ವಿರಾಟ್ ಕೊಹ್ಲಿ ಹಾಗೂ ಪೆಪ್ಸಿ ಜತೆಗಿನ 6 ವರ್ಷಗಳ ಡೀಲ್ ಅಂತ್ಯ!

ಕೊಹ್ಲಿ ಹಾಲಿ ಬ್ರ್ಯಾಂಡ್ ಮೌಲ್ಯ

ಕೊಹ್ಲಿ ಅವರ ಈ ಸಮಯದ ಬ್ರ್ಯಾಂಡ್ ಮೌಲ್ಯ 120 ದಶಲಕ್ಷ ಡಾಲರ್​ಗೂ (773 ಕೋಟಿ ರೂ) ಅಧಿಕವಾಗಿದೆ. ಕೊಹ್ಲಿ ಅವರು ಹೊಸ ಒಪ್ಪಂದಗಳ ಜಾಹೀರಾತು-ಪ್ರಚಾರಗಳಿಗೆ ದಿನಕ್ಕೆ 5 ಕೋಟಿ ರೂ. ಸಂಭಾವನೆ ಪಡೆಯುವ ಸುದ್ದಿಯಿದೆ. ಜಾಹೀರಾತುಗಳಿಂದ ಬರುವ ಅನೇಕ ಮೊತ್ತವನ್ನು ಸಾಮಾಜಿಕ ಕಳಕಳಿ ಕಾರ್ಯಗಳಿಗೆ ಬಳಸುತ್ತಿದ್ದಾರೆ.

ಧೋನಿ ನಂತರ ಕೊಹ್ಲಿ

2016ರಲ್ಲಿ ಎಂಎಸ್ ಧೋನಿ ಅವರು ಪೆಪ್ಸಿ ಜತೆಗಿನ 11 ವರ್ಷಗಳ ಡೀಲ್ ಕ್ಯಾನ್ಸಲ್ ಮಾಡಿಕೊಂಡ ಬಳಿಕ ಟೀಂ ಇಂಡಿಯಾದ ಅತ್ಯಂತ ಜನಪ್ರಿಯ ಆಟಗಾರ ವಿರಾಟ್ ಕೊಹ್ಲಿ ಅವರು ಪೆಪ್ಸಿಯ ಪ್ರಚಾರಕರಾಗಿದ್ದರು. ಏಪ್ರಿಲ್ 30, 2017ಕ್ಕೆ ಕೊಹ್ಲಿ ಅವರ ಒಪ್ಪಂದದ ಅವಧಿ ಮುಕ್ತಾಯವಾಗಿದೆ. ಕೊಹ್ಲಿಗೆ ಡೀಲ್ ಮುಂದುವರೆಸುವುದು ಬೇಕಿಲ್ಲ, ಆದರೆ, ಕೊಹ್ಲಿ ಅವರನ್ನು ಪ್ರತಿನಿಧಿಸುವ ಕಾರ್ನರ್ ಸ್ಟೋನ್ ಸಂಸ್ಥೆ ಮಾತ್ರ ಇನ್ನೂ ಪೆಪ್ಸಿ ಜತೆ ಡೀಲ್ ಮಾಡುತ್ತಿದೆ.

18 ಬ್ರ್ಯಾಂಡ್​ಗಳ ಸರದಾರ

ಕೊಹ್ಲಿ ಅವರು ಸರಿ ಸುಮಾರು ಒಟ್ಟು 18 ಬ್ರ್ಯಾಂಡ್​ಗಳ ಪ್ರಚಾರ ರಾಯಭಾರಿಯಾಗಿದ್ದಾರೆ. ಇದರಲ್ಲಿ ಆಹಾರೋತ್ಪನ್ನ, ಪಾನೀಯ, ಆಡಿ ಕಾರ್, ಕೋಲ್ಗೆಟ್, ಪುಮಾ ಕ್ರೀಡಾ ಉಡುಪು, ಎಂಆರ್​ಎಫ್ ಟೈರ್, ಟಿಸಾಟ್ ವಾಚ್, ಲಗೇಜ್ ಬ್ಯಾಗ್ ಮುಂತಾದವು ಸೇರಿವೆ. ಕಳೆದ ಫೆಬ್ರವರಿಯಲ್ಲಿ ಅವರು ಪ್ಯೂಮಾ ಜತೆ 110 ಕೋಟಿ ರೂ. ಒಪ್ಪಂದಕ್ಕೆ ಸಹಿ ಹಾಕಿದ್ದಾರೆ.

ಕೋಲಾ ಬೇಡ ಎಂದ ಸೆಲೆಬ್ರಿಟಿಗಳು

2001ರ ಆಲ್ ಇಂಗ್ಲೆಂಡ್ ಬ್ಯಾಡ್ಮಿಂಟನ್ ಪ್ರಶಸ್ತಿ ಗೆದ್ದ ಪುಲ್ಲೇಲಾ ಗೋಪಿಚಂದ್ ಅವರಿಗೆ ಸಾಫ್ಟ್ ಡ್ರಿಂಕ್ಸ್ ಕಂಪನಿ ಕೋಕಾ ಕೋಲಾ ಪ್ರಚಾರ ರಾಯಭಾರಿಯಾಗುವಂತೆ ಆಫರ್ ನೀಡಿತ್ತು. ಆದರೆ ಗೋಪಿ ಇದನ್ನು ತಿರಸ್ಕರಿಸಿದ್ದರು. 2014ರಲ್ಲಿ ಅಮಿತಾಭ್ ಬಚ್ಚನ್ ಕೂಡ ಪೆಪ್ಸಿ ಬ್ರ್ಯಾಂಡ್ ಪ್ರಚಾರದಿಂದ ಹೊರನಡೆದಿದ್ದರು.