ಈ ಮಹಾನಗರಕ್ಕೆ ದಕ್ಕಿದೆ 2024ರ ಒಲಿಂಪಿಕ್ಸ್ ಆತಿಥ್ಯ

ನವದೆಹಲಿ, ಸೆಪ್ಟೆಂಬರ್ 14: ಪ್ಯಾರಿಸ್ ನಗರಕ್ಕೆ 2024ರ ಒಲಿಂಪಿಕ್ಸ್ ಕ್ರೀಡಾಕೂಟವನ್ನು ಆಯೋಜಿಸುವ ಅವಕಾಶ ಸಿಕ್ಕಿದೆ. ಅಂತೆಯೇ, 2028ರ ಒಲಿಂಪಿಕ್ಸ್ ನ ಆತಿಥ್ಯ ಲಾಸ್ ಏಂಜಲೀಸ್ ನಗರಕ್ಕೆ ದಕ್ಕಿದೆ.

ಈ ಕುರಿತಂತೆ ಅಂತಾರಾಷ್ಟ್ರೀಯ ಒಲಿಂಪಿಕ್ಸ್ ಸಂಸ್ಥೆಯ ಕಚೇರಿಯಲ್ಲಿ ನಡೆದ ಸದಸ್ಯ ರಾಷ್ಟ್ರಗಳ ಮತದಾನದಲ್ಲಿ ಪ್ಯಾರಿಸ್ ಹಾಗೂ ಲಾಸ್ ಏಂಜಲೀಸ್ ನಗರಗಳು ಈ ಪ್ರತಿಷ್ಠಿತ ಕ್ರೀಡಾಕೂಟ ಆಯೋಜಿಸುವ ಗೌರವ ಪಡೆದವು.

ಅಲ್ಲದೆ, ಆಧುನಿಕ ಒಲಿಂಪಿಕ್ಸ್ ಇತಿಹಾಸದಲ್ಲೇ ಇದೇ ಮೊದಲ ಬಾರಿಗೆ ಎರಡು ಒಲಿಂಪಿಕ್ಸ್ ಗಳ ಆತಿಥ್ಯ ಪಡೆದ ನಗರಗಳ ಹೆಸರುಗಳನ್ನು ಬಹಿರಂಗಗೊಳಿಸಲಾಗಿದೆ.

ಅಂದಹಾಗೆ, ಈ ಎರಡೂ ನಗರಗಳಲ್ಲಿ ಒಲಿಂಪಿಕ್ಸ್ ಕ್ರೀಡಾಕೂಟ ನಡೆಯಲಿರುವುದು ಮೂರನೇ ಬಾರಿಯಾಗಿದೆ. ಪ್ಯಾರಿಸ್ ನಲ್ಲಿ 1900 ಹಾಗೂ 1924ರಲ್ಲಿ ಒಲಿಂಪಿಕ್ಸ್ ಆಯೋಜನೆಯಾಗಿದ್ದರೆ, ಲಾಸ್ ಏಂಜಲೀಸ್ ನಲ್ಲಿ 1932 ಹಾಗೂ 1984ರಲ್ಲಿ ಒಲಿಂಪಿಕ್ಸ್ ಆಯೋಜನೆಗೊಂಡಿದ್ದವು.