಳಿಸಿದವರ ಪೈಕಿ 8ನೇ ಸ್ಥಾನಕ್ಕೇರಿದ್ದಾರೆ. ಭಾರತದ ಬ್ಯಾಟಿಂಗ್ ದಂತಕತೆ ಸಚಿನ್ ತೆಂಡೂಲ್ಕರ್ ಈ ಪಟ್ಟಿಯಲ್ಲಿ (18,426 ರನ್, 463 ಪಂದ್ಯಗಳು) ಅಗ್ರಸ್ಥಾನದಲ್ಲಿದ್ದಾರೆ.