ಅಂತಾರಾಷ್ಟ್ರೀಯ ಟಿ20 ವಿಶ್ವದಾಖಲೆ ಬರೆದ ಆಸ್ಟ್ರೇಲಿಯಾದ ಅಲಿಸಾ ಹೀಲಿ

ಸಿಡ್ನಿ, ಅಕ್ಟೋಬರ್ 2: ಆಸ್ಟ್ರೇಲಿಯಾದ ಆರಂಭಿಕ ಆಟಗಾರ್ತಿ ಅಲಿಸಾ ಹೀಲಿ ಅಂತಾರಾಷ್ಟ್ರೀಯ ಟಿ20ಯಲ್ಲಿ ವಿಶ್ವದಾಖಲೆ ಬರೆದಿದ್ದಾರೆ. ಬುಧವಾರ (ಅಕ್ಟೋಬರ್ 2) ನಡೆದ ಪಂದ್ಯದಲ್ಲಿ ಸ್ಫೋಟಕ ಬ್ಯಾಟಿಂಗ್ ಪ್ರದರ್ಶಿಸಿದ ಅಲಿಸಾ ಅತೀವೇಗದ ಶತಕ ಮತ್ತು ಅತ್ಯಧಿಕ ರನ್‌ ಮೈಲಿಗಲ್ಲು ಸ್ಥಾಪಿಸಿದ್ದಾರೆ.

ಸಿಡ್ನಿಯ ನಾರ್ತ್ ಸಿಡ್ನಿ ಓವಲ್ ಸ್ಟೇಡಿಯಂನಲ್ಲಿ ನಡೆದ ಆಸ್ಟ್ರೇಲಿಯಾ ಮಹಿಳೆಯರು-ಶ್ರೀಲಂಕಾ ಮಹಿಳೆಯರ ನಡುವಿನ 3ನೇ ಟಿ20 ಪಂದ್ಯದಲ್ಲಿ ಅಲಿಸಾ ಕೇವಲ 61 ಎಸೆತಗಳಿಗೆ 148 ರನ್ ಸಿಡಿಸಿದರು. ಇದರಲ್ಲಿ 19 ಫೋರ್ಸ್, 7 ಸಿಕ್ಸರ್‌ಗಳು ಸೇರಿವೆ.

ಅಲಿಸಾ ಹೀಲಿ ಶತಕ ಸಿಡಿಸಿದ್ದು ಬರೀ 46 ಎಸೆತಗಳಿಗೆ. ಇದು ಮಹಿಳಾ ಟಿ20 ಕ್ರಿಕೆಟ್ ಇತಿಹಾಸದಲ್ಲೇ ಎರಡನೇ ಅತೀ ವೇಗದ ಶತಕವಾಗಿ ದಾಖಲೆ ನಿರ್ಮಿಸಿದೆ. ಹೀಲಿ ಸ್ಫೋಟಕ ಬ್ಯಾಟಿಂಗ್‌ ನೆರವಿನಿಂದ ಆಸ್ಟ್ರೇಲಿಯಾ ಮಹಿಳಾ ತಂಡ 20 ಓವರ್‌ಗೆ 2 ವಿಕೆಟ್ ಕಳೆದು 226 ರನ್ ಮಾಡಿತ್ತು.

29ರ ಹರೆಯದ ಅಲಿಸಾ ಓವರ್‌ನ ಕೊನೆಯ ಎಸೆತಕ್ಕೆ ಸಿಕ್ಸ್ ಚಚ್ಚುವ ಮೂಲಕ ಈ ವಿಶ್ವದಾಖಲೆ ನಿರ್ಮಿಸಿರುವುದು ವಿಶೇಷ. ಟಿ20ಐ ಮಹಿಳಾ ಕ್ರಿಕೆಟ್‌ನಲ್ಲಿ ಅತೀ ಹೆಚ್ಚಿನ ರನ್ ದಾಖಲೆ ಈ ಮೊದಲು ಆಸ್ಟ್ರೇಲಿಯಾದವರೇ ಆದ ಮೆಗ್ ಲ್ಯಾನಿಂಗ್ ಹೆಸರಿನಲ್ಲಿತ್ತು. ಇದೇ ವರ್ಷ ಜುಲೈ ತಿಂಗಳಲ್ಲಿ ಇಂಗ್ಲೆಂಡ್‌ ವಿರುದ್ಧದ ಪಂದ್ಯದಲ್ಲಿ ಮೆಗ್ ದಾಖಲೆ ನಿರ್ಮಿಸಿದ್ದರು.

ಎರಡು ದಿನಗಳ ಹಿಂದಷ್ಟೇ ಹೀಲಿ ತನ್ನ 100ನೇ ಅಂತಾರಾಷ್ಟ್ರೀಯ ಪಂದ್ಯವನ್ನಾಡಿದ್ದರು. ಆಸೀಸ್‌ ವನಿತೆಯರು ನೀಡಿದ್ದ 227 ರನ್ ಗುರಿ ಬೆಂಬತ್ತಿದ ಶ್ರೀಲಂಕಾ ವನಿತಾ ತಂಡ, ಚಮರಿ ಅಥಾಪತ್ತು 31, ಹರ್ಷಿತಾ ಮಾಧವಿ 28 ರನ್‌ನೊಂದಿಗೆ 20 ಓವರ್‌ಗೆ 7 ವಿಕೆಟ್ ನಷ್ಟದಲ್ಲಿ 94 ರನ್ ಬಾರಿಸಿ ಬರೋಬ್ಬರಿ 132 ರನ್‌ನಿಂದ ಶರಣಾಗಿದೆ.