ನಿಷೇಧದ ನಂತರದ ಮೊದಲ ಗ್ರ್ಯಾಂಡ್ ಸ್ಲಾಂನಲ್ಲಿ ಶರಪೋವಾ ಶುಭಾರಂಭ

ಆತ್ಮವಿಶ್ವಾಸದಲ್ಲಿ ಮರಿಯಾ

ಮಂಗಳವಾರ ನಡೆದ ಯುಎಸ್ ಓಪನ್ ಪಂದ್ಯದಲ್ಲಿ ಮರಿಯಾ, ಆತ್ಮವಿಶ್ವಾಸದಿಂದಲೇ ಕಣಕ್ಕಿಳಿದಂತೆ ಕಂಡುಬಂತು. ಅತ್ತ, ಸಿಮೊನಾ ಹ್ಯಾಲೆಪ್ ಅವರಲ್ಲೂ ಆತ್ಮವಿಶ್ವಾಸ ಇತ್ತಾದರೂ, ದಿಗ್ಗಜ ಕ್ರೀಡಾಳುವನ್ನು ಎದುರುಗೊಳ್ಳುತ್ತಿರುವ ಆತಂಕವೂ ಅವರಲ್ಲಿ ಕಾಣುತ್ತಿತ್ತು.

ಮೊದಲ ಸೆಟ್ ನಲ್ಲಿ ಗೆಲುವು

ಮೊದಲ ಸೆಟ್ ನಲ್ಲಿ ಇಬ್ಬರಿಂದ ತೀವ್ರ ಪೈಪೋಟಿ ಬಂದರೂ, ಮಿಂಚಿನ ಆಟ ಪ್ರದರ್ಶಿಸಿದ ಮರಿಯಾ, ಈ ಸೆಟ್ ಅನ್ನು 6-4 ಅಂತರದಲ್ಲಿ ಗೆದ್ದುಕೊಂಡರು.

ಎರಡನೇ ಸೆಟ್ ನಲ್ಲಿ ಸೋಲು

ಇನ್ನು, ಎರಡನೇ ಸೆಟ್ ನಲ್ಲಿ ಚೇತರಿಸಿಕೊಂಡ ಹ್ಯಾಲೆಪ್, ಮೊದಲ ಸೆಟ್ ನಲ್ಲಿ ಆಡುವಾಗ ಒತ್ತಡದಲ್ಲಿ ಮಾಡಿಕೊಂಡಿದ್ದ ಕೆಲವಾರು ಎಡವಟ್ಟುಗಳನ್ನು ಮೆಟ್ಟಿ ನಿಂತರು. ಇದರಿಂದಾಗಿ, ಮೊದಲ ಸೆಟ್ ನ ಅಂಕಗಳು ಇಲ್ಲಿ ತಿರುಗುಮುರುಗು ಆಗಿ, ಮರಿಯಾ ಶರಪೋವಾ 4-6 ಅಂತರದಲ್ಲಿ ಈ ಸೆಟ್ ಸೋಲಬೇಕಾಯಿತು.

ಗೆಲುವಿಗೆ ನೆರವಾದ ಏಸ್ ಹಾಗೂ ಭರ್ಜರಿ ಆಟ

ಇನ್ನು, ಇಬ್ಬರ ಪಾಲಿಗೆ ನಿರ್ಣಾಯಕ ಎನಿಸಿದ ಮೂರನೇ ಸೆಟ್ ನಲ್ಲಿ (ಮಹಿಳೆಯರಿಗೆ ಮೂರು ಸೆಟ್ ಗಳ ಪಂದ್ಯಗಳಿರುತ್ತವೆ) ಮತ್ತೆ ಮೇಲುಗೈ ಸಾಧಿಸಿದ ಶರಪೋವಾ, ದಣಿವರಿಯದ ಹೋರಾಟ ನೀಡಿದರು. ಕೆಲವಾರು ಏಸ್ ಗಳು ಶರಪೋವಾ ಅವರ ಗೆಲುವಿಗೆ ಸೋಪಾನವಾಗಿ ಬದಲಾದವು. ಭರ್ಜರಿ ಎದುರುತ್ತರ ನೀಡುತ್ತಲೇ ಸಾಗಿದ ಶರಪೋವಾ ಕೊನೆಗೂ ಈ ಸೆಟ್ ಅನ್ನು 6-3 ಅಂತರದಲ್ಲಿ ಗೆದ್ದು ಆ ಮೂಲಕ ಪಂದ್ಯದಲ್ಲೂ ಜಯ ಗಳಿಸಿದರು.