ಶ್ರೀಲಂಕಾದ ಅಭಿಮಾನಿಗೆ ಕೊಟ್ಟ ಮಾತು ಉಳಿಸಿಕೊಂಡ ರೋಹಿತ್ ಶರ್ಮಾ

ನೋವಿನಿಂದ ವಾಪಾಸ್ಸಾಗಿದ್ದ ಅಭಿಮಾನಿ

ಕಳೆದ ವರ್ಷ ಶ್ರೀಲಂಕಾ ತಂಡವು ಭಾರತ ಪ್ರವಾಸ ಕೈಗೊಂಡಿದ್ದಾಗ ರೋಹಿತ್ ಶರ್ಮಾ ಅವರ ಆಟ ನೋಡಲೆಂದೇ ಮೊಹಮ್ಮದ್ ನಿಲಮ್ ಭಾರತಕ್ಕೆ ಆಗಮಿಸಿದ್ದರು, ರೋಹಿತ್ ಅವರನ್ನು ಭೇಟಿ ಸಹ ಮಾಡಿದ್ದರು. ಆದರೆ ನಿಲಮ್ ಅವರ ತಂದೆಗೆ ತೀವ್ರ ಅನರೋಗ್ಯ ಕಾಣಿಸಿಕೊಂಡ ಕಾರಣ ಎಲ್ಲ ಪಂದ್ಯಗಳನ್ನು ನೋಡಲಾಗದೆ ಶ್ರೀಲಂಕಕ್ಕೆ ವಾಪಾಸ್ ತೆರಳಬೇಕಾಯಿತು.

ಅಭಿಮಾನಿಗೆ ಮಾತು ಕೊಟ್ಟ ರೋಹಿತ್

ನಿಲಮ್ ಅವರ ತಂದೆಯ ಆರೋಗ್ಯ ಸ್ಥಿತಿಯ ಬಗ್ಗೆ ತಿಳಿದುಕೊಂಡ ರೋಹಿತ್ ಶರ್ಮಾ ನಿಲಮ್ ಅವರಿಗೆ ವಾಪಾಸ್ಸು ತೆರಳಲು ಟಿಕೆಟ್ ಕೊಡಿಸಿದ್ದರು ಜೊತೆಗೆ ಧನ ಸಹಾಯ ಸಹ ಮಾಡಿದ್ದರು. ಅದೇ ಸಮಯದಲ್ಲಿ 'ಶ್ರೀಲಂಕಕ್ಕೆ ಬಂದಾಗ ನಿನ್ನ ಮನೆಗೆ ಬರುತ್ತೇನೆಂದು' ನಿಲಮ್ ಅವರಿಗೆ ರೋಹಿತ್ ಶರ್ಮಾ ಅವರು ಮಾತು ಕೊಟ್ಟಿದ್ದರು. ಈಗ ಕೊಟ್ಟ ಮಾತನ್ನು ಈಡೇರಿಸಿದ್ದಾರೆ.

ಅಭಿಮಾನಿಗಾಗಿ ಟಿಶರ್ಟ್‌

ಮೊಹಮ್ಮದ್ ನಿಲಮ್ ಅವರ ಮನೆಗೆ ಭೇಟಿ ನೀಡಿದ್ದ ರೊಹಿತ್ ಶರ್ಮಾ ಅಭಿಮಾನಿಗಾಗಿ ಟಿ-ಶರ್ಟ್‌ಗಳನ್ನು ತಂದು ಕೊಟ್ಟಿದ್ದಾರೆ. ಅವರ ಕುಟುಂಬದ ಸದಸ್ಯರೊಂದಿಗೆ ಕಾಲ ಕಳೆದ ರೊಹಿತ್ ಶರ್ಮಾ ನಿಲಮ್‌ ಅವರ ಹಳೆಯ ಚಿತ್ರಗಳು, ನಿಲಮ್ ಸಂಗ್ರಹಿಸಿಟ್ಟಿದ್ದ ರೊಹಿತ್ ಶರ್ಮಾ ಅವರ ಬಗೆಗಿನ ಪತ್ರಿಕಾ ವರದಿಗಳನ್ನು ನೋಡಿ ಖುಷಿ ಪಟ್ಟಿದ್ದಾರೆ. ನಿಲಮ್ ರೊಹಿತ್ ಶರ್ಮಾ ಅವರಿಗೆ ಸಣ್ಣ ಆನೆಯ ಪುತ್ತಳಿ ನೀಡಿದ್ದಾರೆ.

ಪತ್ರಿಕೆಗಳಲ್ಲಿ ಹೊಗಳಿಕೆಯ ಮಹಾಪೂರ

ರೋಹಿತ್ ಶರ್ಮಾ ಅವರ ನಂ.1 ಅಭಿಮಾನಿ ಆಗಿರುವ ಮೊಹಮ್ಮದ್ ನಿಲಮ್ ಅವರು ರೋಹಿತ್ ಶರ್ಮಾ ಅವರು ತಮ್ಮ ಮನೆಗೆ ಬಂದಿದ್ದ ಚಿತ್ರಗಳನ್ನು ಸಾಮಾಜಿಕ ಜಾಲತಾಣದಲ್ಲಿ ಹಾಕಿದ್ದಾರೆ. ಶ್ರೀಲಂಕಾದ ದಿನಪತ್ರಿಕೆಗಳು ರೋಹಿತ್ ಶರ್ಮಾ ಅವರ ಈ ಗುಣವನ್ನು ಹಾಡಿ ಹೊಗಳಿವೆ. ನಿದಹಾಸ್ ಟೂರ್ನಿಯಲ್ಲಿ ಬಾಂಗ್ಲಾ ಆಟಗಾರರು ತೋರಿದ ದುರ್‌ವರ್ತನೆ ಮತ್ತು ಭಾರತೀಯ ಆಟಗಾರರು ನಡೆದುಕೊಂಡ ರೀತಿಯನ್ನು ಹೋಲಿಸಿ ಚರ್ಚೆಗಳು ನಡೆದಿವೆ.

ಸುಧೀರ್‌ರಿಂದಲೇ ಸಾಧ್ಯವಾಗಿದ್ದು

ಅಂದಹಾಗೆ ಮೊಹಮ್ಮದ್ ನಿಲಮ್‌ ಅವರನ್ನು ರೋಹಿತ್ ಪರಿಚಯ ಮಾಡಿಸಿದ್ದು ಯಾರು ಗೊತ್ತಾ?, ಸಚಿನ್ ತೆಂಡೂಲ್ಕರ್ ಅವರ ಅಪ್ಪಟ ಅಭಿಮಾನಿ ಸುಧೀರ್. ನಿಲಮ್ ತಂದೆಯ ಆರೋಗ್ಯದ ಬಗ್ಗೆ ರೋಹಿತ್ ಗೆ ತಿಳಿಸಿದ್ದು ಕೂಡಾ ಇದೇ ಸುಧೀರ್.