|
ಆರಂಭದಲ್ಲೇ ಬಾರ್ಸಿಲೋನಾಗೆ ಆಘಾತ
ಆತಿಥೇಯ ಲಿವರ್ಪೂಲ್ ತಂಡ ಪಂದ್ಯ ಶುರುವಾರ ಮೊದಲ ನಿಮಿಷದಿಂದಲೂ ಹೆಚ್ಚು ಆಕ್ರಮಣಕಾರಿ ಆಟವಾಡಿ ಎದುರಾಳಿ ಮೇಲೆ ಒತ್ತಡ ಹೇರಿತು. ಪರಿಣಾಮ ಒತ್ತಡ ನಿಭಾಯಿಸುವಲ್ಲಿ ವಿಫಲಗೊಂಡ ಎಫ್ಸಿಬಿ ಏಳೇ ನಿಮಿಷಗಳಲ್ಲಿ ಗೋಲ್ ಬಿಟ್ಟುಕೊಟ್ಟಿತು. ಡಿಫೆಂಡರ್ ಜಾರ್ಡಿ ಆಲ್ಬಾ ಎಸಗಿದ ಪ್ರಮಾದದಿಂದಾಗಿ ಸ್ಯಾಡಿಯೊ ಮೇನ್ ಚೆಂಡನ್ನು ಸಹ ಅಟಗಾರ ಜಾರ್ಡನ್ ಹೆಂಡರ್ಸನ್ಗೆ ಪಾಸ್ ಮಾಡಿದರು. ಆದರೆ, ಬಾರ್ಸಿಲೋನಾದ ಕೀಪರ್ ಮಾರ್ಕ್ಆಂಡ್ರೆ ಹೆಂಡರ್ಸನ್ ಅವರ ಪ್ರಯತ್ನವನ್ನು ತಡೆದರಾದರೂ, ಅವರ ಕೈಯಿಂದ ಚಿಮ್ಮುದ ಚೆಂಡನ್ನು ಒರಿಗಿ ಗೋಲ್ ಪೆಟ್ಟಿಗೆಗೆ ಸೇರಿಸಿದರು.
|
ದ್ವಿತೀಯಾರ್ಧದಲ್ಲಿ ವಿನಾಲ್ಡಮ್ ಮಿಂಚು
ಪಂದ್ಯದ ಮೊದಲಾರ್ಧದ ಅಂತ್ಯಕ್ಕೆ ಲಿವರ್ಪೂಲ್ ಯಶಸ್ಸು ಗಳಿಸಿತ್ತಾದರೂ, ಸರಾಸರಿ ಗೋಲ್ಗಳ ಅಂತರದಲ್ಲಿ ಬಾರ್ಸಿಲೋನಾ 3-1ರ ಮುನ್ನಡೆಯಲ್ಲಿತ್ತು. ಆದರೂ ಆತ್ಮವಿಶ್ವಾಸ ಕಳೆದುಕೊಳ್ಳದ ದಿ ರೆಡ್ಸ್ ಪಡೆಗೆ 54 ಮತ್ತು 56ನೇ ನಿಮಿಷದಲ್ಲಿಸತತ ಎರಡು ಗೋಲ್ಗಳನ್ನು ತಂದುಕೊಟ್ಟ ಜಾರ್ಜಿನಿಯೊ ವಿನಾಲ್ಡಮ್ ಡಬಲ್ ಸಂಭ್ರಮ ಆಚರಿಸಿದರು. ಬದಲಿ ಆಟಗಾರನಾಗಿ ಕಣಕ್ಕಿಳಿದು ಎರಡು ಗೋಲ್ ಗಳಿಸುವ ಮೂಲಕ ವಿನಾಲ್ಡಮ್ ಆತಿಥೇಯ ಪ್ರೇಕ್ಷಕರ ಎದುರು ಹೀರೊ ಆದರು. ಇದರೊಂದಿಗೆ ಸರಾಸರಿ ಗೋಲ್ಗಳ ಅಂತರದಲ್ಲಿ 3-3ರ ಸಮಬಲ ತಂದುಕೊಂಡ ಲಿವರ್ಪೂಲ್ ತಂಡದ ಆತ್ಮವಿಶ್ವಾಸ ಮುಗಿಲು ಮುಟ್ಟಿತ್ತು.
|
ಒರಿಗಿ ಗೆಲುವಿನ ಗೋಲ್
ಪಂದ್ಯದ ಅಂತ್ಯದ ಹೊತ್ತಿಗೆ ಗೆಲುವಿಗಾಗಿ ಸಂಪೂರ್ಣವನ್ನೂ ಪಣಕ್ಕಿಟ್ಟಿದ್ದ ಲಿವರ್ಪೂಲ್ ತಂಡ ಬಾರ್ಸಿಲೋನಾದ ಭದ್ರ ಡಿಫೆನ್ಸ್ ವಿಭಾಗವನ್ನು ಮುರಿಯುವಲ್ಲಿ ಮತ್ತೆ ಯಶಸ್ವಿಯಾಯಿತು. 79ನೇ ನಿಮಿಷದಲ್ಲಿ ಬಾರ್ಸಿಲೋನಾ ಡಿಫೆಂಡರ್ಗಳಿಗೆ ಚಳ್ಳೆಹಣ್ಣು ತಿನ್ನಿಸಿದ ಅಲೆಕ್ಸಾಂಡರ್ ಅರ್ನಾಲ್ಡ್ ಗೋಲ್ ಗಳಿಸುವ ಅವಕಾಶಕ್ಕಾಗಿ ಕಾದಿದ್ದ ಒರಿಗಿಗೆ ಚೆಂಡನ್ನು ನೀಡಿದರು. ಇದರ ಲಾಭ ಪಡೆದ ಒರಿಗಿ ಸುಲಭವಾಗಿ ಗೋಲ್ ಗಳಿಸುವ ಮೂಲಕ ತಂಡಕ್ಕೆ ಜಯದ ಮಾಲೆ ತೊಡಿಸಿದರು.
|
ಜೂನ್ 1ಕ್ಕೆ ಫೈನಲ್ ಪಂದ್ಯ
ಪ್ರಶಸ್ತಿ ಸುತ್ತಿಗೆ ಕಾಲಿಟ್ಟ ಮೊದಲ ತಂಡವಾಗಿರುವ ಲಿವರ್ಪೂಲ್, ಮ್ಯಾಡ್ರಿಡ್ನ ವಾಂಡಾ ಮೆಟ್ರೊಪಾಲಿಟಾನೊ ಫುಟ್ಬಾಲ್ ಕ್ರೀಡಾಂಗಣದಲ್ಲಿ ಜೂನ್ 1ರಂದು
ನಡೆಯಲಿರುವ ಫೈನಲ್ ಪಂದ್ಯದಲ್ಲಿ ಟೊಟೆನ್ಹ್ಯಾಮ್ ಹಾಟ್ಸ್ಪುರ್ ಅಥವಾ ಏಜಾಕ್ಸ್ ವಿರುದ್ಧ ಪೈಪೋಟಿ ನಡೆಯಲಿದೆ. ಮತ್ತೊಂದು ಸೆಮಿಫೈನಲ್ಸ್ನ 2ನೇ ಹಂತದ ಪಂದ್ಯ ಬುಧವಾರ ತಡರಾತ್ರಿ ನಡೆಯಲಿದ್ದು, ಟೊಟೆನ್ಹ್ಯಾಮ್ ಹಾಟ್ಸ್ಪುರ್ ಸರಾಸರಿ ಗೋಲ್ಗಳಲ್ಲಿ ಏಜಾಕ್ಸ್ ಎದುರು 0-1ರ ಹಿನ್ನಡೆಯಲ್ಲಿದೆ.