ಕ್ರಿಕೆಟ್ ಅಭಿಮಾನಿಗಳಿಗೆ ನಿರಾಸೆ ಮೂಡಿಸಿದ ಎಬಿ ಡಿ ವಿಲಿಯರ್ಸ್!

ನಿವೃತ್ತಿ ವಾಪಸ್ ಪಡೆದಿದ್ದ ಎಬಿಡಿ

2018 ಮೇ 23ರಂದು ಎಬಿ ಡಿವಿಲಿಯರ್ಸ್ ಅಂತಾರಾಷ್ಟ್ರೀಯ ನಿವೃತ್ತಿ ಘೋಷಿಸಿದ್ದರು. ಆದರೆ ಆ ಬಳಿಕ ಮತ್ತೆ ವಿಶ್ವಕಪ್‌ ವೇಳೆ ದಕ್ಷಿಣ ಆಫ್ರಿಕಾ ಪರ ಆಡುವ ಇಂಗಿತದಿಂದ ನಿವೃತ್ತಿ ವಾಪಸ್ ಪಡೆದಿದ್ದರು. ಆದರೆ ಏಕದಿನ ವಿಶ್ವಕಪ್‌ ತಂಡದಲ್ಲಿ ಎಬಿಡಿಗೆ ಸ್ಥಾನ ಸಿಕ್ಕಿರಲಿಲ್ಲ. ಮತ್ತೆ ಈ ಬಾರಿಯ ಟಿ20ಐ ವಿಶ್ವಕಪ್‌ನಲ್ಲಿ ಎಬಿಡಿ ಆಡುತ್ತಾರೆ ಎಂಬ ಮಾತುಗಳು ಕೇಳಿ ಬಂದಿದ್ದವು. ಆ ನಿರೀಕ್ಷೆ ಕೂಡ ಈಗ ಸುಳ್ಳಾಗಿದೆ.

ಆರ್‌ಸಿಬಿಯ ಆಪಾದ್ಭಾಂಧವ

ಎಬಿ ಡಿ ಜೊತೆಗೆ ಚರ್ಚೆ ನಡೆಸಿದ ಬಳಿಕ ಕ್ರಿಕೆಟ್ ಸೌತ್ ಆಫ್ರಿಕಾ ಈ ಸಂಗತಿ ಬಹಿರಂಗಪಡಿಸಿದೆ. 'ಚರ್ಚೆ ಮುಗಿದಿದೆ. ಎಬಿಡಿಯ ಅಂತಾರಾಷ್ಟ್ರೀಯ ನಿವೃತ್ತಿ ಹಾಗೇ ಇರಲಿದೆ' ಎಂದು ದಕ್ಷಿಣ ಆಫ್ರಿಕಾ ಕ್ರಿಕೆಟ್ ಹೇಳಿದೆ. ಐಪಿಎಲ್‌ನಲ್ಲಿ ವಿರಾಟ್ ಕೊಹ್ಲಿ ನಾಯಕತ್ವದ ರಾಯಲ್ ಚಾಲೆಂಜರ್ಸ್ ಬೆಂಗಳೂರು ತಂಡದಲ್ಲಿರುವ ಎಬಿಡಿ ಈ ಬಾರಿಯ ಸೀಸನ್‌ ಅರ್ಧಕ್ಕೆ ನಿಲುಗಡೆಯಾಗುವ ಮುನ್ನ ತಂಡವನ್ನು ಗೆಲುವಿನ ಹಾದಿಗೆ ತರಲು ಪ್ರಮುಖ ಕೊಡುಗೆ ನೀಡಿದ್ದರು.

ಅತೀ ವೇಗದ ಶತಕ ವಿಶ್ವದಾಖಲೆ

37ರ ಹರೆಯದ ಎಬಿ ಡಿ ವಿಲಿಯರ್ಸ್, 114 ಟೆಸ್ಟ್‌ ಪಂದ್ಯಗಳಲ್ಲಿ 8765 ರನ್, 228 ಏಕದಿನ ಪಂದ್ಯಗಳಲ್ಲಿ 9577 ರನ್, 78 ಟಿ20ಐ ಪಂದ್ಯಗಳಲ್ಲಿ 1672 ರನ್, 176 ಐಪಿಎಲ್ ಪಂದ್ಯಗಳಲ್ಲಿ 5056 ರನ್ ದಾಖಲೆ ಹೊಂದಿದ್ದಾರೆ. ಅತೀ ವೇಗದ ಏಕದಿನ ಶತಕ ವಿಶ್ವದಾಖಲೆ ಈಗಲೂ ಎಬಿಡಿ ಹೆಸರಿನಲ್ಲಿದೆ. ವೆಸ್ಟ್ ಇಂಡೀಸ್ ವಿರುದ್ಧದ ಪಂದ್ಯದಲ್ಲಿ 31 ಎಸೆತಗಳಲ್ಲಿ ಎಬಿಡಿ ಶತಕ ಬಾರಿಸಿದ್ದರು.