100ನೇ ಶತಕ ಬಾರಿಸಿಯೂ ಸಚಿನ್ ಟೀಕೆಗೆ ಗುರಿಯಾದ ಭಾವುಕ ದಿನವದು!

100ನೇ ಶತಕದ ಹುಡುಕಾಟ

ಶತಕದ ಶತಕ ಬಾರಿಸಲು ಸಚಿನ್ ದೀರ್ಘಕಾಲ ಶ್ರಮಿಸಿದ್ದರು. ಇಂಥದ್ದೊಂದು ಅಪೂರ್ವ ಸಾಧನೆ ಬರೆಯುವುದಕ್ಕಾಗಿ ಸಚಿನ್ ಒಂದೂವರೆ ವರ್ಷಗಳ ಕಾಲ ಸುಮಾರು 33 ಇನ್ನಿಂಗ್ಸ್ ಗಾಗಿ ಮುಂದು ನೋಡಬೇಕಾಗಿ ಬಂದಿತ್ತು. ಅಂತಿಮವಾಗಿ ಸಚಿನ್ ಶತಕ ಸಾಧನೆಯಲ್ಲಿ 99 ರಿಂದ 100ಕ್ಕೆ ತಲುಪಿದ್ದರು. ಅದು 2012ರಲ್ಲಿ! ಅವತ್ತು ಸಚಿನ್ ಶತಕದ ಶತಕ ಪೂರೈಸಿ ಬಳಿಕ ಹೆಲ್ಮೆಟ್ ಗಂಟಿದ ಅಶೋಕ ಚಕ್ರವನ್ನು ಹೆಮ್ಮೆಯಿಂದ ತಟ್ಟಿ 'ನಾನಿದನ್ನು ಸಾಧಿಸಿದ್ದು ದೇಶಕ್ಕಾಗಿ' ಎಂದು ಸಾರಿದ್ದರು. ಆದರೂ ಕ್ರಿಕೆಟ್ ಅಭಿಮಾನಿಗಳು ಬೇಸರಕ್ಕೀಡಾಗುವಂತಾಗಿದ್ದ ದುರಾದೃಷ್ಟಕರ ದಿನ ಅದಾಗಿತ್ತು.

ಭಾವುಕ ದಿನವದು!

ಅದು 2012ರ ಮಾರ್ಚ್ 17ನೇ ತಾರೀಖು. ಪಾಕಿಸ್ತಾನದ ಮೀರ್ಪುರ್ ನಲ್ಲಿ ನಡೆದಿದ್ದ ಏಷ್ಯ್ ಕಪ್ ಪಂದ್ಯದಲ್ಲಿ ಬಾಂಗ್ಲಾ ದೇಶದೆದುರು ಸಚಿನ್ 100 ಶತಕದೊಂದಿಗೆ ವಿಶ್ವ ದಾಖಲೆ ಬರೆದಿದ್ದರು. ದುರಾದೃಷ್ಟವೆಂದರೆ ಸಚಿನ್ ಭಾರತಕ್ಕೆ ಆಗಮಿಸಿದಾಗ ಅವರನ್ನು ನಿರುತ್ಸಾಹದಿಂದ ಬರ ಮಾಡಿಕೊಳ್ಳಲಾಯಿತು. ಯಾಕೆಂದರೆ ಭಾರತ ತಂಡ ಬಾಂಗ್ಲದೆದುರು 5 ವಿಕೆಟ್ ಸೋಲನುಭವಿಸಿತ್ತು!

20 ರನ್ನಿಗೆ 36 ಎಸೆತ

ಮೀರ್ಪುರ್ ನಲ್ಲಿ ಏಷ್ಯಾ ಕಪ್ ಪಂದ್ಯಕ್ಕಾಗಿ ಮೈದಾನಕ್ಕಿಳಿಯುವಾಗಲೇ ಸಚಿನ್ ಅವರ ತಲೆಯಲ್ಲಿ 100ನೇ ಶತಕದ ವಿಚಾರ ಇತ್ತೋ ಏನೊ. ಪಂದ್ಯದಲ್ಲಿ 102 ಎಸೆತಗಳನ್ನು ಎದುರಿಸಿದ ಸಚಿನ್ 80ರನ್ ಕಲೆ ಹಾಕಿದ್ದರು. ಆದರೆ ಇನ್ನುಳಿದ 20 ರನ್ ಗಾಗಿ ತೆಂಡೂಲ್ಕರ್ ಬರೋಬ್ಬರಿ 36 ಎಸೆತಗಳನ್ನು ವ್ಯಯಿಸಿದ್ದರು.

ಏಕದಿನದ 49ನೇ ಶತಕ

ಬಾಂಗ್ಲಾ ಎದುರಿನ ಈ ನಾಲ್ಕನೇ ಏಷ್ಯಕಪ್ ಏಕದಿನ ಪಂದ್ಯದಲ್ಲಿ ಸಚಿನ್ 114 ರನ್ ಮೂಲಕ ಗಳಿಸಿದ ಶತಕ ಏಕದಿನ ಕ್ರಿಕೆಟ್ ನಲ್ಲಿ 49ನೇ ಶತಕವಾಗಿಯೂ ಗುರುತಿಸಿಕೊಂಡಿದೆ. ಸಚಿನ್ ಒಂದುವೇಳೆ ಶತಕ ಬಾರಿಸದೆ ಭಾರತ ಸೋತಿದ್ದರೂ ದೇಶದ ಆಟಗಾರನೊಬ್ಬನ ಪರ ಆಗಬೇಕಿದ್ದ ವಿಶ್ವ ದಾಖಲೆ ಮುಂದೂಡಲ್ಪಡುತ್ತಿತ್ತು. ಆದರೆ ಸಚಿನ್ ತಂಡದ ಪರ ಯೋಚಿಸದೆ ವೈಯಕ್ತಿಕ ಸಾಧನೆ ನೆಲೆಯಲ್ಲಿ ನಿಂತಿದ್ದು ಕ್ರೀಡಾಭಿಮಾನಿಗಳ ಬೇಸರಕ್ಕೆ ಕಾರಣವಾಗಿತ್ತು. ಅಂತಾರಾಷ್ಟ್ರೀಯ ಮಟ್ಟದಲ್ಲಿ ಆಡುವಾಗ ವೈಯಕ್ತಿಕ ಸಾಧನೆಗಿಂತ ದೇಸಿ ತಂಡದ ಗೆಲುವೇ ಮುಖ್ಯ ಅಲ್ಲವೆ?