'ಟೋಕಿಯೋ ಒಲಿಂಪಿಕ್ಸ್‌'ಗೂ ತಾಕಿದ 'ಕೊರೊನಾ ವೈರಸ್' ಸೋಂಕು!

ಒಲಿಂಪಿಕ್ಸ್‌ ಆಯೋಜಕರಿಗೆ ತಲೆಬಿಸಿ

ಕೊರೊನಾ ವೈರಸ್ ಬಗ್ಗೆ ಹಬ್ಬುತ್ತಿರುವ ಗಾಳಿಸುದ್ದಿಗಳಿಂದ ಟೋಕಿಯೋ ಒಲಿಂಪಿಕ್ಸ್‌ ಆಯೋಜಕರೂ ತಲೆ ಕೆಡಿಸಿಕೊಳ್ಳುವಂತಾಗಿದೆ. ಜಪಾನ್‌ನಲ್ಲಿ ಆಯೋಜಿಸಲು ಉದ್ದೇಶಿಸಲಾಗಿರುವ ಟೋಕಿಯೋ ಒಲಿಂಪಿಕ್ಸ್‌ ಕ್ರೀಡಾಕೂಟ, ಕೊರೊನಾ ವೈರಸ್‌ನಿಂದಾಗಿ ರದ್ದಾಗಲಿದೆ ಎಂದೆಲ್ಲ ಮಾತುಗಳು ಕೇಳಿಬರುತ್ತಿರುವುದು ಇದಕ್ಕೆ ಕಾರಣ.

ಪ್ರತಿಕ್ರಮಕ್ಕೆ ಜಪಾನ್ ಸಿದ್ಧತೆ

ಇವು ಬರೀ ಗಾಳಿಸುದ್ದಿಯಷ್ಟೇ, ಟೋಕಿಯೋ ಒಲಿಂಪಿಕ್ಸ್ ರದ್ದೇನಿಲ್ಲ ಎಂದು ಆಯೋಜಕರು ಹೇಳಿ ಹೇಳಿ ಸುಸ್ತಾಗುತ್ತಿದ್ದಾರೆ. 'ನಾವು ಇಂಟರ್ ನ್ಯಾಷನಲ್ ಒಲಿಂಪಿಕ್ಸ್ ಕಮಿಟಿ (ಐಒಸಿ) ಮತ್ತು ಇತರ ಸಂಬಂಧಪಟ್ಟ ಸಂಸ್ಥೆಗಳೊಂದಿಗೆ ನಿಕಟವಾಗಿ ಕೆಲಸ ಮಾಡುತ್ತಿದ್ದೇವೆ. ಅಗತ್ಯ ಬಿದ್ದರೆ ಒಲಿಂಪಿಕ್ಸ್‌ ನಡೆಸಲು ಬೇಕಾದ ಯಾವುದೇ ಪ್ರತಿಕ್ರಮಗಳನ್ನು ಕೈಗೊಳ್ಳಲು ನಾವು ಸಿದ್ಧರಿದ್ದೇವೆ,' ಎಂದು ಟೋಕಿಯೋ ಒಲಿಂಪಿಕ್ಸ್ ಆಯೋಜಕರು ತಿಳಿಸಿದ್ದಾರೆ.

ಜಪಾನ್‌ನಲ್ಲೂ ಸೋಂಕಿನ ಪ್ರಕರಣ

ಚೀನಾದಲ್ಲಿ ಬಹಳಷ್ಟು ಜನ ಕೊರೊನಾ ವೈರಸ್‌ಗೆ ತುತ್ತಾಗಿದ್ದರೆ, ಜಪಾನ್‌ನಲ್ಲೂ ಕೆಲವಷ್ಟು ಮಂದಿಗೆ ಈ ಸೋಂಕು ತಗುಲಿದ್ದು ವರದಿಯಾಗಿದೆ. ಹಾಗಂತ ಜಪಾನ್, ಈ ಸೋಂಕು ತಡೆಗೆ ಕ್ರಮ ಕೈಗೊಳ್ಳುತ್ತಿದೆ. 'ಟೋಕಿಯೋ ಒಲಿಂಪಿಕ್ಸ್‌ ರದ್ದತಿಯನ್ನು ಪರಿಗಣಿಸಿಲ್ಲ' ಎಂದು ಆಯೋಜಕರೂ ಹೇಳಿದ್ದಾರೆ. ಆದರೆ ಸುಳ್ಳು ಗಾಳಿಸುದ್ದಿಗಳು ಹಬ್ಬೋದು ಮಾತ್ರ ನಿಂತಿಲ್ಲ.

ಬಝ್ಯಾಪ್ ಕಿತಾಪತಿ

ಜಪಾನ್‌ನ ಪೋರ್ಟಲ್ ಸೈಟ್‌ 'ಬಝ್ಯಾಪ್ (Buzzap)', 'ಟೋಕಿಯೋ ಒಲಿಂಪಿಕ್ಸ್ ರದ್ದಾಗಿದೆ' ಎಂದು ಮೊದಲ ಬಾರಿ ಸುದ್ದಿ ಪ್ರಕಟಿಸಿ ಗಾಳಿಸುದ್ದಿಗೆ ನಾಂದಿ ಹಾಡಿತ್ತು. 'Tokyo Olympics Cancelled' ಅನ್ನೋ ಹ್ಯಾಷ್‌ನಡಿಯಲ್ಲಿ ಸುಮಾರು 50,000 ಟ್ವೀಟ್‌ಗಳೂ ಹರಿದಾಡಿದ್ದವು. ಟೋಕಿಯೋ ಒಲಿಂಪಿಕ್ಸ್‌ ರದ್ದನ್ನೋದು ಒಂದು ಸುಳ್ಳು ಗಾಳಿಸುದ್ದಿ ಅನ್ನೋದು ಸದ್ಯಕ್ಕಿರುವ ಮಾಹಿತಿ. ಅಂದ್ಹಾಗೆ, 2020ರ ಟೋಕಿಯೋ ಒಲಿಂಪಿಕ್ಸ್‌ ಜುಲೈ 24ರಿಂದ ಆಗಸ್ಟ್ 9ರ ವರೆಗ ನಡೆಯಲಿದೆ.