ಆಸ್ಟ್ರೇಲಿಯಾ ಕ್ರಿಕೆಟ್ ತಂಡದ ಮಾಜಿ ನಾಯಕ ಬ್ಯಾರಿ ಜರ್ಮನ್ ನಿಧನ

ಸಿಡ್ನಿ, ಜುಲೈ 18: ಆಸ್ಟ್ರೇಲಿಯಾ ಟೆಸ್ಟ್ ಕ್ರಿಕೆಟ್ ತಂಡದ ಮಾಜಿ ನಾಯಕ ಬ್ಯಾರಿ ಜರ್ಮನ್ ನಿಧನರಾಗಿದ್ದಾರೆ. ಅನಾರೋಗ್ಯದಿಂದ ಬಳಲುತ್ತಿದ್ದ ಬ್ಯಾರಿ ಜುಲೈ 16ರ ಗುರುವಾರ ಕೊನೆಯುಸಿರೆಳೆದಿರುವುದಾಗಿ ತಿಳಿದುಬಂದಿದೆ. ಅವರಿಗೆ 84 ವರ್ಷ ವಯಸ್ಸಾಗಿತ್ತು.

ವಿಕೆಟ್ ಕೀಪರ್ ಕಮ್ ಬ್ಯಾಟ್ಸ್‌ಮನ್ ಆಗಿದ್ದ ಬ್ಯಾರಿ ಜರ್ಮನ್ ಅವರು 1959ರಿಂದ 1969ರ ವರೆಗೆ ಆಸ್ಟ್ರೇಲಿಯಾ ಪರ 19 ಟೆಸ್ಟ್ ಪಂದ್ಯಗಳನ್ನಾಡಿದ್ದರು. ಟೆಸ್ಟ್‌ನಲ್ಲಿ 400 ರನ್ ದಾಖಲೆ ಜರ್ಮನ್ ಹೆಸರಿನಲ್ಲಿದೆ. ಅಲ್ಲದೆ 13 ಸೀಸನ್‌ಗಳಲ್ಲಿ 191 ಪ್ರಥಮದರ್ಜೆ ಪಂದ್ಯಗಳನ್ನಾಡಿದ ಅನುಭವ ಬ್ಯಾರಿ ಅವರದ್ದಾಗಿತ್ತು.

1959ರಲ್ಲಿ ಭಾರತಕ್ಕೆ ಪ್ರವಾಸ ಬಂದಿದ್ದ ಆಸ್ಟ್ರೇಲಿಯಾ ತಂಡ ಕಾನ್ಪುರದಲ್ಲಿ ಟೆಸ್ಟ್ ಪಂದ್ಯವನ್ನಾಡಿತ್ತು. ಈ ಪಂದ್ಯದಲ್ಲಿ ಬ್ಯಾರಿ ಜರ್ಮನ್ ಪಾದರ್ಪಣೆ ಮಾಡಿದ್ದರು. ಈ ಪಂದ್ಯದಲ್ಲಿ ಜರ್ಮನ್ ಕೇವಲ 1 ರನ್‌ಗೆ ಎಲ್‌ಬಿಡಬ್ಲ್ಯೂ ಆಗಿದ್ದರು. ಪಂದ್ಯದಲ್ಲಿ ಭಾರತ 119 ರನ್ ಗೆಲುವನ್ನಾಚರಿಸಿತ್ತು.

ಬ್ಯಾರಿ ಜರ್ಮನ್ ಕೊನೇಯ ಟೆಸ್ಟ್ ಪಂದ್ಯವನ್ನಾಡಿದ್ದು 1969ರಲ್ಲಿ ವೆಸ್ಟ್ ಇಂಡೀಸ್ ವಿರುದ್ಧ. ಈ ಪಂದ್ಯ ಆಸ್ಟ್ರೇಲಿಯಾದ ಅಡಿಲೇಡ್‌ನಲ್ಲಿ ನಡೆದಿತ್ತು. ಈ ಪಂದ್ಯದಲ್ಲಿ ಜರ್ಮನ್ 3 ರನ್ ಗಳಿಸಿದ್ದರು. ಪಂದ್ಯ ಡ್ರಾ ಗೊಂಡಿತ್ತು. ಕ್ರಿಕೆಟ್ ನಿವೃತ್ತಿ ಬಳಿಕ ಮ್ಯಾಚ್ ರೆಫರೀಯಾಗಿ 25 ಟೆಸ್ಟ್, 28 ಏಕದಿನ ಪಂದ್ಯಗಳಲ್ಲಿ ಜರ್ಮನ್ ಕರ್ತವ್ಯ ನಿರ್ವಹಿಸಿದ್ದರು.